வரவுக்குமேலே செலவுகள் செய்தால் அவனும் குருடனும் ஒன்றாகும்
மனிதனுக்கு வாழ்க்கை ஏன் போராட்டமாகவே அமைந்துவிட்டது?
வாழ்வின் ஒவ்வொரு அங்கமும் எதனால் தீர்மானிக்கப்படுகிறது?
பணம். பணம்தான் எதையும் தீர்மானிக்கிறது.
வேலைக்கு சென்றால் கிடைக்கும் வருமானம் ஒரு எல்லைக்குள் நின்று விடுகிறது. பற்றாக்குறை என்பது பரமபத விளையாட்டாகிவிட்டது.
சம்பளம் வாங்கி பரமபத ஏணியில் ஏறினால், அடுத்த கட்டமே சீறும் பாம்பின் வாயில் சிக்கி ஏறிய இடத்திலிருந்து பின்னோக்கி நகர வேண்டியதாக இருக்கிறது.
ஏதாவது, ஒரு தொழில் செய்து வருமானம் ஈட்டலாம் என்றால், போட்ட முதலை எடுப்பதே பெரும்பாடாகிவிடுகிறது.
ஆன முதலில் அதிகம் செலவானால் மானம் அழிந்து மதிகேட்டுப் - போனதிசை எல்லார்க்கும் கள்ளனாய் ஏழ்பிறப்பும் தீயனாய் நல்லார்க்கும் பொல்லனாம் நாடு. - நல்வழி 25
போட்ட முதல் போய்விட்டால், மீண்டும் தொழில் செய்யும் ஆர்வமும் கருகிவிடும். மிகுந்த கவனத்துடன் செயல்பட வேண்டும்.
இந்த நியதி உடலுக்கும் பொருந்தும்.
உடலின் முதல் உயிர் சத்து. அதிகம் செலவழித்தால் எல்லாம் போச்சு. முதலில் ஆரோக்கியம் போகும். இரண்டாவது வாழ்வில் பிடிப்பு நீங்கி வெறுப்பு உண்டாகும்.
காலம் கடந்தவன் காண் விந்து செற்றவன் காலம் கடந்தழிந்தான் விந்து செற்றவன் காலங்களில் விந்து செற்றுற்ற காரிகை காலின் கண் வந்த கலப்பறியாரே. - திருமந்திரம் 1954
விந்துவின் சக்தியை வெல்ல முடியாமல் போனால், அழிவு நிச்சயம். வெல்ல முடிந்தால் காலத்தையும் வெல்லலாம். சில சமயங்களில் விந்து வென்று பெண்ணுடல் கலக்கும் காலத்தில், அவளிடம் இருந்து உயிருடன் கலக்கும் வாயுவை அறியமாட்டார்கள், என்கிறார் திருமூலர்.
நாம் பல இடங்களில் படித்தும், கேட்டும் இருக்கிறோம். அரசர்கள் இளம் பெண்களை அந்தப்புரத்தில் வைத்து, அவர்கள் வழியாக தாங்கள் இழந்த உயிர் சக்தியை மீண்டும் பெற பல வகை யோகங்கள் செய்திருக்கிறார்கள் என்று. பின்னர் அவர்களுடன் கூடி மேலும் மேலும் உயிர் சக்தியை இழந்திருக்கிறார்கள்.
ஒவ்வொருமுறை உறவின்போதும், பெண்ணின் சுரோணிதத்தில் உருவாகும் வாயுவானது ஆணின் தனஞ்சய வாயுவுடன் சேர்கிறது. இளம்பெண்களின் வாயு வலிமையையும், பேரிளம் பெண்களின் வாயு இன்பத்தையும், முதிர் பெண்களின் வாயு நோயையும் ஆண்களுக்கு தர வல்லது.
சரி, விந்து எப்படி வெற்றி கொள்கிறது என்று பார்ப்போம்.
மனித உடலின் இயக்கம் முப்பத்தியாறு தத்துவங்களின் அடிப்படையில் இயங்குகிறது. அதில் சுத்த தத்துவம் எனப்படும் சிவ தத்துவம் ஐந்தைப்பற்றி நாம் தெரிந்து கொள்வது அவசியம்.
விந்து சக்தி, நாத சக்தி.
இதில் நாத சக்தி, ஞான சக்தியாக சிவமாக விளங்குகிறது. விந்து சக்தி பராசக்தியாக, கிரியா சக்தியாக செயல்படுகிறது.
மூன்றாவதான இச்சா சக்தி மூன்று நிலைத்தன்மை பெறுகிறது.
ஒன்று, ஞான சக்தி மிகுந்து, கிரியா சக்தி குறைந்த சுத்த வித்தை.
இரண்டாவது, ஞான சக்தி குறைந்து, கிரியா சக்தி மிகுந்த ஈசுவரம்.
மூன்றாவது, இரண்டு சக்திகளும் சமமாக இயங்கும் சதாசிவம்.
சுத்த வித்தை அறிந்தவன் ஞானி. ஈசுவரம் மிகுந்தவன் போகி. சதாசிவம் கற்றவன் யோகி.
நாமெல்லாம் ஈசுவர நிலையிலிருந்து, அதாவது போக வாழ்விலிருந்து, யோக வாழ்விற்கும், ஞான வாழ்விற்கும் செல்ல முயன்று கொண்டிருக்கிறோம்.
முயற்சி வெற்றி அடைய என்ன செய்யலாம்?
பார்க்கின்ற மாதரை பாராது அகன்றுபோய்
ஓர்க்கின்ற உள்ளம் உருக அழல்மூட்டிப்
பார்க்கின்ற கண்ணாசை பாழ்பட மூலத்தே
சேர்க்கின்ற யோகி சிவ யோகிதானே.
- திருமந்திரம் 1937
நீ பார்க்கின்ற அல்லது உன்னைப் பார்க்கின்ற பெண்ணை பாராமல் செல்ல வேண்டும். பெண்ணை பார்த்ததால் உள்ளத்தில் ஏற்பட்ட ஆசை என்னும் கிரியா சக்தியை நெற்றி நடுவில் வைத்து சேர்த்து எரித்து விடவேண்டும்.
எப்படி எரிப்பது என்ற கேள்வி வருகிறதல்லவா?
எளிமையாக சொல்கிறேன். பிராணாயாமம் செய்யுங்கள் போதும். அதைத்தான் திருமூலரும் சொல்லி இருக்கிறார்.
உங்களுக்கு ஏற்பட்ட ஆசை உணர்வை விழிப்புணர்வோடு மூலாதாரத்திற்கு கொண்டு செல்லுங்கள்.
மூச்சுப்பயிற்சி செய்யுங்கள்.
சூரிய நாடியில், வலது நாசி வழியாக செல்லும் காற்று, கண்ணாசையை எரித்து, நெற்றி நடுவிற்கு எடுத்து சென்று விடும். இதை செய்வது நாடு நாடியில் நின்றியங்கும் தனஞ்செய வாயு.
தமிழின்பால் பற்று கொண்ட அனைத்து நல் உள்ளங்களுக்கும் என் அன்பான வணக்கம்.
'என்னை நன்றாக இறைவன் படைத்தனன் தன்னை நன்றாக தமிழ் செய்யுமாறே'
மண்ணுலகில் தான் படைத்த மனிதர்களுக்கு இறை நிலையை, இறையின் தன்மையை உணர்த்த எண்ணிய இறைவன் தேர்ந்தெடுத்த மொழி தமிழ்.
நன்றாக தவம் செய்யுங்கள். நல்ல தவம் செய்தவருக்கு மறுபிறவி கிடையாது என்று அடித்து சொன்ன திருமூலருக்கு அச்சம்,
'உங்களுக்கு எப்படி இப்பிறவி கிடைத்தது முற்பிறவியில் தவம் செய்யவில்லையா?' - என்று யாராவது கேட்டு விட்டால்?
'இல்லையப்பா. நான் நன்றாக தவம் செய்துதான் இறைவனடி சேர்ந்தேன். ஆனால் இறைவன், மூலன் உடல் சேர்ந்து, மனித வாழ்வின் பொருளறிய தமிழில் என்னை பாடு என்று மறுபடியும் என்னை படைத்துவிட்டான்.' - என்கிறார் திருமூலர்.
பின்னை நின்றுஎன்னே பிறவி பெறுவது முன்னை நன்றாக முயல்தவம் செய்கிலர் என்னை நன்றாக இறைவன் படைத்தனன் தன்னை நன்றாக தமிழ்ச் செய்யுமாறே.
இறை மொழி தமிழ் மொழி.
அடுத்ததாக வரும் நம் உலகப்பொதுமறை தந்த திருவள்ளுவர் தன் முதல் பாடலிலேயே தமிழின் தொன்மையை நிறுவுகிறார்.
இந்த உலகம், அண்டம், பேரண்டம் அனைத்துமே ஆதி பகவனை முதன்மையாக கொண்டு இயங்குகிறது, தமிழில் அனைத்து எழுத்துக்களுக்கும் முதன்மையாக அகரம் விளங்குவதைப்போல்.
அகர முதல எழுத் தெல்லாம் ஆதிபகவன் முதற்றே உலகு.
இங்கே தமிழ் எழுத்தையும் ஆதி இறையையும் இணைப்பதோடல்லாமல், இறைவனின் மொழியும் தமிழ்தான் என்றாகிறது அல்லவா?
அடுத்த கேள்வி.. அகரத்தில் ஆரம்பித்து தமிழில் மொத்த எழுத்துக்கள் எவ்வளவு?
ஒவ்வொருவரும் ஒரு எண்ணிக்கை சொல்வோம். ஆனால், மொத்தம் முப்பது எழுத்துக்கள் என்று சொல்கிறது, தமிழுக்கு இலக்கண வரம்பிட்ட தொல்காப்பியம்.
எழுத்து எனப் படுப அகரம் முதல் னகர இறுவாய் முப்பஃ து என்ப சார்ந்து வரல் மரபின் மூன்றலங் கடையே.
அகரம் முதலான உயிரெழுத்துக்கள் 12.
னகரம் இறுதியான மெய்யெழுத்துக்கள் 18.
மொத்தம் 30.
மற்ற எழுத்துக்கள் எல்லாம் என்ன என்ற கேள்வி வருகிறதல்லவா? அவைகளை மூன்று சார்பெழுத்துக்கள் என்கிறது எழுத்ததிகாரம்.
அவைதாம் குற்றியலிகரம் குற்றியலுகரம் ஆய்தம் என்ற முப்பால் புள்ளியும் எழுத்து ஓர் அன்ன
இந்த முப்பது எழுத்துக்களை கொண்ட தமிழ்தான் தமிழினத்தின் தன்மான அடையாளம். உயிரும் மெய்யும் சேர்ந்து வரும் உயிர்மெய் எழுத்துக்கள், வார்த்தைகளின் ஒலிக்காக, உச்சரிப்புக்காக வருவதால் அவை கணக்கில் கொள்ளப்படவில்லை.
ஒலியின் வரி வடிவம் எழுத்து என்பதை சரியாக நிறுவி உள்ளது தமிழ். இன்று உலகளாவிய அளவில் தொடர்பு மொழியாக இருக்கும் ஆங்கிலத்தில் ஒலியை நிறுவ எழுத்துக்களின் கூட்டினை கொண்டே உச்சரிப்பு மற்றும் பொருள் கொள்ள வேண்டி உள்ளது.
உதாரணத்திற்கு குரு என்ற வார்த்தையை எடுத்துக்கொண்டால், தமிழில் இரண்டே எழுத்தில் எழுதி விடலாம். ஆனால் குரு என்ற ஒலியை எழுத ஆங்கிலத்தில் நான்கு எழுத்துக்கள் தேவைப்படுகிறது.
கல்தோன்றி மண்தோன்றா காலத்தே வாளொடு முன்தோன்றிய மூத்த குடி.
இங்கேதமிழின் தொன்மையை விட அருமையான செய்தி ஒன்றிருக்கிறது. வாளோடு என்ற சொல்தான் அது. இதில் என்ன வியப்பு இருக்கிறது, தமிழனின் வீரத்தை குறிக்கத்தான் என்கிறீர்களா?
ஆமாம்.. ஆனால் அதற்கும் கொஞ்சம் மேலே..
வாள் எதனால் செய்யப்படுகிறது. இரும்பினால் தானே? இரும்பு என்ற உலோகத்தை கற்காலத்திலேயே அறிந்திருந்தான் தமிழன். இரும்பை உபயோகிக்கவும் தெரிந்திருந்தான் என்பதுவும் பெருமைதானே.
இலக்கணத்தை தாண்டி தமிழ் இலக்கிய உலகம் அளப்பரியது.
யாமறிந்த மொழிகளிலே தமிழ் மொழி போல் இனிதாவது எங்கும் காணோம் என்று பாரதியார் உலகிற்கு பறை சாற்றியபோதும்,
தமிழ் எங்கள் உயிருக்கு நேர் என்று பாரதிதாசன் உருகியபோதும்,
யாதும் ஊரே யாவரும் கேளிர் என்று உலக அரங்கில் மக்கள் ஜனாதிபதி அப்துல் கலாம் எடுத்துரைத்த போதும்,
தமிழ் சரியாக உச்சரிக்க முடியாவிட்டாலும், விடாமல் குறளை மனப்பாடம் செய்து உரையில் சேர்க்கும் பாரதப் பிரதமரும்,
தொடர்ந்து தமிழுக்கு மணிமகுடம் சூட்டிக்கொண்டே இருக்கிறார்கள்.
மகிழ்ச்சியோ, துக்கமோ பல நூறு பக்கங்களில் சொல்லி விளங்க வைக்க வேண்டிய ஆய்வினை ஒன்றே முக்கால் அடியில் வழங்க, நீதி அரசர் ஆறுமுக சாமி தன் ஆய்வில் இந்த குறளை உபயோகிக்கிறார்.
அரசியல் அரங்கில் எதிரிகளுக்கு சிம்ம சொப்பனமாக விளங்கிய முன்னாள் முதல்வர் ஜெயலலிதா அவர்களின் மரண ஆய்வறிக்கையில், மேற்கோள் காட்டப்பட்ட திருக்குறள் இது.
போரில் கண்ணுக்கு நேராக வரும் வேலினை தடுத்து எதிர்த்து நிற்கும் பலம் கொண்ட யானை, மாறுகால் எடுத்து வைக்க முடியாத புதை சேற்றில் மாட்டிக்கொண்டால், சாதாரண நரியால் வீழ்த்தப்பட்டுவிடும்.
தமிழின் பெருமையை வெவ்வேறு கோணங்களில் சொல்லிய அனைத்து போட்டியாளர்களையும் வாழ்த்தி விடை பெறுகிறேன்.
சொந்தம் ஒரு கை விலங்கு நீ போட்டது அதில் பந்தம் ஒரு கால் விலங்கு நான் போட்டது
'அடுத்து என்ன? தெரியவில்லை.' - கண்ணீர் ததும்ப தொலைக்காட்சிக்கு பதில் சொல்லிக்கொண்டிருந்தான் ஜான் மெக்டொனால்ட்.
பார்த்து பார்த்து கட்டிய வீடு முழுக்க மழை வெள்ளம் புகுந்திருந்தது. கார், வீட்டின் பூந்தோட்டம், நீச்சல் குளம் எல்லாவற்றையும் வெள்ள நீர் ஆக்கிரமித்துக்கொண்டிருந்தது. அதிகாலை நேரத்தில் வெள்ள அபாய எச்சரிக்கை வந்ததால் உடனடியாக வீட்டை விட்டு வெளியேற வேண்டிய கட்டாயம்.
மூன்றாம் உலக நாடுகளில் இம்மாதிரியான வெள்ள அபாயங்களை வருடாந்திர நிகழ்வுகளில் ஒன்றாக பார்க்கலாம். ஆனால், ஆஸ்திரேலியா போன்ற வளர்ந்த நாடுகளில் இம்மாதிரி நிகழ்வுகள் மிகுந்த கவனம் பெறக்கூடியது.
ஒவ்வொரு வீடும், குறைந்தது இந்திய மதிப்பில் ஐந்து கோடி ரூபாய்க்கு குறையாது. ஒவ்வொன்றும் ஒரு கனவு இல்லமாகவே தோன்றும். ஆயிரக்கணக்கான வீடுகள் தண்ணீரில் மூழ்குவது என்பது மிகப்பெரிய பொருளாதார பின்னடைவு.
தொலைக்காட்சியை நம்ப முடியாமல் வெறித்துப்பார்த்துக்கொண்டிருந்தாள் கெல்லி வில்ஸ். நேற்று சென்று பார்வையிட்டு வந்திருந்த தெருக்களெல்லாம் இப்பொழுது தண்ணீரால் மூடப்பட்டிருந்தது. சாலைகளில் நின்றிருந்த கார்கள் எல்லாம் தண்ணீரில் மூழ்கியும், மூழ்காமலும் நின்றிருந்ததன.
பூட்ஸ்க்ரே என்னும் இந்த புறநகரில், எலிசபெத் அவென்யு தெருவில் உள்ள 15-ம் எண் வீட்டினை வாங்குவதற்காக முன்தொகையாக நேற்றுதான் ஒரு லட்சம் டாலர் கொடுத்திருந்தாள் கெல்லி.
'அடுத்து என்ன? தெரியவில்லை.' - மன அழுத்தத்துடன் ரியல் எஸ்டேட் ஏஜெண்டை மொபைலில் அழைத்தாள். கெல்லியின் இதயம் ரயில் தண்டவாளம் போல் தடதடத்தது.
'ஹாய்.. ராபர்ட். நான் கெல்லி. வெள்ள நிலை உங்களுக்கு தெரியும்னு நினைக்கிறேன். நான் டெபாசிட் குடுத்த வீடு வெள்ளத்தில் மூழ்கி இருக்கு.'
'ஹாய் கெல்லி. எப்படி இருக்கீங்க இன்னிக்கு?. நீங்க குடுத்த பேங்க் செக் இன்னும் டெபாசிட் ஆகல. என்கிட்டதான் இருக்கு.'
கொஞ்சம் ஆசுவாசமாகவும் இருந்தது. அப்பாடா.. இன்னும் பணம் கையை விட்டு போகவில்லை.
'ப்ளீஸ்.. அந்த விற்பனை பத்திரத்தை கான்சல் செய்யணும்.'
'நீங்க விற்பனை பத்திரத்தில் கையெழுத்து போட்டு குடுத்த பேப்பேர்ஸ் எல்லாம் பேங்க் செக் விபரத்தோட லீகல் செக்சனுக்கு அனுப்பிட்டேன்.'
மீண்டும் பிரஷர் ஏறியது கெல்லிக்கு.
'அப்படின்னா.. டெபாசிட் பணம்..?' என்று இழுத்தாள் கெல்லி.
'இன்னும் நான் வீடு ஓனர்க்கு டெபாசிட் பணம் பற்றி சொல்லல. அதனால..'
மீண்டும் வெளிச்சம் தெரிவதுபோல் உணர்ந்தாள் கெல்லி.
'அதனால.. லீகல் செக்சன் பார்த்துட்டு சொல்றேன். பை'
சுரத்தில்லாமல் காலைத்துண்டித்தாள் கெல்லி.
தன்னுடைய சக்தி எல்லாம் ஒரே நாளில் வடிந்துவிட்டதுபோல் சோர்வாக இருந்தது. வாங்கப்போகும் வீட்டின் ஹால், படுக்கை அறை, சமையலறை, பின்புறம் இருந்த கார்டன், நீச்சல் குளம் எல்லாம் நினைவில் வந்து அவளை வருத்தியது. நேற்றுவரை இதே காட்சிகள் மனதிற்கு சந்தோசத்தை கொடுத்ததென்னவோ உண்மை.
மொபைல் மணி அடிக்க எடுத்து அழைக்கும் நம்பரை பார்த்தாள். பதிவு செய்யப்படாத புதிய எண்.
'ஹலோ.. நான் வில்லியம் வெல்ஸ். கெல்லிதானே நீங்க? நீங்க வாங்கப்போகும் வீட்டின் ஓனர்.'
'புரியுது. நான் வேணும்னா ஒண்ணு பண்றேன். உங்க செலவ நானும் ஷேர் பண்ணிக்கிறேன்' - சற்று முன்னர் இன்சூரன்ஸ் நிறுவனத்திடம் வந்த செய்தியில் மகிழ்ந்திருந்த வில்லியமுக்கு இது பெரிய தொகையாக இருக்காது என்று தெரியும்.
கெல்லிக்கு ஆச்சர்யமோ, ஆச்சர்யம் கூடவே சந்தோஷமும்.
ஒரு பொருளின் மீதோ அல்லது மனதுக்குகந்த துணையின் மீதோ சொந்தம் கொண்டாடும் போது அதில் உண்டாகும் இன்பத்திற்கிணையான துன்பமும் சேர்ந்து வருகிறது.
அந்த சொந்தம் என்ற உணர்வு இல்லாத போது துன்பமும் கூடவே மறைந்து போகிறது. ஆராய்ந்து பார்த்தால் அனைத்து வகையான இன்ப, துன்பங்களுக்கு ஒன்றின்மேல் கொள்ளும் பற்று பாசமே காரணியாகிறது.
இந்தப் பற்று பாசமே உயிரையும் பற்றி இருப்பதால், உயிரால் நம் பிறப்பின் பொருளை உணர்ந்து கொள்ள முடியாமல் தடுமாறுகிறது. உயிர் அடையவேண்டிய எல்லைக்கோடான இறைநிலையை எய்த முடியாமல் போகிறது.
பதிபசு பாசம் எனப்பகர் மூன்றில் பதியினைப் போல்பசு பாசம் அனாதி பதியினைச் சென்று அணுகாப் பசுபாசம் பதிஅணுகில் பசு பாசம் நிலாவே. - திருமந்திரம் 115
[பதி - இறை, பசு - உயிர், பாசம் - பற்று, சொந்தம்]
இறைநிலை எப்படி ஆதி நிலையோ, அதே நிலைதான் உயிரை பற்றியுள்ள பந்த பாசங்களும். சொந்தங்களை விலக்கி இறைநிலை அடைய உயிரை அனுமதிப்பதில்லை பாசம். உயிர் இறைநிலையை சேர்ந்தபொழுதில் சொந்த பந்த பாசங்கள் அகன்று விடும்.
உன்னையும் உன்னையும் என் ரெண்டு குழந்தை போலவே எப்போதும் எப்போதும் நான் பத்துப்பேனே!
'சூரிய தேவா, நான் சிறு பெண். ஆர்வத்தால் மந்திரத்தை பிரயோகித்துப் பார்த்தேன். உங்களுடன் சேர்ந்து குழந்தை பெற்றுக்கொள்ளும் வயதும் இல்லை. இது முறையும் அல்ல.' - இளம் பெண்ணான குந்தி தன்னை அடைய தன் முன்னர் நிற்கும் சூரிய பகவானை கையெடுத்து கும்பிட்டுக் கதறினாள்.
துர்வாச முனிவருக்கு மனம் மகிழும்படி செய்த பணிவிடைகளினால் 'குழந்தை பெரும் மந்திரத்தை' வரமாக பெற்றாள் குந்தி. கிடைத்த வரத்தை விளையாட்டாக சூரியனைப் பார்த்து பிரயோகிக்க குழந்தை வரம் கொடுக்க நேரில் வந்து நின்று குந்தியை ஆகர்ஷிக்கப் பார்க்கிறான்.
'குந்தி தேவியே, என்னை மந்திரத்தால் அழைத்திருக்கிறாய். கண்டிப்பாக மந்திரத்தின் பலனாக உனக்கு குழந்தை பாக்கியம் கொடுத்தாக வேண்டும். ஒன்று மட்டும் என்னால் செய்ய முடியும். மீண்டும் உன்னை கன்னிப்பெண்ணாக மாற்றி விட முடியும்.' - இப்படியாக பலதும் கூறி குந்தியை சேர்கிறான் சூரியன்.
பலன், பராக்கிரமசாலியான கர்ணன் பிறக்கிறான்.
குந்தி மீண்டும் கன்னியாகிறாள்.
பகுத்தறிவிற்கு ஒவ்வாத காரியம் இது. குழந்தை பெற்ற பெண் மீண்டும் கன்னித்தன்மை பெறுவது சாத்தியமா?
பெண்ணின் கருமுட்டையை வெளியே எடுத்து, கருத்தரித்தல் செய்து மீண்டும் பெண்ணின் வயிற்றில் வளர செய்யும் கலையை இன்றைய அறிவியல் உலகம் செய்து காட்டி விட்டது.
கருத்தரித்து உயிர் உண்டான நிலையில் மற்றோர் பெண்ணின் வயிற்றில் கருவை வைத்து, வளர்த்து குழந்தை பெற்று கொள்வது இன்றைய மருத்துவ உலகில் பிரசித்தமாக உள்ளது.
குழந்தை பெற்றும் தாயின் கன்னித்தன்மைக்கு எந்த பங்கமும் நேரவில்லை.
இது நடைமுறைக்கு சாத்தியமே என்று பின்னர் வரும் சந்ததியினர் அறிந்துகொள்ள குந்தியின் கதை எழுதப்பட்டதோ?
கருத்தரித்த மாத்திரத்தில், கருவில் சேர்ந்த உயிரின் வாழும் நாள், சாகும் நாள், அனுபவிக்கும் உலக இன்ப துன்பம் எல்லாம் தீர்மானிக்கப்பட்டுவிடுகிறது. இவ்வாறாக உருப்பெறும் கருவானது, உருவான பெண்ணை நீங்கி வேறிடத்தில் வளர்ந்தாலும், உரிய நேரத்தில் அதாவது பத்தாவது மாதத்தில் குழந்தையாக பிறக்கும்.
பார்த்திட்டு வையத்துப் பரப்பற்று உருப்பெற்று வார்ச்செற்ற கொங்கை மடந்தையை நீக்கியே சேர்ந்துஉற்று இருதிங்கள் சேராது அகலினும் மூப்புற்றே பின் நாளில் ஆமெல்லாம் உள்ளவே. - திருமந்திரம் 1945
வெளியே பைக் புறப்படும் சப்தம் தெளிவில்லாமல் கேட்டது. கூடவே குரைத்த நாயின் குரல் அது பைக்தான் என்று தெளிவாக்கியது. எனக்கு கேட்கும் திறன் குறைந்துகொண்டே வருகிறது.
மகனும், மருமகளும் வேலைக்கு கிளம்பிவிட்டார்கள். குழந்தையை அப்படியே பள்ளியில் விட்டு விட்டு செல்லும் அவர்கள் மீண்டும் மாலைதான் வருவார்கள்.
சுவர்க்கடிகாரத்தைப்பார்த்தேன். 12-ல் சின்ன முள்ளா, பெரிய முள்ளா என்று சரியாக தெரியவில்லை. ஆனால், நிச்சயம் காலை மணி எட்டரையை தாண்டி இருக்கும். பார்வையும் மங்கலாகத்தான் இருக்கிறது.
இரவெல்லாம் சரியான தூக்கம் இருக்காது. அரண்டு, உருண்டு படுத்தாலும் கொஞ்சம் கோழித்தூக்கம் மட்டும் தினமும். அதுவும் கொச்சினிலிருந்து வரும் பிளைட் சரியா நாலு மணிக்கு எழுப்பி விட்டுரும். அவர்கள் வெளியே செல்லும் பைக் சப்தம் கேட்கும் வரைக்கும் பேசாமல் படுத்து கிடப்பேன். பகலில் தூக்கம் என்பதை சுத்தமாக விட்டு விட்டேன்.
பகலில் தூங்கினால் இரவில் வரும் கொஞ்ச நஞ்ச தூக்கமும் போச்சு. இன்னொரு பிரச்னையும் கூட. பகலில் தூங்கி எந்திரிச்சவுடன் மறுபடியும் காலையில் செய்யும் வேலைகளை செய்றேனாம். மறதியும் கூடிருச்சு போல.
வீட்டை விட்டு கிளம்பும்போது கிச்சன் கதவை பூட்டிட்டு போறாங்க. கொஞ்சூண்டு சுடுதண்ணி வேணும்னாலும் பிளாஸ்க் தண்ணிதான். ஒரே ஒரு முறை சுடுதண்ணி போட்டுட்டு காஸ் மூடாம விட்டுட்டேன். அன்னிக்கு இருந்து கிச்சன் என்ட்ரி நாட் அல்லொவ்ட். எனக்கு வாசம் வந்திருந்தா மூடாம விட்டிருப்பேனா? மூக்கும் போச்சு.
இதெல்லாம் போக, உடல் உபாதைகள், வேளா வேளைக்கு மருந்துகள். இதில் முக்கியமா ஒண்ணு தெரியுது. மனசு மட்டும் மாறாம இருக்குது, அதே பழைய துடிப்பும், கனவுகளுமாக.
என்னாலும் பைக் ஓட்டமுடியும்னு மனசு சொல்லுது. ஆனா, ஒரு காலில் நின்னு, இன்னொரு காலை தூக்கி பைக்ல உக்கார ஒடம்பு ஒத்துழைக்குமான்னு தெரியாது.
எதனால் இந்த மாற்றங்கள்?
உடலுக்கு தேவையான உணவில் மாற்றமில்லை. பின்னர் எதனால் புலன்களின் திறன் குறைந்து கொண்டே போகிறது, வயது ஏற ஏற.
இதைத்தான் நம் முன்னோர்கள் யோசித்தார்கள். உணவைத்தவிர்த்து, பஞ்ச பூதங்கள் ஆளும் இவ்வுடலை ஆரோக்கியமாக வைக்க என்ன தேவை என்று ஆராய்ந்தார்கள்.
இந்த உடலுக்குள் சந்தம் மாறாமல் சென்று வரும் காற்றை கவனித்தார்கள். காற்றின் தன்மையை பிரித்தும், வகுத்தும் பார்த்தார்கள்.
உடலில் கலந்த உயிர், காற்றினால் கட்டப்பட்டிருப்பதை உணர்ந்தார்கள். எவ்வளவுக்கெவ்வளவு காற்றும், உயிரும் நெருக்கமாக கட்டப்பட்டிருக்கிறதோ, அவ்வளவுக்கவ்வளவு உடலில் உயிர் தங்கும் காலம் என்றறிந்தார்கள்.
காற்றுதான் உயிரை கட்டி வைத்திருக்கிறது என்னும் உண்மையை சொன்னார்கள்.
கலந்த உயிருடன் காலம் அறியில் கலந்த உயிரது காலின் நெருக்கம் கலந்த உயிரது காலது கட்டில் கலந்த உயிருடன் காலமும் நிற்குமே.
- திருமந்திரம் 592
[கால் - காற்று ]
அடுத்து, மூச்சாக உட்செல்லும் காற்றினை ஆய்வு செய்தார்கள். அதனை பத்து வகையாக உள்ளது என்று பகுத்தறிந்தார்கள். தச வாயுக்கள் என்று பெயரிட்டு, பின்னர் அதனையும் இரு வர்க்கமாக பிரித்தார்கள். வெப்பத்தின் தன்மையாக ஐந்து வாயுக்களை ஒரு கூறாகவும், வாய்வின் தன்மையாக மற்றொரு ஐந்து வாயுக்களை மற்றொரு கூறாகவும் வைத்து ஆய்வினை மேற்கொண்டார்கள்.
தச வாயுக்களின் முக்கிய பணிகளாக, ஐம்புலன்களின் உணர்வு நிலையாக, சுவைத்தல், முகர்தல், பார்த்தல், கேட்டல், நுகர்தல் என்றறிந்தார்கள். கொட்டாவி, தும்மல், விழித்தல், இமைத்தல், கழிவுகளை வெளியேற்றும் உணர்வு/தன்மை, விந்து பாய்ச்சுதல் போன்ற செயல்களையும் இவைகளே காரணிகளாக உள்ளன என்பதையும் கண்டார்கள்.
வயது ஏற ஏற, சுவாசித்தலில் ஏற்படும் மாற்றம், தச வாயுக்கள் சீரற்ற அளவில் உடலில் இயங்குவதனால். பல்வேறு உபாதைகள் உண்டாக ஏதுவாகிறது.
அடுத்து உடலுக்குள் சுவாசக்காற்று செல்லும் பாதையை கவனித்தார்கள். சுவாசிக்கும் காற்று உடலுக்குள் பயணித்தலையும் அதன் பணிகளையும் பார்த்தார்கள்.
சுவாசத்தில் இடது சுவாச பாதையை இடகலை அல்லது சந்திரகலை என்றும், வலது சுவாச பாதையை பிங்கலை அல்லது சூரியகலை என்று பெயரிட்டார்கள். சுவாசிக்கும் காற்றை தச வாயுக்களாக பிரித்து, அதன் பணிகளின் தேவைக்கேற்ப அதனதன் நிலைகளில் நிலைநிறுத்தும் என்பதையும் கண்டறிந்தார்கள்.
மேலும் சுவாசிக்கும் காற்றின் பாதையினை ஆராய்ந்தபோது, சில நேரங்களில் இடது நாசியிலும், சில நேரங்களில் வலது நாசியிலும் காற்றின் வேகம் மாறுபடுவதை கண்டார்கள்.
வெள்ளி, திங்கள் மற்றும் புதன் கிழமைகளில் இடது நாசியில் அதிக காற்றோட்டமும், சனி, ஞாயிறு மற்றும் செவ்வாய்க்கிழமைகளில் வலது நாசியில் அதிக காற்றோட்டமும் இருக்க வேண்டும். வியாழனன்று மட்டும், வளர் பிறை நாட்களில் இடது புறமும், தேய் பிறை நாட்களில் வலது புறமும் காற்று ஏற்றத்துடன் இருக்க வேண்டும்.
வெள்ளிவெண் திங்கள் விளங்கும் புதனிடம் ஒள்ளிய மந்தன் இரவிசெவ் வாய்வலம் வள்ளிய பொன்னே வளரும் பிறையிடம் தெள்ளிய தேய்பிறை தான்வலம் ஆமே. - திருமந்திரம் 790
உடல் நல்ல ஆரோக்கியத்துடன், உயிரோடு கலந்து ஒன்றி இருப்பதை மேற்கூறிய சுவாச நிலைகளில் இருந்து அறியலாம். உயிர் வாழும் காலத்தையும் கணக்கிடலாம்.
நாமும் இந்த எளிய சோதனையை செய்து பார்த்து, நம் சுவாச நிலையை காற்றுப்பயிற்சி மூலம் சரி செய்து கொள்ளலாம்.
அன்று வந்ததும் இதே நிலா இன்று வந்ததும் அதே நிலா என்றும் உள்ளது ஒரே நிலா
'கோயில்ல என்ன இருக்கு. அசிங்க அசிங்கமா பொம்மை சிலைகள் இருக்கு' - சமீபத்தில் ஒரு அரசியல் வியாதியின் அரிய கண்டுபிடிப்பு.
ஆழ்வார்குறிச்சி அருகில் உள்ளது பாப்பான்குளம் என்னும் சிற்றூர். சமீபத்தில் அங்குள்ள திருவெண்காடர் சிவாலயத்துக்கு சென்றிருந்தோம். மிகவும் பழமையான கோயில் அது. சிற்ப வேலைப்பாடுகளுடன் கூடிய கல்தூண்களால் கோயில் நிறுவப்பட்டிருந்தது.
கோயிலின் சிறப்பு மாலை நேர பூஜை. விளக்குகள் அணைக்கப்பட்டு, வாத்திய இசையில் மூலவரின் தோற்றம் அற்புதமாக இருக்கும். சந்திரகாந்தக்கல்லால் ஆன சிவலிங்கம், கருவறை அருகில் இருந்து பார்த்தால் சிறியதாகவும், கொடிமரம் அருகில் இருந்து பார்த்தால் பெரியதாகவும் தெரியும்.
நாங்கள் செல்வதற்கு சற்று தாமதம் ஆகி விட்டதால், தரிசனம் மட்டும் செய்துவிட்டு, தூண்களில் அழகாக செதுக்கப்பட்டிருந்த சிலைகளை பார்க்க ஆரம்பித்தோம். அதில், ஒரு சிற்பம் எங்களை ஆச்சர்யத்தில் ஆழ்த்தியது.
ஆம், பல நூற்றாண்டுகளுக்கு முன்னரே, இன்று சிறுவர்கள் கால்களால் உந்தி ஓட்டி மகிழும், ஸ்கூட்டியில் ஒருவர்.
இது எப்படி சாத்தியம்?
ஒன்று அவர்களுக்கு காலப்பயணம் சாத்தியப்பட்டிருக்க வேண்டும். அல்லது, அவர்கள் வாழ்ந்த கால கட்டத்தில் அவை பயனில் இருந்திருக்க வேண்டும்.
இதே மாதிரியான பிரமிப்பு தரும் சிற்பங்கள் நம் பழங்கால கோயில்களில் நிறைய காணக்கிடைக்கிறது.
கரு உருவாவதிலிருந்து, அதன் வளர் நிலைகள் சிற்பங்களாக. இன்றைக்கு நாம் ஸ்கேன் செய்து பார்க்கும் அதே சிற்பம் கற்றூண்களில். கூடவே சில இடங்களில் குடங்கள்.
சிசுவின் வளர்ச்சிக்கும் குடத்திற்கும் என்ன தொடர்பு?
சோதனைக்குழாய் சிசு?
நான் சொல்லப்போவது கும்பமுனி பற்றி. குடத்தின் வாயிலாக பிறந்ததால் கும்பமுனி என்று அழைக்கப்படும் அகஸ்தியர் பற்றி.
வருண பகவானும், மித்ர பகவானும் யாகம் செய்து கொண்டிருக்கிறார்கள். அப்பொழுது அப்சரஸ் ஊர்வசி அங்கே வருகிறாள். அவளது அழகில் மயங்கி தன்வசம் இழந்தவர்களின் விந்து வெளிப்படுகிறது.
மேலோட்டமாக பார்த்து, மிகவும் ஆபாசம் என்று ஒதுங்காமல் இதில் உள்ள அறிவியலைப்பார்ப்போம்.
ஊர்வசி வந்ததால், அதாவது பெண் வந்ததால், வருணன் என்னும் ஆணின் உயிரணு வெளிப்பட்டு பெண் உயிரணுவிடம் கலக்கிறது. அங்கே புதிய ஜீவன் உருவாகிறது.
அது ஒரு குடத்தில் சேமிக்கப்பட்டு குழந்தையாக வளர்கிறது. இந்த கும்பத்தில் பிறந்ததாலே, அகஸ்திய முனிவருக்கு கும்ப முனி என்ற பெயர் வழங்கப்படுகிறது.
நாம் புரிந்து கொள்ள வேண்டியது ஒன்றுண்டு. புராண காலத்திற்கு முன்னரே சோதனைக்குழாய் மூலம் சிசுவை உருவாக்கும் அறிவியல் முறையை நம் மனித குலம் அறிந்திருந்தது என்பதுதான். இந்த கலையை நாங்கள் அறிந்திருந்தோம் என்று பறை சாற்றுவதே இந்த கற்சிற்பங்கள்.
எனவே, இது காலப்பயணத்தில் சேர்த்தி அல்ல. அவர்கள் வாழ்ந்த கால கட்டத்தில் இருந்த அறிவியல் கலை என்றாகிறது.
இதெல்லாம் புராண கால புரட்டுக்கதைகள் என்று தள்ளிவிட்டு போக விடாமல் நம் பகுத்தறிவிற்கு சவால் விடும் சமாச்சாரம் இது.
கற்சிற்பங்களே ஆவணங்கள். மறைக்கப்பட்ட ஆன்மீகம் என்று கூறிவிட முடியாது.
இந்த அறிவியலை அவர்கள் முறையாக கற்க, கற்பிக்க, செயல் முறைப்படுத்த அதற்கான புத்தகங்கள், உபகரணங்கள் வைத்திருந்திருப்பார்கள்தானே?
அவைகள் எங்கே?
அறிவு சார்ந்து தேட ஆரம்பித்தால், ஒரு வேளை அவைகள் நம் கண்ணுக்கு புலப்படலாம். புத்தகங்களாகவோ அல்லது வேறு வடிவிலோ. ஒருவேளை அழிந்து போயிருந்தாலும் போயிருக்கலாம்.
ஆனால், உண்மை நிலையை பறை சாற்றிக்கொண்டிருக்கிறது இக்கற்சிற்பங்கள்.
கும்பமுனி, முதல் நிலை சித்தரான முருகனின் அடுத்த நிலை சித்தர் என்றும் அறியப்படுகிறார். போகரின் குருவாகவும் விளங்கியவர்.
போகரின் பூர்வீகம் சீனா என்றும் அவரது பெற்றோர்கள் சலவைத்தொழில் செய்பவர்களென்றும் அகஸ்தியர் தன்னுடைய படைப்புகளில் குறிப்பிட்டிருக்கிறார்.
இன்றைக்கு 2022 என்பது நம் காலக்கணக்கு. இக்காலக்கணக்கு ஆரம்பிக்கும் முன்னர், சுமார் நான்கைந்து நூற்றாண்டுகளுக்கு முன்னர் இருந்ததாக அறியப்படுபவர் போகர் சித்தர், 300 - 450 BC.
அதனால், திருமூலர் வாழ்ந்த காலம் 12-ம் நூற்றாண்டு. திருமந்திரத்தில் போகரைப் பற்றி குறிப்பிடுவதில் எந்த ஆச்சரியமும் இல்லை.
ஆனால், போகர் தன்னுடைய போகர் - 7000 பாடல் தொகுப்பில் எவ்வாறு திருமூலரை பாட்டனாராக அழைக்கிறார்? திருமூலருக்கு சுமார் 15 நூற்றாண்டுகளுக்கு முன்னர் இருந்தவராக அறியப்படுபவர் போகர்.
திரயமாங் காண்டத்தைச் செப்பு தற்கு
சித்தமனோன் மணித்தாயார் பாதம் போற்றி
நிரயமாம் சிவனுடைய பாதம் போற்றி
நித்தியராம் குருநந்தி பாதம் போற்றி
முரயமாம் பாட்டதிரு மூல நாதர்
முத்தியாம் பாதமெந்தன் சிரமேல் வைத்து
கரயமாங் காலாங்கி பாதம் போற்றி
கடாச்சித்த சனகாதி பாதங்காப் பாமே.
- போகர் 7000 [மூன்றாம் ஆயிரம் -1]
சித்தர்களுக்கு காலப்பயணம் இல்லையோ? முக்காலமும் அவர்களுக்கு ஒன்றுதானோ?
இத்தோடு விட்டால் நம் முயற்சி எல்லாம் பலனற்றதாகிவிடும்.
காலக்கணக்கு இல்லையென்றால் அவர்கள் எங்கே இருக்கிறார்கள்? இன்றும் இருப்பார்கள் தானே?
பார்க்க ஆவலாக சென்றேன்.
திருமூலர் திருவாவடுதுறையில் அமர்ந்து 3000 திருமந்திரப் பாடல்களை எழுதினார் என்று படித்திருக்கிறேன். அத்திருத்தலத்தைக்காண [20-08-2022 சனி] சென்றிருந்தேன். கும்பகோணத்திலிருந்து சுமார் 21 கி.மி. தொலைவில் உள்ளது இத்திருத்தலம்.
கோயில் முதல் நிலை தாண்டியவுடன் இடது பக்கம் திருவள்ளுவரின் மேடை. திருமந்திரம் படிக்கும்போது எனக்கு அடிக்கடி ஒரு சந்தேகம் வரும். திருவள்ளுவரும், திருமூலரும் ஒருவரோ என்று.
திருமந்திரத்தின் சாரம் அப்படியே திருக்குறளில் பதிந்திருக்கிறது.
யோசித்துக்கொண்டே திருமூலரின் சந்நிதிக்கு சென்றேன். கோமுத்தீசுவரசுவாமி கோயிலின் பின்புறம், அமைதியான சூழலில் அமைந்திருக்கிறது திருமூலர் ஆலயம்.
கண்களை மூடி கைகளை கூப்பி, ஏதும் வேண்டாமல் தொழுது நிற்கும்போது, நான் சற்றும் எதிர்பாராத, ஓம் எனும் பிரணவ ஒலி என் உள்ளுக்குள்ளிருந்து, மிகவும் தெளிவாக கேட்டது. மனப்பிரம்மையோ என்று திடுக்கிட்டு கண் திறந்தேன். திறந்த மாத்திரத்தில் ஒலி மறைந்தது.
என்னுடன் வந்தவர்களிடம் கேட்டேன் அவர்களுக்கும் அந்த ஒலி கேட்டதா என்று.
கோவையிலிருந்து கரூர் செல்லும் வழியில் பெரிய பெரிய போஸ்டர்கள். போஸ்டர்களில் கடவுளின் படத்திற்கு மாறாக, தானே கடவுளாக அவதரித்துக்கொண்டிருந்தார் விழாவை முன்னின்று நடத்தும் சாமியார்.
ஆண்களும், பெண்களும் செவ்வாடை உடுத்தி திரள் திரளாக குடமுழுக்கு விழாவிற்கு வந்து கொண்டிருந்தார்கள்.
'ஐயா, நீங்கள் கடவுளின் அவதாரம் என்றால், ஒருமுறையாவது கடவுளை நேரில் பார்த்திருக்கிறீர்களா?'
அவர்களில் ஒருவருக்காவது சாமியாரிடம் இந்த கேள்வியை கேட்கும் திராணி இருக்குமா என்பது சந்தேகமே!
'பார்த்திருந்தால், நாங்களும் பார்க்க ஏதுவான வழி சொல்லுங்கள். அவ்வாறு முடியாதென்றால், நீங்கள் சொல்வதை நாங்கள் ஏன் கேட்க வேண்டும்?'
இந்த மண்ணில் பிறந்த மனிதர்கள் அனைவரும் ஒரே குலம். அவர்களுக்கு எல்லாம் ஒரே தெய்வம்.
சிலர் சிவன் என்பார்கள். சிலர் இயேசு என்பார்கள். அவரவர்க்கு பிடித்த தெய்வத்தின் பெயரை சொன்னாலும், இறைவன் ஒருவனே! பெருந்தெய்வமானாலும், குறுந்தெய்வமானாலும், குலதெய்வமானாலும் மனித குலம் கொடுக்கும் ஒவ்வொரு தெய்வத்தின் பெயருக்கும் உரியவன் ஒருவனே.
ஒன்றே குலம், ஒருவனே தேவன். அவனை சிந்தித்திருங்கள், மரண பயம் நீங்கிவிடும். வெட்கப்படாதீர்கள். வேறு வழி இல்லை. உங்கள் அறிவினை அவனை உணர்வதில் செலவிடுங்கள். வாழ்வின் பொருளுணர்ந்து உய்யும் வழி இது ஒன்றே ஆகும்.
'ஆனா, இன்னைக்கும் உங்க மாநிலத்துக்காரங்க, தமிழ்நாட்டுக்கு, விசா இல்லாம, சிங்கப்பூர் போற மாதிரி நெனச்சு, வந்து வேல செஞ்சு நல்லா சம்பாரிச்சு வளமா இருக்காங்க. அவங்களும் இலவசத்தை வாங்கிக்கிறாங்க.'
'உங்களால பொருளாதார முன்னேற்றத்துக்கு எதுவும் பண்ண முடியல. வக்கணையா வந்து நாங்க பண்றத கிண்டல் பண்ண மட்டும் தெரியுது.'
'நாங்க எதுக்கு நீங்க சொல்றத கேக்கணும்?' - தமிழக நிதி மந்திரி வடநாட்டு டி வி நேரடி வாக்குவாதத்தில் கேட்டதின் சாராம்சம்தான் இது.
கடல் நீரில் உப்பிருக்கு. மக்களால் உப்பை கடலில் இருந்து எடுத்து உபயோகிக்க முடியாது. அரசு, கதிரவனைப்போல் கடல் நீரை வற்ற செய்து உப்பாக்கி அதனை இலவசமாக தருகிறது. அதுவே, மக்களின் பொருளாதார மேம்பாட்டிற்கு உதவும் முதலீடாகவும் அமைகிறது. பொருளாதாரம் வளம் பெறுவதால் மீண்டும், மீண்டும் பொருளாதார மறு சுழற்சி நடை பெறுகிறது.
கடல் நீர் உப்பாவதும், உப்பு கடல் நீரில் கரைந்து போவதுமாக, பொருளாதாரம் இலவசமாவதும், இலவசம் பொருளாதாரமாவதுமாக இயற்கையின் சுழற்சி மக்களின் வாழ்வை மேம்படுத்தும்.
