ராஜாதி ராஜா

ராஜாதி ராஜா 

க்ளென் மாக்ஸ்வெல் 

'ஆஸ்திரேலியா பேட்ஸ்மேன் மாதிரி கடைசி ஆள் வரைக்கும் நின்னு அடிச்சாங்க..' 

இது நகைச்சுவைக்காக எழுதப்பட்ட திரை வசனம். 

நேற்று [07-NOV-2023] நடந்த ஒருநாள் உலக கோப்பை போட்டியில், ஆப்கானிஸ்தானுக்கு எதிரே நடந்த போட்டியில், அது நகைச்சுவை அல்ல உண்மை என்று  உலகிற்கு நடத்தி காட்டி விட்டார்கள்.

போட்டியின் ஆரம்பத்தில், வர்ணனையாளர்கள் உட்பட, அரங்கமே ஆப்கானிஸ்தான் பக்கம்தான். சமூக வலைத்தளங்களிலும் அவர்களுக்கு சாதகமான கருத்துக்கள்தான்.

அதிசயமாக எனக்கு மட்டும், ஆஸ்திரேலியா உப்பை சாப்பிடுவதாலோ  என்னவோ, அவர்கள் வெற்றி பெற வேண்டும் என்ற மன ஈர்ப்பு இருந்தது. நூறைத்தாண்டாது என்ற நிலை வந்தபோது கூட, மேலே சொன்ன வசனம் மனதில் வந்து போனது.

ஒவ்வொரு மனிதனுக்கும் மூன்று பொதுவான குணங்கள் உண்டு. சாத்துவீகம், ராஜஸம் மற்றும் தாமஸம். முதல் மற்றும் இறுதி குணங்கள் அனைவரையும் முன்னிலைப்படுத்தினாலும், இடை குணமான ராஜ குணம் மட்டுமே போற்றப்படுகிறது.

ராஜ குணத்திற்கு மட்டுமே போராடும் தன்மை இருக்கிறது. அதற்கு சாதகமாக இருப்பது கன்மேந்திரியங்கள் என்னும் கால்கள், கைகள், வாய், கருவாய் மற்றும் எருவாய்.

ஆஸ்திரேலியாவிற்கு போராட்டம் ஆரம்பித்தவுடன், களமிறங்கிய விளையாட்டு வீரருக்கு,  கால்கள் தள்ளாட ஆரம்பித்து விட்டது. ஏற்கனவே ஒரு விபத்தில் சிக்கியதால் உடல் அவருடைய கட்டுப்பாட்டில் இல்லை. உடலில் உள்ள தசை நார்கள் எல்லாம் முழுக்கதவடைப்பு. உதவிக்கு நின்றது கைகளும் அந்த ராஜ குணம் மட்டுமே.

திருமந்திரம் 245

வேந்தன் உலகை மிகநன்று காப்பது 
வாய்ந்த மனிதர்கள் அவ்வழி யாநிற்பர் 
பேர்ந்திவ் வுலகைப் பிறர்கொள்ளத் தாங்கொள்ளப் 
பாய்ந்த புலியன்ன  பாவம் அகத்தானே.

புலியைப்போல் பாய்ந்து தன் நாட்டின் வெற்றியை தேடித்தந்தது இந்த ராஜ குணம். 

ஆட்டம் இழந்த முதல் ஏழு வீரர்கள் சந்தித்த அதே ஆடுகளம் மற்றும் அதே  பந்து வீச்சாளர்கள். வெற்றியின் விளிம்பில் நின்றிருந்த எதிரணி பந்து வீச்சாளர்களின் வேகம் இன்னும் கொஞ்சம் அதிகமாக வெளிப்பட்டது.

அவனுக்கு வெற்றி, தோல்வி பற்றி சிந்திக்க நேரமில்லை. வலியை போக்க வழியுமில்லை. கூட ஆடும் வீரரின் முழு ஒத்துழைப்பு மட்டுமே  தேவை.

ஒன்றே ஒன்றை  மட்டும் கவனம் கொள்ள வேண்டி இருந்தது. இது நாள் வரை பயிற்சி செய்த ஆட்டத்தை மட்டும் ஆடினால் போதுமானது. ஓட்டத்தை ஓடி எடுக்க முடியாது. நூற்றி முப்பது கிலோமீட்டர் வேகத்தில் வரும் பந்தை, உடலை வளைத்தோ, குனிந்தோ அடிக்கவும்  முடியாது. தலைக்கவசம் கூட பாரமே. அதையும் கழற்றி  வைத்தாயிற்று. 

பந்தை கணிக்க வேண்டியது, எல்லைக்கோ, எல்லை தாண்டியோ அடிக்க வேண்டியது மட்டுமே முடியும். அதாவது நான்கு அல்லது  ஆறு ஓட்டங்கள் மட்டும் அடிக்க  முடியும். 

சாதனையாளர்கள் பயிற்சியினால் மட்டும் இதை சாத்தியப்படுத்துகிறார்கள் என்று சொல்வது அறிவீனம். இவ்வளவு இக்கட்டான சூழலில் அவர்களின் உண்மை  அறிவு அபரிமிதமாக செயல்பட ஆரம்பிக்கும்.

திருக்குறள் 373

நுண்ணிய நூல்பல கற்பினும் மற்றுந்தன் 
உண்மை யறிவே மிகும்.

காந்தாரா திரைப்படத்தில் இறுதியில் கதாநாயகனின் சண்டைக்காட்சியும், தேவராட்டமும் எளிதில் மறக்க கூடியதல்ல. அதற்கு ஒரு படி மேலே சென்று, நேற்று  ஆடிய ஆட்டம், கிரிக்கெட் வரலாற்றில்  ஒரு ஆழிப்பேரலை.

ஆட்டத்தை பார்த்துக்கொண்டிருந்த ஒவ்வொருவருக்கும் மயிர்க்கால் சிலிர்த்திருக்கும் என்பதில் எந்த சந்தேகமும் இல்லை. எதிரணி வீரர்கள் இத்தகைய ஆட்டத்தின் அங்கமாக இருந்தோம் என்பதே பெரும் பெருமையாக கொள்வார்கள்.

எது எப்படியோ, விளையாட்டில் ஆர்வம் கொண்டு பயிற்சி செய்யும் இளைய சமுதாயத்திற்கு இந்த  ஒரு நாள் ஆட்டம் நல்ல தூண்டுகோலாக அமையும் என்பதில் எந்த மாறுபட்ட கருத்தும் இருக்காது.

*** *** ***

நாட்டாமை தீர்ப்பை மாத்தி சொல்லு - LGBT

நாட்டாமை தீர்ப்பை மாத்தி சொல்லு - LGBT

பெண்ணொரு பெண்ணைப் புணர்ந்திடும் பேதைமை                                                                                                                                                                               - திருமந்திரம் 

'அந்தக்காலத்திலேயே இப்படியா?'

'ஆணோடு ஆண் புணர்ந்தால் மட்டும் மேதமையோ ? சாமி சரணம் !'

முகநூலில் ஒருவர் 'பெண்ணோடு பெண் புணரும் பேதைமை..! - திருமந்திரம்'  எனப்பதிவிட, படித்தவர்களின்  கருத்துகள்.  இன்னும் பலவிதமான  கருத்துகள், அவரவர் அறிவு நிலைக்கேற்ப.

ஆணவம்

உள்ளதொன்றை உள்ளதென்று உணரா மனம். 

உறக்கத்தில் தன்னைச்  சுற்றி உள்ள எதையும், தன்னையும்  மனம் உணர்வதில்லை.

பகுத்தறிவுவாதிகள் உறக்கத்தில், ஆணவ நிலையில் உள்ளவர்கள்.

அகங்காரம் 

உள்ளதொன்றை உள்ளவாறு அறியா மனம்.

கண்டு, கற்று, கேட்டு, ஆராய்ந்து  ஒன்றை முழுமையாக அறியாமல், தானும் மயக்க நிலையில் வாழ்ந்து, மற்றவரையும்  மயக்க நிலையில் வழி நடத்துவது.

ஆன்மீகவாதிகள் தானும் மயங்கி தன்னை சார்ந்தவர்களையும் மயக்க நிலைக்கு தள்ளும் அகங்கார மாயையில் வாழ்பவர்கள்.

இவ்வாறான ஆணவம் மற்றும் அகங்காரம் மிக்கவர்கள் இடையேதான் சகலரும் வாழ்ந்து கொண்டிருக்கிறோம், உண்மை நிலை உணராமல்.

திருமந்திரம்-1159

பெண்ணொரு பெண்ணைப் புணர்ந்திடும் பேதைமை 
பெண்ணிடை யாணும் பிறந்து கிடந்தது 
பெண்ணுடை யாணென் பிறப்பறிந் தீர்க்கின்ற 
பெண்ணுடை யாணிடைப் பேச்சற்ற வாறே.

பெண்ணாக பிறந்திருந்தாலும் அவள் உடலின் உணர்வில்  குறித்த அளவு ஆண் தன்மையும்  இருக்கிறது.  பெண்ணாக பிறந்து ஆண் தன்மை அதிகம் உள்ள பிறப்பினை அறிந்து, தன்னை ஈர்க்கின்ற பெண்ணை அடைகின்றபோது அவர்கள் உறவில் முழுமையடைகிறார்கள். எனவே, பெண்ணோடு பெண் உறவு என்று பேசுவது அறிவீனம் ஆகும்.

அறிவியலும் ஆய்ந்து அறுதியிட்டு சொல்ல முடியாத தீர்வை நான்கு வரிகளில், போகிற போக்கில் சொல்லிவிட்டு போகிறார் திருமூலர்.

சரி, LGBT என்றால் என்ன?

L  -  Lesbian [பெண்ணொரு பெண்ணுடன் உறவில் இருப்பது]

G - Gay [ஆணொரு ஆணிடம் உறவில் இருப்பது] 

B - Bisexual [ஆண், பெண் இருவரிடமும் உறவில் இருப்பது] 

T - Transgender [ஆண்மையும், பெண்மையும் திரிபுற்ற உடலில் இருப்பது] 

'LGBT உறவில் இருப்பது சட்டத்திற்கு சம்மதமே. அவர்கள் திருமண உறவில் இருப்பது சட்டத்திற்கு ஏற்புடையதல்ல.' - இது சமீபத்திய இந்திய உச்ச நீதிமன்றத்தின் வழிகாட்டுதல்.

வழக்கை LGBT பாலார் சார்பில் வாதாடிய வழக்கறிஞர் மட்டும் இந்த திருமந்திரப் பாடலை சொல்லி, நீதியரசருக்கு விளங்க வைத்திருந்தால், தீர்ப்பு வேறு மாதிரி வந்திருக்கும்.

இன்னும், அவகாசம் இருக்கு. பாடலை எடுத்துரைத்து, நீதி மன்றத்தின்  அகங்காரத்தை அகற்றினால்,  'நாட்டாமை தீர்ப்பை மாத்தி சொல்லு'  என்று கேட்கலாம்.

*** *** ***

பழுத்தாலும் பிஞ்சு

பழுத்தாலும்  பிஞ்சு   

வயது ஏறிக்கொண்டே போகுது. உடலும் ஒத்துழைக்க மறுக்குது. இத்தனை வருடங்கள் என்ன செய்து கொண்டிருந்தோம்னு நெனச்சு பாத்தா சொல்லிக்கிற மாதிரி ஒண்ணும்  இல்ல.

ஒரு நிலைக்குமேல் உடலின் வளர்ச்சி முடிந்து தேய்பிறையாகி விட்டது. அறிவு வளர்ச்சி என்னவோ அப்படியே நின்று விட்டது. உள்ளமும் அப்படியே உறைந்துவிட்டது.

'எவ்வளவு தடவ சொன்னாலும், தாத்தாவிற்கு வாட்சப்ல மெசேஜ் அனுப்ப வராது' - என் காது படவே பேரன், பேத்திகள் சொல்லி சிரிக்கிறார்கள்.

யோசிக்க, யோசிக்க ஒன்று மட்டும் தெளிவாக தெரியுது. நான் இதுவரை செய்த காரியங்களில் பாதிக்குமேல் அறிவற்ற செயல்களே. இதையே யாராவது, 'நானொரு முட்டாள்' என்று  சொல்லி இருந்தால் அவர்கள்மேல் பாய்ந்திருப்பேன் அன்றைக்கு. ஆனால், இன்றைய நிலையோ யாரும் நமக்கு சொல்லி வழிகாட்டவில்லையே என்றே  மனம்  நினைக்குது.

குறைந்தபட்சம் படிப்பு என்று ஆரம்பித்த காலத்தில், 'அ' என்று அகரத்தில் ஆரம்பித்த தமிழையாவது ஒழுங்காக காற்றேனா என்றால் அதுவுமில்லை. தமிழ் ஐயா இலக்கணம் சொல்லி தரும்போது கொஞ்சம்கூட மண்டையில் ஏறவில்லை.

பரீட்சையில் செய்யுள் எழுதும்போது, காற்புள்ளி, அரைப்புள்ளி எல்லாம் சரியா வைக்கணும். இல்லைனா மதிப்பெண் கொறஞ்சிரும்னு சொன்னது பெரிய காரியமா தெரிஞ்சது. 

'தமிழ்தானே, படிக்காமல் பரீட்சை எழுதலாம்னு நெனச்சா பெயில் ஆயிருவீங்க' - தமிழாசிரியரின் அறிவுரை எல்லாம் காற்றில் பறக்க விட்டாச்சு. தட்டுத்தடுமாறி பாஸ் மார்க் வாங்கி படிப்பையும் முடிச்சாச்சு.

சரியாக கற்றிருந்தால், தமிழில் உள்ள பொக்கிஷங்களை என்றோ கண்டடைந்திருக்கலாம். அறிவியல் இன்னும் காண முடியாத உண்மைகளை அக்கு வேறு, ஆணி வேறாக பிரித்து வழங்கி இருக்கும் தமிழ் பாடல்களை வாழ்க்கை முறையாக கொண்டிருந்திருக்கலாம்.

தமிழ் கற்க ஆரம்பித்தேன், அறுபதை தொட்ட நிலையில்.

திருமந்திர மாலை. முதல் பந்திலேயே  சிக்ஸர். 

திருமந்திர மாலையின் அடிப்படை  கணிதம் என்று சொல்வதைவிட, எண்ணும், எழுத்தும் பின்னிய எண்ணெழுத்தியல் என்று வேண்டுமானாலும் சொல்லலாம்.

'ப க வ த' என்ற நான்கெழுத்துக்கள்தான்  அடிப்படை. ஐம்பத்தியொரு  அக்ஷரங்களை, எண்களால்  கோர்த்து முன்னூறு பாடல்களில் திருமந்திர மாலையாக தந்திருக்கிறார்  திருமூலர்.  

இதுவே தொடக்கமாக திருமந்திரம் படிக்க ஆரம்பித்தேன். இங்கேதான் உலகக்கோப்பை சதம் அடிக்க ஆரம்பித்தேன்.

வயது என்பது வெறும் எண்தான். மாறா இளமையுடன் முதுமையை எதிர் கொள்ளும் கலையை கண்டறிந்தேன்.

இதோ,  திருமந்திர அமுதக்கடலில் ஒரு துளி.

காற்றினை சுவாசித்து, அதனை வசப்படுத்தி உள்ளே அடக்கினால், உடல் பழுத்து மூப்படைந்தாலும், தோற்றம் பளிங்கினைப்போல்  ஆனாலும்,  பிஞ்சைப்போல் இளமையாக  உடலின் தன்மை   இருக்கும்.

நாம் செய்ய வேண்டியதெல்லாம், நல்ல குருவின் வழிகாட்டுதலுடன் பிராணாயாமம் கற்பதும், முறையாக பயிற்சி செய்வதும்தான்.

திருமந்திரம்-569

வளியினை வாங்கி வயத்தில் அடக்கில் 
பளிங்கொத்துக் காயம் பழுக்கினும் பிஞ்சாம் 
தெளியக் குருவின் திருவருள் பெற்றால் 
வளியினும் வேட்ட அளியனும் ஆமே.

பிராணாயாமத்தின்போது பூரகம் எனப்படும் சுவாசக் காற்றினை உள்ளிழுத்து, கும்பகம் எனப்படும் சுவாசித்த காற்றினை குறிப்பிட்ட கால அளவில் உள்ளே நிறுத்த வேண்டும். இக்கலையில் நன்கு தேறிய குருவின் வழி முறையை பின்பற்றினால், காற்றினும் மெல்லிய உடலை விரும்பிப்பெறலாம். 

வயது ஏற ஏற அங்கங்கள் மூப்படைந்து, உடலே சுமையாகி விடும். அங்கங்கள் மூப்படைந்தாலும் இளமையாகவும், அங்கங்கள் சுமை இல்லாமலும் இருக்க என்னவொரு எளிய தமிழ் காட்டும்  வழி!

*** *** ***

சொர்கமும், நரகமும் நம் வசமே

சொர்கமும், நரகமும் நம் வசமே

சொர்கமும், நரகமும் நம் வசமே

மின்னலிடை வரும் தேனும்பாலும்
கன்னலிதழ் தரும் அந்திவேளை 
கலந்திடும் வெள்ளியும் வியாழத்தில் 
வாழ்த்திடும் திங்களும் செவ்வாயில். 

பொருள்:

மின்னலைப்போல், கண்கள்  கூசும் அழகுடைய உன் இடை, பால் கொடுக்கும் செம்புகளை  சுமந்து கொண்டிருக்கிறது. மேலும் அது தேன் ஊறும் சுனையை  தாங்கி நிற்கிறது. தேனுடன் பால் கலந்து கரும்பு சாறு போல் கொடுக்கும் உன் இதழ்களில் நான் பருகும் மாலை மயங்கும் வேளை அது. உன்னுடன் இணைந்த உறவில், வெள்ளியை  போன்ற வெண்மையான என் உயிரணுக்கள்,  உறவின் உச்சத்தில் உன்னுடைய செம்மையான  சுரோணிதத்தில் கலந்திருக்கும். முழு மதியைப்போல் அழகுடைய பெண்ணே, உறவின் மகிழ்வில் மயங்கி உன்னுடைய சிவந்த வாயில் என்னை வாழிய பல்லாண்டு என்று வாழ்த்துவாய்!

பெண்ணைப்போல் இன்பம் தரும் சொர்கமுமில்லை; பெண்ணைப்போல் துன்பம் தரும் நரகமுமில்லை. 

உடலுக்குள் இரண்டு பறவைகள் உள்ளன. ஒன்று அறியாமையினால் 'இது இன்பம்', 'இது துன்பம்', 'இதை நான் அனுபவிக்கிறேன்' என்னும் ஜீவாத்மா. இன்பம், துன்பம் என்பது  ஆணவ மலத்தின் வெளிப்பாடான கன்ம மலத்தின் கூறுகள்.

மற்றொறு பறவை அதற்கு  சாட்சியாக அமர்ந்துகொண்டிருக்கும் பரமாத்மா. 

எப்பொழுது  ஜீவாத்மா, பரமாத்மாவின் தன்மையை உணர்ந்து அதனை  நெருங்குகிறதோ, அப்பொழுதே அறியாமை அகன்று இன்ப, துன்ப வினை அற்றுவிடும்.

பரமாத்மா, ஜீவாத்மா மற்றும் பற்று என்னும் மூன்றும் ஆதியில் இருந்தவை. இவைகளுக்கு, மற்ற பொருட்கள், உயிர்களைப்போன்று தோற்றம் இல்லை. தோன்றிய எதுவும் மறைந்து விடுவது இயற்கை.

 திருமந்திரம் 115

பதிபசு பாசம் எனப்பகர் மூன்றில் 
பதியைப்போற்  பசு பாசம் அநாதி
பதியினைச் சென்றணு காப்பசு பாசம்
பதியணு கிற்பசு  பாசம்நி லாவே.                                             

உடலில் இருக்கும் பசு, ஜீவாத்மா என்னும் பறவை, பற்றின் இன்ப துன்ப அறியாமையினால் பதியை, பரமாத்மாவை அணுகுவதில்லை. ஒருவேளை, பரமாத்மாவை அணுகினால், ஜீவாத்மாவும், பற்றும் [பாசம்] பரமாத்மாவுடன் கலந்துவிடும்.

உடலில் உயிர் இருக்கும்வரை மூச்சுக்காற்றின் மூலம்  இறைக்கனல் உடலில் பாய்ந்துகொண்டே இருக்கும். இக்கனலே, உயிர்க்கனல் உடலின் சிற்றறைகளில் சேமித்து வைத்த சக்தியை எரிக்க உதவும் நெருப்பு பொறி ஆகும். இறைக்கனலின் தன்மையால் சக்தி எரிக்கப்பட்டு உடல் இயங்குவதற்கான ஆற்றல் கிடைக்கிறது.

திருமந்திரம் 117

சூரிய காந்தமும் சூழ்பஞ்சும் போலவே 
சூரிய காந்தம் சூழ்பஞ்சைச் சுட்டிடா 
சூரியன் சந்நிதியில் சுடுமாறு போல் 
சூரியன் தோற்றமுன் அற்ற மலங்களே.                                                                                  -                                                                                 

குவிக்கப்பட்ட சூரியக்கனல் பஞ்சை எரித்துவிடும். ஆனால், உடலை எப்பொழுதும் சுற்றிவரும்  இறைக்கனல் உடலை எரிப்பதில்லை. [மாறாக உணவில் இருந்து சிற்றறையில் சேமிக்கப்பட்ட சத்தினை எரிக்கும் பொறியாக அமைகிறது.] இவ்விறைக்கனலின் தன்மையை உணர்ந்து கொண்டவர்களின் ஆணவம், கன்மம், மாயை என்னும் மும்மலங்கள், சூரியக்கனல்  குவியலின்  முன்னர் இருக்கும்  பஞ்சு எரிவதுபோல் எரிந்துவிடும்.

மேற்குறிப்பிட்ட இரு திருமந்திரப் பாடல்களிலும் ஒரு ஒற்றுமையை காணலாம்.

பதியணு கிற்பசு  பாசம்நி லாவே.  

சூரியன் தோற்றமுன் அற்ற மலங்களே.

முதல் பாடலில் ஜீவாத்மா பற்று நீங்கி பரமாத்மாவை  சேருதல். இரண்டாவது பாடல் பரமாத்மா முன்னர் மும்மலங்கள் அழிந்துவிடும்.

மும்மலங்கள் மறைந்த நிலையில், இன்ப துன்ப நிலை அகன்று, பேரின்ப நிலைக்குள் பரமாத்மாவுடன் ஜீவாத்மா கலந்துவிடும்.

*** *** ***

கடமை

கடமை 

போய் விட்டால்?

ஊரில் அனைவரும் சேர்ந்து  சத்தம் போட்டு அழுவார்கள்.

பெயரை நீக்குவார்கள். பிணம் என்று புதுப்பெயர் சூட்டுவார்கள். 

சுடுகாட்டிற்கு எடுத்து சென்று எரியூட்டுவார்கள். 

தண்ணீரில் மூழ்கி இறந்தவனின் நினைவுகளை மறந்து  விடுவார்கள்.

திருமந்திரம்-145

ஊரெல்லாம் கூடி ஒலிக்க அழுதிட்டுப்  
பேரினை  நீக்கிப்  பிணம் என்று பேரிட்டுச்  
சூரையாம் காட்டிடைக்  கொண்டுபோய்  சுட்டிட்டு 
நீரினில் மூழ்கி நினைப்பு அழிந்தார்களே.

அப்புறம்?

அப்புறமென்ன, அவரவர் வேலைய பாத்துட்டு, அடுத்த வேளை கஞ்சிக்கு அல்லாடுவார்கள்.

அவ்வளவுதான் வாழ்க்கை.

இறந்துவிட்டால், பொத்தி பொத்தி வைத்த இந்த உடல் என்னாகும்?

என்னவானால் என்ன?

காக்கை சொந்தம் கொண்டாடும். யாரும் பழித்து பேசினாலும் ஆகப்போவது  ஒன்றுமில்லை.

இறந்தவனின் வாயில்  பால்  ஊற்றினால் என்ன? பழகியவர்கள் புகழ்ந்து பேசினால்தான்  ஆகப்போவது என்ன?

தோலினாலான இந்த உடல் என்னும் பைக்குள் அமர்ந்து, அனைத்து கர்ம வினைகளையும் செய்யும் அந்த கூத்தன் புறப்பட்டு போன இந்த உடலால்  எந்த பலனும் இல்லை.

திருமந்திரம்-167 

காக்கை கவரில்என் கண்டார் பழிக்கில்என்
பாற்றுழிப்  பெய்யில்என்  பல்லோர் பழிச்சில்என்
தோற்பையுள்  நின்று தொழிலறச்  செய்தூட்டும் 
கூத்தன் புறப்பட்டுப்  போனஇக் கூட்டையே. 

இதுதான் வாழ்க்கை. இதற்கு மேல் ஒன்றுமில்லை.

நமக்கு முன்னர் வாழ்ந்தவர்கள், இதே மனநிலையில் இருந்திருந்தால் இன்றும் நாம் காட்டுமிராண்டிகளாகத்தான் வாழ வேண்டி இருந்திருக்கும்.

ஆனால், உண்மை நிலை அப்படி இல்லையே? நம் பெற்றோர்களின் காலத்திற்கும் நாம் வாழும் வாழ்க்கைக்கும், வாழ்க்கைத் தரத்தில்  எவ்வளவு வித்தியாசம் இருக்கிறது? 

ஒவ்வொரு துறையிலும் மனித இனம் முன்னேறிக்கொண்டே இருப்பதன் ரகசியம் என்ன?

இரண்டு முக்கிய கூறுகள். 

1. தன் பிறப்பின் பொருளுணர்ந்து வாழ்க்கையை  மனித இன மேம்பாட்டிற்காக அர்ப்பணிப்பு. 

2.  தான் உண்மை என அனுபவத்தில்  உணர்ந்து, கொண்டாடுவதை  அடுத்த தலைமுறைக்கு கடத்தி செல்லுதல்.

முதல் கூறு சித்தர்கள், ஞானிகள்  போன்றவர்களுக்கு சாத்தியமாகி இருக்கிறது.

இரண்டாவது கூறு நம்மைப்போன்ற சாதாரண மக்களுக்கு. இதுவே நம் வாழ்வின் கடமை.

*** *** ***

இந்த நாளும் நமதே

இந்த நாளும் நமதே 

கரு உருவான நிலையில், அதன்  முதல் சிற்றறையில், பருப்பொருளான உடலும், சூக்குமப்பொருளான உயிரும் கலந்திருக்கிறது. கரு வளர வளர அனைத்து சிற்றறைகளிலும் இந்த விதி தொடர்கிறது. மண்ணில் பருப்பொருளான உடலின் செயல்கள் அனைத்துக்கும் மௌன சாட்சியாக உயிர் துணை போகிறது.

உயிர் ஏன் உடலை விட்டு பிரிய வேண்டும்?

மூன்று முக்கிய நிகழ்வுகளில் உயிர் உடலை விட்டு நீங்குகிறது. உயிர் உடலெங்கும் பரவி நிற்க தேவையான சக்தியில்லாத போது உடலை விட்டு நீங்குகிறது.

1. வயது மூப்பு மற்றும் நோய் வாய்ப்படுதல் 

2. அளவுக்கதிகமாக உடல் சக்தியை உபயோகப்படுத்துதல் 

3. மனதின் கிளர்ச்சியால் தொடர் எண்ண அலைகளை உருவாக்குதல்  

மூப்பும், நோயும் மனிதனால் தவிர்க்க முடியாதது. உடல் பயிற்சி என்ற பெயரில் எல்லை மீறிய உடல் ஆற்றல் வெளியேற்றம் அல்லது காமத்தீயில் உடலின் ஆற்றல் வெளியேற்றம். சரியான அளவில் உடல்  பயிற்சி, உறவு மூலம் இதை சரி செய்து கொள்ளலாம்.

மூன்றாவது காரணம் மிகவும் சூக்குமமானது. இந்த வினாடியில் நாம் செய்து கொண்டிருக்கும் செயலும், சிந்தனையும்  கூட எண்ண அலைகளை உயிருக்கு அனுப்பிக்கொண்டிருக்கிறது. இந்த எண்ண அலைகளின் ஆதிக்கம் என்னவென்று கண்கூடாக தெரியாது. எண்ண அலைகளுக்கும் இதயத்திற்கும் நெருங்கிய தொடர்பு இருக்கிறது.

எண்ணங்களை உருவாக்கும் நெஞ்சம் எங்கிருக்கிறது? எப்படி இருக்கிறது?

இதயம் இருக்கும் இடத்தை நெஞ்சம் என்று கூறுகிறோம். இதனையே ஆறாதார சக்கரங்களில், அநாகத சக்கரம் உள்ள இடமாக சித்தர்கள் சுட்டிக்காட்டியுள்ளார்கள்.

நெஞ்சத்தின் தன்மைகளை அகத்தியர் கூறுவதை கேளுங்கள்.

அகத்தியரின் சௌமிய சாகரம் 32

கேளப்பா புலத்தியமா ரிஷியேஐயா
கிருபையுள்ள கரணம் அந்தக்கரணந் தன்னை
கோளடா  இல்லாத மனம் தானொன்று
கூர்மையுடன் நின்றிலங்கும் புத்தி ஒன்று
தேரடா ஆங்காரம் ஆனதொன்று
சிவ சிவா சுத்த மென்ற சித்தமொன்று
ஆளடா கரணமென்ற கரணம் நான்கும்
அப்பனே அறிந்துகொண்டு வாற்றுமம் பாரே.                                       

உயிரோடு கலந்த சக்தி, மாயா  நிலையில் இயங்கும்  உடல்,  இரண்டுமே  உணர்வுகளை  மனதுக்கு  அனுப்புகிறது. மனதிற்கு என்று தனிப்பட்ட எந்த கோளும் அதாவது புலனுறுப்பும்  இல்லை. ஐம்புலன்கள்  வழங்கும்  அனைத்து செய்திகளும் மனதின் மூலம் எண்ணங்களாக வியாபிக்கிறது. இந்த எண்ணங்களே உயிரை ஆராதிக்கவும், அலைக்கழிக்கவும் செய்கிறது.

சமீபத்தில் ஒரு துர்மரண செய்தி ஒன்று அறிந்தேன். இறந்தவர் நல்ல உடல் நிலையில் உள்ளவர். ஒரு நாள் மாலை, சற்று மயக்கமாக வருகிறதென்று மருத்துவமனைக்கு சென்றிருக்கிறார்.

மருத்துவர் அவரை பரிசோதித்துவிட்டு, 'நல்ல வேளை. ஆரம்ப நிலையிலேயே வந்து விட்டீர்கள். குணப்படுத்திவிடலாம், ரொம்ப மைல்டு ஸ்ட்ரோக்'தான். 

'இந்த டெஸ்ட் எல்லாம் எடுத்துட்டு வாங்க ட்ரீட்மெண்ட் ஆரம்பிக்கலாம்' - என்று ஒரு லிஸ்ட்டை டாக்டர் அவரிடம் கொடுத்திருக்கிறார்.

எப்படியோ தட்டு தடுமாறி, போன பைக்கிலேயே  வீட்டுக்கு திரும்பி வந்திருக்கிறார்.

அவரால் நம்ப முடியவில்லை தனக்கு வந்தது ஹார்ட் அட்டாக் என்று. கண்டிப்பாக இரண்டாவதாக ஸ்ட்ரோக் வரும். வந்தால் கதை முடிந்தது, என்ற பயத்தில் தூங்க முடியாமல் தவித்திருக்கிறார். 

எது நடக்கக்கூடாது என்று விரும்பினாரோ அது நடந்து விடும் என்று தீவிரமாக நம்ப ஆரம்பித்து, அந்த  எண்ண அலைகளை  தொடர்ந்து உயிருக்கு அனுப்ப, விடிவதற்குள் எல்லாம் முடிந்து விட்டது.

காற்றால் கட்டப்பட்டிருந்த உயிர், எண்ண அலைகளால்  விடுவிக்கப்பட்டுவிட்டது.

உடலில் இரண்டறக்கலந்துள்ள உயிர் எவ்வளவு நாள் இருக்கும்,  கலந்த உயிருடன் காலம் அறியில், என்று அறிய விரும்பினால், காற்றின் அழுத்தமான முடிச்சே,   

கலந்த உயிரது  காலின் நெருக்கம், முடிவு சொல்லும். நல்ல தீர்க்கமான முடிச்சு போட்டு விட்டால், கலந்த உயிரது காலுடன் கட்டில்,  நீண்ட நாட்கள் உடலை விட்டு உயிர் விலகாது, கலந்த உயிருடன் காலமும் நிற்குமே.

திருமந்திரம்-592

கலந்த உயிருடன் காலம் அறியில் 
கலந்த உயிரது  காலின் நெருக்கம் 
கலந்த உயிரது காலுடன் கட்டில் 
கலந்த உயிருடன் காலமும் நிற்குமே.

எண்ண அலைகளை கட்டுப்படுத்துவதில் இருக்கிறது, உடலுடன் ஒட்டியுள்ள உயிரின் முடிச்சு. ஆரோக்கியமான அறம் சார்ந்த எண்ணங்களை மனதில் வளர்த்துக்கொள்வதன் மூலம் மனதை ஒரு முகப்படுத்தலாம்.

நாளை முதல் அறமிக்க வழிகளில் வாழ்வோம் என்று தீர்மானித்தால், நன்றாக சிந்தித்து பாருங்கள், நாளை என்று ஒன்று வாழ்வில் வரவே வராது. நாளை என்று வருவது எல்லாம் இன்றாக மாறிவிடும்.

*** *** ***

மெய்ப்பொருள் காண்பதறிவு

மெய்ப்பொருள் காண்பதறிவு 

நீட்டு போய் சனாதனம் வந்தது.. டும்.. டும்.. டும்..

' அப்பாடா.. ஒரு வழியா மறந்துட்டாங்க. இனி, இவங்க கவனம் எல்லாம் சனாதனம் மட்டும்தான்.'

'எதையாவது ஒழிக்கணும்னு பேசினா, தன்னால ரெண்டு கூட்டம் சேந்துக்குது.'

'ஆட்சிக்கு வந்தா, நீட் தேர்வை ஒழிப்போம்னு சொன்னது, எவ்வளவு பிரச்னை இழுத்து விட்டுருச்சு. இதுல, ஒழிக்கிற ரகசியம் தெரியும்னு சொல்லி வழிஞ்சது வேற. போதும்டா சாமி.'

'தேர இழுத்து தெருவுல உட்டாச்சு. இனி, அவனுங்களே அடிச்சுக்குவாங்க. நம்மள கவனிக்க நேரம் இருக்காது. வேடிக்கை பார்க்கலாம்.'

'இதுல ஒரு சிக்கல் இருக்கு. ஆதரவா ஒரு கோஷ்டி, எதிரா ஒரு கோஷ்டி. யாருங்கடா இவங்கன்னு பாத்தா ரெண்டுமே அரசியல் பண்றவங்க. சாதாரண மக்கள் இதுல வர்றதேயில்ல.'

'ஒண்ணா ஆதரிக்கணும்; இல்ல, எதிர்க்கணும். இந்த நடுநிலை ஆசாமிங்கதான் டேஞ்சர்.'

'சனாதனம் வேணும்னு சொல்லு, இல்ல வேண்டாம்னு சொல்லு. அதென்ன நடுவுல நிக்கிறேன்னு கேட்டா..'

எந்த பொருளானாலும் அதன் உண்மைத்தன்மையை கண்டறிய வேண்டும். அதற்கு தேவை, அறிவு.

மெய்ப்பொருள் காண்பதறிவு. 

அது எந்த அணியிலும் சேராத, நடு நிலை வகிக்கும் சாதாரண மக்களுக்குத்தான் புரியும். நடுநிலை வகிப்போர், சிந்திப்பவர்கள். தங்களின் அறிவினைக் கொண்டு ஆய்வு செய்பவர்கள். 

நடுநிலை வகிப்பவர்கள் ஞானம் உள்ளவர்கள். அவர்களுக்கு நரகம் வாய்க்காது. தேவர்களுடன் சேர்வார்கள். அதனால் நானும் நடுநிலை வகிக்கிறேன்.

திருமந்திரம்-320

நடுவு நின்றார்க்குஅன்றி ஞானமும் இல்லை
நடுவு நின்றார்க்கு நரகமும் இல்லை 
நடுவு நின்றார்நல்ல தேவரும் ஆவர் 
நடுவு நின்றார்வழி நானும்நின் றேனே. 

நடுவு நிற்பது என்பது சமாதி நிலை. 

இந்த சமாதி நிலை என்பது,  இடைகலை நாடி எனப்படும் இடது நாசி வழியாக சுவாசிக்கும் குளிர்ந்த காற்றும், பிங்கலை நாடி எனப்படும் வலது நாசி வழியாக சுவாசிக்கும் சூடான காற்றும், மூலாதாரத்தில் உள்ள அக்னி நாடியில் சந்தித்து புருவ நடுவில் உள்ள சந்திர மண்டலத்திற்கு எடுத்து சென்று அதன் மீது தியானத்தில், சமாதி நிலையில் லயித்திருப்பது.

இவ்வாறு சமாதி நிலையில் இருப்பவர்கள் ஞானிகளாவர்; சொர்கத்தில் நிலை கொள்வர்; தேவர்களுக்கு இணையாக இருப்பர். எனவே, நானும் அவர்கள் வழியில் நடுவு நிற்கிறேன் என்று திருமூலர் கூறுகிறார்.

ஆனா, நம்ம அறிவு எப்படி இருக்குன்னு பாருங்க.

திருமந்திரம்-871

பாம்பு மதியைத் தினல்உறும் பாம்பது 
தீங்கு கதிரையும் சோதித்து அனலுறும் 
பாம்பு மதியம் பகைதீர்த்து உடன்கொளீ 
நீங்கல்  கொடானே நெடுந்தகை யானே.

மூலாதாரத்திலிருந்து அக்னிநாடியில் எழும் குண்டலினிப் பாம்பு  புருவ நடுவில் இருக்கும் சந்திரனை மறைத்து நிற்கும். மூலாதாரத்தில் இருக்கும் சூரியக் கதிர்களின் வெப்பத்தையும் கொண்டிருக்கும். தியானத்தின் மூலம் குண்டலினியின் இருப்பை புருவ நடுவில் உணர்ந்து கொண்டால், இறைவன் உன்னை விட்டு நீங்க மாட்டான்.

இது மெய்ப்பொருள் அறிய நினைப்போருக்கு கிடைக்கும் ஆன்மீக விளக்கம். 

இதுவே, நம்ம பகுத்தறிவு கூட்டத்திற்கு எப்படி தெரிந்தது தெரியுமா?

'இனிமேல் சந்திரனை பாம்பு விழுங்கி  விடும் என கதை அடிக்க முடியாது' - சந்திரயான் நிலவில் தரை இறங்கியபோது அவர்கள் சொன்ன கருத்து.

திருக்குறள்-423

எப்பொருள் யார்யார்வாய்க் கேட்பினும் அப்பொருள் 
மெய்ப்பொருள் காண்பது  அறிவு. 

'சனாதனம் இருக்குன்னு நீ சொல்றே. இல்லன்னு அவன் சொல்றான்.  சனாதனம்னு ஒண்ணு  இருந்தா நல்லா இருக்கும்ன்னு  நான்  சொல்றேன்.'

இன்றைய சூழலில், சனாதனம்னு ஒன்று இருப்பதாகவே யாருக்கும் தெரியாது. அது தானாக வேறு தளத்திற்கு மாறிவிட்டது. அதைத்தேடி கண்டு பிடித்து ஒழிப்பது என்பது, கொசுவைத்  தேடி கண்டுபிடித்து, குடும்பக்கட்டுப்பாடு அறுவை சிகிச்சை செய்து, ஒழிப்பது போல்தான்.  

நீட் ஒழிப்பு என்ற ஒன்றை மறைக்க, சனாதனம் என்ற இன்னொன்றை இழுத்துவிட்டு  அரசியலாக்கிவிட்டார்கள்.

*** *** ***