பூஜ்யத்திற்குள்ளே ராஜ்யம்

பூஜ்யத்திற்குள்ளே  ராஜ்யம் 

வெள்ளியங்கிரி மலை

'கொஞ்ச அடக்கி வாசிங்க. இதுவரைக்கும் போயிட்டு வந்தது போதும்.' - இல்லத்தரசியிடம் போட்ட விண்ணப்பம் முதலில் ரிஜெக்டட்.

'பத்திரமா போயிட்டு வா, அப்பா.' - இளவரசியின் அப்ரூவல்.

எப்படியோ 'அப்படி இப்படி' சொல்லி ஹோம் மினிஸ்டர் கிட்டயும் பெர்மிஷன் வாங்கி இந்த முறையும் வெற்றிகரமாக வெள்ளியங்கிரி மலை போயிட்டு வந்தாச்சு.

ஏப்ரல் 6-ம் தேதி, பங்குனி பௌர்ணமிக்கு  மறுநாள், மாலை ஏழு மணிக்கு துவங்கிய பயணம் அடுத்தநாள் நண்பகல் பன்னிரண்டு மணிக்கு நிறைவு பெற்றது. நான்-ஸ்டாப் பதினேழு மணி நேர மராத்தான் மலையேற்றம்.

'மலை ஏறிட்டு வந்துட்டேன்டா.. இதுதான் கடைசி. இனிமேல் ஏற மாட்டேன்.'

'நீ இப்படித்தான் போன முறையும் சொன்னே.' - தம்பியின் பதில்.

மழையில் சிக்கிய மலைப்பாதை, கொஞ்ச நஞ்சம் இருந்த மண்ணையும் அரிப்பில்  விட்டுவிட்டு  வெறும் கற்குவியல்களாக கிடக்கிறது. ஆறாவது மலை மட்டும் கொஞ்சம் நடக்கிறமாதிரி பாதை. மற்றதெல்லாம் கற்குவியல்கள். கைகளும், கால்களுடன் சேர்ந்து தவழ்ந்து செல்ல வேண்டியதுதான். 

புனிதமான மலை. வெறுங்காலில்தான் ஏறவேண்டும் என்ற கொள்கையெல்லாம் இங்கே செல்லுபடியாகாது. ஏழாவது மலையில் இறைவனை தரிசிக்கும்போதுகூட கால்செருப்பு ஒரு தடையில்லை. கூடவே முடிஞ்சா knee cap போட்டுக்கணும்.

'குமாரு, இன்னும் கொஞ்ச தூரம்தான் வெள்ளை விநாயகர் வந்துரும். அதுக்கப்புறம் ப்ளைன்ஸ். சைக்கிள் ஓட்டலாம்னா பாத்துக்கோயேன்' - முதல் முறை மலை ஏறும் நண்பன் கேட்ட 'இன்னும் எவ்வளவு ஏறணும்?' என்ற கேள்விக்கு பதில் சொன்னான்  நண்பன்.

அவர்கள் நின்றிருந்த இடமோ  முதல் மலையில் அரை மலை கூட தேறாது.

'இப்படி  சொல்லித்தாண்டா போன வருஷம் என்னயும்  கூட்டிட்டு போனாங்க. இந்த வருஷமும் வர்றேன்னா பாத்துக்கோ. அடுத்த வருஷம் நீயும் வருவே.' - நம்பிக்கையுடன் சொன்னான்.

'அது சரி. ஏன்டா வயிறு புல்லா  சாப்பிட வேண்டாம்னு சொன்னே?'

'சாப்பிட்டிருந்தா.. இந்நேரம் உனக்கு வாந்தி வந்திருக்கும். இல்லே அவசரம்னா  காட்டுக்குள்ளேதான் போகணும். டேஞ்சர். அதான் அளவா திங்க சொன்னேன்.'

'அதல்லாம, வழி முழுக்க தற்காலிக கடைகள் இருக்கு. பசிக்கு தேவையானது கிடைக்கும். சுக்கு காப்பி, கம்மங்கூழ், மூலிகை சூப், ஆரஞ்சு மிட்டாய், தர்ப்பூசணி, மேகி.. இப்படி நிறைய.'

'நல்ல ஆரோக்கியமான உடல் நிலை இருந்தா, மலை ஏற ஆறு மணி நேரம், இறங்க ஆறு மணி நேரம். இதுதான் கணக்கு.' - வனத்துறை காப்பாளர் 'எவ்வளவு நேரம் ஆகும்?' என்று கேட்ட மலையேறிக்கு பதில் சொல்லிக்கொண்டிருந்தார்.

'இங்கே பாருடா.. இப்ப மணி பதினொன்ரை. கொஞ்சம் வேகமா போனோம்னா சாமி கும்பிட்டுட்டு  ஒரு மணிக்கெல்லாம் அடிவாரம் வந்துரலாம்.'  நண்பர்கள்  இப்பொழுதுதான் முதல் முறையாக முதல் மலையே ஏற ஆரம்பித்திருக்கிறார்கள்.

'காந்திபுரம் பஸ் ஒரு மணிக்கு அடிவாரத்துல இருந்து இருக்கு. இங்கிருந்து சுமார் முப்பத்தஞ்சு கிலோமீட்டர் இருக்கும். சீக்கிரம் போய் காஞ்சிபுரம் பஸ் புடிச்சிரலாம்.' - நம்பிக்கையுடன் சொன்னான் நண்பன்.

'நல்ல வேளை. பிரகாஷ் வரல. வந்திருந்தா அவனுக்கு தனியா இருபத்தஞ்சு லிட்டர் தண்ணி கேன் சுமக்கணும்.'

'ஏண்டா தண்ணி சுமக்கணும். ஆளுக்கொரு பாட்டில் இருந்தா போதும்.'

'ரெண்டாவது மலை முடியிற இடத்துல ஒரு சுனை இருக்கு. இன்னும் கொஞ்சம் மேல போன கைதட்டி சுனை இருக்கு. ஆறாவது மலை, ஏழாவது மலையிலும் தண்ணி புடிச்சிக்கலாம்.'

ஈஷா யோகா மையத்தில் ஆதியோகியை  பார்த்துவிட்டு, அப்படியே வெள்ளியங்கிரி மலை ஏற்றம் செய்யலாம்  என்று நிறைய பேர் வருகிறார்கள். 

இளைஞர்களாக இருப்பதால் மூங்கில் குச்சி எடுத்து செல்வதை இளமைக்கு சவாலாக  நினைக்கக்கூடாது. கையில் குச்சி, இரண்டு கால்கள், இரண்டு கைகள் போதாமல் நிறைய இடங்களில் தூக்கிவிட இன்னும் இரண்டு கைகள் தேவைப்படும், நினைவில் கொள்ளுங்கள்.

'சார்.. இந்த முறை நிறைய டோலி சர்வீஸ். மக்கள் கூட்டம் அதிகமாயிருச்சு.'

'போயிருச்சுங்க. கீழ கொண்டு வந்து சேக்கணும்' - டோலி தூக்கிகள்  சொல்லிக்கொண்டே  மலை ஏறினார்கள். 

உடலில் உள்ள அத்தனை நோய்களையும் கண்டறிந்து சொல்லி விடும் இந்த மலை ஏற்றம்; சில சமயங்களில் மோட்சமும் கிடைத்துவிடும். இதற்குமேல் உடலில் சக்தியில்லை என்னும் பட்சத்தில் ஒரே தீர்வு டோலி சேவைதான். உயிர் இறையடி சேர்ந்துவிட்டாலும் டோலிதான்.

'மலை ஏறுவது ஒருவகையில் வைராக்கியம். ஆனால், இறங்குவதற்கு அரசு  ரோப்-கார் வசதி செய்து தரலாம். மலம்புழாவில் பாருங்கள், அருமையாக இருக்கிறது ரோப்-கார் சவாரி. நல்ல கூட்டமும் வரும். அதே சமயம் நல்ல வருமானமும் இருக்கும்.'

இதையும் கவனத்தில் வச்சுக்குங்க.

'ஏறும்போதும், இறங்கும்போதும் புஷ் புஷ்ன்னு மூக்கிலும் வாயிலும் மூச்சு விட வேண்டாம்.'

'முடிஞ்ச அளவுக்கு மூக்கில் மூச்சு விடுங்க.. வாயில் மூச்சு விட்டா தொண்டைக்குழி வரைக்கும் எரிச்சல் எடுக்கும். காப்பிகூட குடிக்க முடியாது'

நண்பரிடம் விளக்கி கொண்டிருந்தார் ஒருவர்.

'அன்னிக்கு ஆறாவது மலையில் நின்னுட்டிருந்தேன். சட சடன்னு மழை. விடாம ஒரு ரெண்டு மணி நேரம்.'

'எங்கேயும் ஒதுங்க முடியாது. ஏழாவது மலை ஏறிக்கொண்டிருந்தவர்களிடமிருந்து ஒரே அலறல் சப்தம். சப்த நாடியும் ஒடுங்கிருச்சு. நெறைய பேர் செத்து போயிட்டாங்க' 

'மழை நின்னதும் என்ன வேகத்தில் கீழே இறங்கினோம்னே தெரியாது. உயிர் பயம்னா என்னன்னு அன்னிக்குத்தான் புரிஞ்சது'

'பாரஸ்ட் டிபார்ட்மென்ட் இந்த மாதிரி சமயத்தில்,  எந்த நிமிஷமும் மலை ஏற்றத்தை நிறுத்திருவாங்க. பாருங்க நெறைய வனத்துறை கேம்ப் போட்டுருக்காங்க.'

'புதுசா மலை ஏற பிளான் பண்றவங்க அனுமதி உண்டா இல்லையான்னு தெரிஞ்சிட்டு வரலாம். அதுக்கு வாட்ஸாப் 70921 44676 நம்பரில் 

கேட்டீங்கன்னா சொல்வாங்க. நானும் கேட்டுட்டுதான் 6-ம் தேதி மலை ஏறினேன்.'

இந்த முறை அடிவாரத்திலிருந்தே வனத்துறை ஆதிக்கம்தான். மேலே பூசாரிகூட வனத்துறை சீருடையில் இருந்தவர்தான் நெற்றியில் திருநீறு பூசிவிட்டு, திருநீறு பாக்கெட் கொடுத்தார். திருநீறு பாக்கெட் உபயம் கோவை, ஸ்ரீ தேவி டெக்ஸ்டைல்ஸ். பாக்கெட்டில் வெள்ளியங்கிரி என்பதை வெள்ளிங்கிரி என்று அச்சடித்திருந்தார்கள்.

'மேல கோயில்ல போய் கொஞ்ச நேரம் படுத்திரலாம்.'

'தம்பீ.. நீங்க நெனைக்கிறமாதிரி கோயில் இல்ல இது. எப்படி இப்ப வரிசையா ஏறிட்டிருக்கோமோ, அப்படியே சாமி இருக்கிற குகை வாசலோட சாமிய  கும்பிட்டுட்டு  கீழே வரிசையா இறங்கிறணும்.'

'படுக்கணும்னா, திறந்த வெளியில்தான் படுக்கணும். புல்லிலோ, பாறையிலோ எங்கே வேணும்னாலும் படுக்கலாம். என்ன கொஞ்சம் பனி இருக்கும், குளிரும்.'

ஏழாவது மலை உச்சியில் நிறைய பக்தர்கள் தூங்கிக்கொண்டிருந்தார்கள். நிறைய பேர் ஸ்வெட்டர், பெட்ஷீட் கொண்டு வந்திருந்தார்கள். அவர்கள் அதிகாலை கேட்கும் டம்று முழக்கத்தையும், சூரியோதய நேரத்தில் இறைவனை தரிசிக்கவும்  காத்திருக்கிறார்கள்.

நான் சொன்னது ஒன்று கூட மிகைப்படுத்தி  சொல்லவில்லை. இனி வரும் சித்ரா பௌர்ணமி நாட்களில், ஏறப்போகிறவர்களுக்கு ஒரு வழிகாட்டியாக இருக்கவே இப்பதிவு.

இது தேவையா?

இவ்வளவு கஷ்டப்பட்டு மலை ஏறத்தான் வேண்டுமா? இறைவன் அங்கே மட்டும்தான் இருக்கிறானா?

கேள்விகள் மனதில் எழுவது இயற்கையே..

கடப்பது கடினம் என்று தெரிந்தே எடுக்கும் முயற்சிகள் வெற்றியுடன் கடந்தபின் கிடைக்கும் திருப்திக்கு எது ஈடு?

அது மட்டுமா?

அடிவாரத்தில் முதல் படிக்கட்டில் கால் வைத்தவுடன் நம்மை பத்திரமாக பயணிக்க வைக்கும் சித்தர் பெருமக்களின் அருமையை வேறு எப்படித்தான் நாம் உணர முடியும்?

நாத வடிவான ஞான தலைவன், ஜோதி வடிவான சக்தி தலைவியை தன்னுள் கொண்டு, பேரின்பத்தை இயக்கமாக உணர்ந்திருக்கிறான். ஐம்புலன்களின் ஆதிக்கத்தை வென்றவன்  ஆறாதாரமாக உடலில் வியாபித்திருக்கிறான். பேரண்டமான ஏழுலகையும் ஆளும் அவன் அனைத்தும் தன்மயமாகி ஏதுமற்றவனாக பூஜ்யமாக  மலை உச்சியில் நிற்கிறான்..  

ஒன்றவன் தானே இரண்டவன் இன்னருள்
நின்றனன் மூன்றினுள் நான் குணர்ந்தான்  ஐந்து 
வென்றனன் ஆறு விரிந்தனன்  ஏழும்பர்ச்  
சென்றனன் தானிருந்தான் உணர்ந்தேட்டே. 

                                                                                - திருமந்திரம் 

உங்கள் வெள்ளியங்கிரி மலைப்பயணம் இனிதே நிறைவேற வாழ்த்துகள்.

*** *** ***

  

தேன் நிலவு

தேன் நிலவு 

 

9 ஏப்ரல் 2023 செய்தி: 

அத்துமீறிய தலாய் லாமா? 8 வயது சிறுவனிடம் சில்மிஷமா? அதுவும் பொது இடத்தில்.. பொங்கிய நெட்டிசன்கள்.

செய்தியை படிக்க எவ்வளவு ஆபாசமாக இருக்கிறது? அதுவும் பொது நிகழ்வில், ஒளிப்பதிவு தொடர்ந்து நடந்து கொண்டிருக்கையில், எப்படி இது சாத்தியம்? இதன் பின்புலம் என்னவாக இருக்கும்? எளிதில் இன்னொரு பாலியல் செய்தி என்று கடந்து போக முடியவில்லை.

எனக்கு திருமணமாகி நான்கைந்து வருடங்கள் கடந்திருக்கும். குழந்தைக்காக கோயில்கள், மருத்துவ மனைகள் என்று அலைந்து கொண்டிருந்த கால கட்டம் அது. மும்பையில் பணியில் இருந்த காலம். பொள்ளாச்சியில் இருந்து வந்த சக தோழர் ஒருவர் கோடி சுவாமிகள் என்ற அற்புத சித்தரைப்  பற்றி கூறினார்.

'எதுக்கும் ஒரு தடவை கோடி சாமியாரை பாத்துட்டு வாங்க. உங்க மாமியார் ஊரும் பொள்ளாச்சி தானே?'

'சில குறிப்பிட்ட நாட்களில் மட்டும் பொது மக்கள் தரிசனம் உண்டு.'

'இளையராஜா மாதம் தோறும் வந்து செல்கிறார்'

சரி, எப்படியும் ஒரு முறை பார்த்து வரலாம் என்று பொள்ளாச்சி சென்றபோது  கிளம்பினோம்.  சுமார் 12 கி.மீ. தொலைவில் உள்ள புரவிபாளையம் சென்றுவர  இந்த் சுசுகி பைக்கே  போதுமானதாக இருந்தது.

நல்ல கூட்டம். மேல்  மாடியில் சுவாமிகள் இருக்கிறார். ஒவ்வொருவராக அவர் பாதத்தை வணங்கி  சென்றார்கள். யாரும்   பேசவில்லை. அவரும் பேசவோ ஆசீர்வதிக்கவோ இல்லை.

அவருக்கு பருப்பு கிச்சடி சாதம் ஊட்டிக்கொண்டிருந்தார்கள். அவர் வாயில் போட்ட சாதத்தை கொடுத்தால் அது  அமிர்தம் போன்றது. வீசி விடாதீர்கள் என்று முதலிலேயே எச்சரித்திருந்தார்கள்.

இதை எப்படி எதிர்கொள்வது என்று தெரியாமல் அவர் பாதங்களை தொட்டு வணங்கினோம். எங்களுக்கு எதுவும் கொடுத்து தர்ம சங்கடத்தில் ஆழ்த்தவில்லை சுவாமிகள்.

அப்பொழுதைக்கு எங்களுக்கு அருவெறுப்பைத் தந்தது அந்த நடைமுறை.

இப்பொழுது திருமந்திரம் படிக்க ஆரம்பித்த பின்னர் அதில் சொல்லப்படும் ஆன்மீக கருத்துக்களை பார்க்கும்போது வியப்பாக இருக்கிறது.

திருமந்திரம் 1949

வற்ற அனலைக்  கொழுவி மறித்தேற்றி 

துற்ற சுழிஅனல் சொருகிச்  சுடர்உற்று 

முற்று  மதியத்து அமுதை முறைமுறை 

செற்று உண்பவரே  சிவயோகி யாரே,  

உடலில் உற்பத்தியாகும் விந்து கீழே  வழிந்தோடச் செய்யாமல் மேல் நோக்கி ஏற்றி, மூலக்கனலில்  வற்றுமாறு  செய்வார்கள். பின்னர் அதனை அக்னி நாடி வழியாக சுழி முனைக்கு  தியானத்தின் மூலம் ஒளிச்சுடராக கொண்டு செல்வார்கள். அவ்வாறு கொண்டு செல்வதனால் அங்கே மதி மண்டலத்தில் அமுதம் ஊற்றெடுக்கும். அவ்வமுதத்தை அண்ணாக்கின் வழியாக செறிவுடன் உண்பவர்கள் சிவ யோகிகள்.

உண்மையான சிவ யோகிகளுக்கு அமிர்தத்தை உண்பது சாத்தியமாகி இருக்கிறது. அவர்கள் அண்ணாக்கில் அமிர்தம் கசிந்து கொண்டிருக்கும் என்பதும் உண்மை என்றாகிறது.

தலாய் லாமாவோ, கோடி சுவாமிகளோ சிவ யோகி  வகையினர்   என்றெனக்கு தெரியாது. அவர்கள் நாக்கில் அமிர்தம் ஊறுமோ என்றும் தெரியாது.

தொடர்ந்து போலிகளையே பார்த்து பழகிப்போன நமக்கு, உண்மைக்கும் வேடத்திற்கும் வித்தியாசம் தெரிவதில்லை என்பது மட்டும் உண்மை. 

*** *** ***

காமமும் நாணும் உயிர் காவும்?

காமமும் நாணும் உயிர் காவும்? 

5 ஏப்ரல் 2023 செய்தி:

பெண்கள் கிளாமராக உடை அணிந்தால்.. சீண்டி விடுவீர்களா? பெயில் வழக்கில் விளாசிய கேரளா ஹைகோர்ட்!

அன்று முதல்  இன்றுவரை இதே கதை. 

காமம்.

இது தீராத நோய். இந்த தீராத நோய் பிறப்பிலிருந்தே வருகிறது. பன்னிரண்டு வயது வரை இல்லாத நோய், மெதுவாக வளர்பிறை போல் வளர்ந்து, வயதான காலத்தில்  தேய்கிறது. சிலருக்கு மனதின் எச்சங்களால் இறுதி மூச்சு வரை இந்நோய் தொடர்கிறது.

'ஒரு நெல் உமியை தூக்கும் வலிமை இருந்தால், அதனை  பெண்ணை சுகிப்பதில்தான் ஆணின் எண்ணம் இருக்கும்'. இது படைப்பின் அதிசயம் அல்லது ரகசியம். மஹாபாரதத்தில் பாண்டுவின் கதையை அறிந்திருப்பீர்கள். 'பெண்ணுடன் கலவியில் ஈடுபட்டால் தலை வெடித்து உயிர் போய்விடும்' - என்ற சாபம் இருப்பது தெரிந்தும் கலவியில் கலந்து இறந்தான் பாண்டு.

மேலே குறிப்பிட்ட இன்றைய செய்தியின் சீண்டல் நாயகனுக்கு வயது 74. அதிலும் ஒரு பெண் தலித் என்று குறிப்பிட்டிருக்கிறார்கள். பெண் என்ற ஒரு தகுதிதான் முக்கியமே தவிர அது தலித் பெண்ணா, பருவம் அடையா சிறு பெண்ணா, கீழ் சாதியா, மேல் சாதியா  என்றெல்லாம் பேதம் பார்ப்பது கிடையாது ஆண்கள்.

ஆன்மீக ரீதியாக இதனை கொஞ்சம் ஆய்வு செய்து பார்ப்போம்.

காமம் என்பது தாயின் வயிற்றில் உயிர் உருவாகிய கணமே உடலுக்கு கிடைத்து விடுகிறது. 

இறைவன் உயிரை படைக்கையில், 

'விண்ணின்று இழிந்து வினைக்கு ஈடாய் மெய்கொண்டு'  வருகிறார்.

ஆகாயத்திலிருந்து வந்ததால் முதலில் வானத்தின் ஐந்து பண்புகளான,

காமம், குரோதம், லோபம், மதம் மற்றும் மாச்சரியம் புது உடலுக்கு கிடைத்துவிடுகிறது.

காமம் இரு பாலாருக்கும் சமம். ஆனால், சிலருக்கு மட்டும் ஏன் காமம் நிலை தடுமாற வைக்கிறது?

இங்கே நாம் இறைவன் ஆதியில்  உலகில் தோன்றியதை  அறிய வேண்டியது அவசியமாகிறது.

'ஒன்றவன் தானே' என்று முதலில் ஒன்றாக தோன்றும்போது நாத வடிவாக தோன்றுகிறான். நாதத்தின் ஒலி ஓம் எனும் ஓங்காரம். இந்த ஓங்காரம் ஞானத்தை குறிக்கிறது.

'இரண்டவன் இன்னருள்' எனும்போது நாதத்தினுள்ளே, சக்தியாக ஒளி  தோன்றுகிறது. இந்த ஒளி கிரியா சக்தியான விந்துவை குறிக்கிறது.

'நின்றனன் மூன்றினுள்' - நாதமும் ஒளியாக நிற்கும் பெருஞ்ஜோதியில், இச்சா சக்தி என்னும் மாயையும் கலந்து நிற்கிறது.

இறையின் அம்சமே மானிடம் என்னும்போது, அவனிடம் இம்மூன்று குணங்களும் இயல்பாகவே அமைந்துவிடுகிறது.

காமத்தின் வீரியத்தை விந்துவும், இச்சா சக்தியுமே தீர்மானிக்கிறது. உடல் இனப்பெருக்கத்திற்கான பருவ நிலை எய்தியவுடன்  வித்தினை விளைவிக்க ஆரம்பிக்கிறது. தொடர்ந்து உற்பத்தி ஆகும் வித்து தானாக கழிவதும் உண்டு; இச்சா சக்தியின் உந்துதலால் தன்முனைப்பில் விரையமாவதும் உண்டு; தகுந்த எதிர் பாலினம் கிடைக்கும் போது இனப்பெருக்கம் நடப்பதும் உண்டு.

திருமந்திரம் 1954

காலம் கடந்தான் காண்விந்து செற்றவன்

காலம் கடந்தழிந்தான்  விந்து செற்றவன் 

காலங்களில்  விந்து செற்றுற்ற காரிகை 

காலின் கண் வந்த  கலப்பறியாரே.

விந்துவை வென்றவன் காலத்தை வென்று நீண்ட காலம் வாழலாம். விந்து வென்றால் விரைவில் அழிவு வந்து சேரும். விந்து வென்று பெண்ணின் இன்பம் அடைவோர், அவளிடம் இருந்து வரும் காம வாயுவானது, தன்னுடைய உயிர் வாயுவில் கலந்து அழிவு நிகழ்வதை அறிந்திருக்க மாட்டார்கள்.

 

காமத்தின்   சமன நிலை தடுமாறும்போதுதான் ஆகாயத்தின் மற்ற நான்கு குணங்களான  குரோதம், லோபம், மதம், மாச்சரியம்  முன் நிற்கின்றன.

விந்து மற்றும் இச்சா சக்தியின் உந்துதலால் அவன் அவளைத்தொட, விருப்பமற்ற அவள் குரோதத்துடன் கேரளா ஹைகோர்ட் வாசலில் நியாயம் தேடுகிறாள்.

 

திருக்குறள் 1163

காமமும் நாணும் உயிர்காவாத் தூங்கும்என்
நோனா உடம்பின் அகத்து.

உடலின் உள்ளே காமமும், நாணமும் பொறுத்துக்கொள்ள முடியாத அளவிற்கு என் உயிரை காவு வாங்கிக்கொண்டிருக்கிறது. 

இனியும் இதை பொறுத்துக்கொள்ள மாட்டேன்.

பொறுத்துக்கொள்ள முடியலன்னா போ. ஏதாவது செய். எங்கேயாவது கை வை. கோர்ட், கேசுன்னு அலை. யார் வேண்டாம்னு சொன்னாங்க?

*** *** ***

நஞ்சுண்பார் கள்ளுண்பவர்

நஞ்சுண்பார் கள்ளுண்பவர்

ஆரம்ப பள்ளியில் மதிய உணவு. 

திருக்குறள் 225

ஆற்றுவார் ஆற்றல் பசிஆற்றல் அப்பசியை 
மாற்றுவார் ஆற்றலின் பின்.

[தவம் இயற்றுவோர் பசியை தாங்கும் வலிமை வாய்ந்தவர்கள். அவரினும் மேன்மை வாய்ந்தவர்கள் உணவை வழங்கி சாதாரண மக்களின் பசியை ஆற்ற  வல்லவர்கள்.]

தட்டில் மதிய உணவு போட்டவுடன் சொல்லும் திருக்குறள்.  திருக்குறளை கோரஸாக  சொல்லிவிட்டு தட்டை ஆவலுடன்  பார்க்கிறான்  ஐந்தாம் வகுப்பு படிக்கும் மாரியப்பன்.

ஒரு கரண்டி மக்காசோள உப்புமா. கூடவே கொஞ்சம் பருப்பு நீர்.  கொஞ்சம் தாளித்த  தயிர்.

உப்புமாவில் கருப்பாக செல் பூச்சிகள், வெள்ளையாக சிறு  புழுக்கள். முடிந்த அளவு பொருக்கி போட்டுவிட்டு சாப்பிட ஆரம்பித்தான். அதுவே காலையில் எதுவும் உண்ணாத வயிறுக்கு சுகமாக இருந்தது.

மதிய உணவில் வழங்கும்  மக்காசோளமும், ஓட்ஸ் மற்றும் சமையல் எண்ணெய் கூட  உலக நாடுகளின் தானம். உணவு தானியங்கள் பல மாதங்கள் பயணித்து இந்தியா வந்து சேர்ந்து, கடைநிலை குழந்தைக்கு போய் சேருமுன் உண்பதற்கு தகுதியற்ற நிலைக்கு சென்று விடுகிறது.

மாரியப்பனுடன் பிறந்தவர்கள் ஆறுபேர். நெசவு குடும்பம். யாரும் வருமானம் ஈட்டும்        அளவிற்கு வளரவில்லை. மூத்த அண்ணனின் கால்கள் நெசவு குழிக்குள் எட்டியவுடன், படிப்பை நிறுத்தி  நெசவு செய்ய ஆரம்பித்தாயிற்று.

அம்மாவின் கடின உழைப்பில்  சொற்ப வருமானம், மற்றும் அண்ணனின் நெசவில் வரும் வருமானமே  அனைவரின் வயிற்றுக்கு ஆதரவு.  தங்கை ஏழு குழந்தைகளுடன் படும் அவஸ்தையை காண சகிக்காமல் உதவும் பெரியம்மா. கடைசி பையன் கைக்குழந்தை.

பகலில் ஒரு வேளை சாப்பாடு பாதி பேருக்கு. மீதமுள்ளவர்களுக்கு  பள்ளியில் கொடுக்கும் மதிய உணவுதான்.

அப்பாவை பற்றி ஒன்றும் சொல்லவில்லையே..

அது மின்சாரம் வீட்டுக்கு வராத காலம். அம்மாவுக்கு எதிரில் அமர்ந்து மண்ணெண்ணெய் விளக்கு வெளிச்சத்தில் படித்துக்கொண்டிருந்தான் மாரியப்பன். அம்மா நெசவு செய்வதற்கு, ஊடு நூல் ராட்டினத்தில் சுற்றிக்கொண்டிருந்தார்.

கோபமாக வந்த அப்பா, ராட்டினத்தை தாண்டி அம்மாவை எட்டி ஒரு உதை விட்டார்.

'ஏண்டி, அரிசி சோறு செய்யல?'

குடிகார நண்பன் வீட்டிற்கு  வெளியே நின்று கொண்டிருந்தான். 

தேவையான அளவு அரிசி வாங்கி அனைவருக்கும் சமைக்க முடியாது என்பதால் அம்மா கம்பு வாங்கி களி செய்து வைத்திருந்தாள். அதை குடிகார விருந்தாளி நண்பனுக்கு உண்ண கொடுப்பதில் அப்பாவுக்கு  தன்மானப் பிரச்சினை.

அம்மா அப்படியே மயங்கி சாய்ந்து விட்டாள்.

அம்மா அலறிய சப்தத்தை கேட்டு பெரியம்மா ஓடி வந்தார். அப்பாவை அப்படியே பிடித்து இழுத்து வெளியே வீதிக்கு கொண்டு வந்தார்.

அதற்குள், ஊர் முழுக்க வீதியில்  கூடி விட்டது. ரொம்ப சிறிய கிராமம் அது. குடும்ப ரகசியம் என்று எதுவுமே நடக்க சாத்தியமில்லாத சமுதாயம். 

பந்தலில் இருந்து ஒரு மூங்கிலை இழுத்தெடுத்தார் அப்பா. நிலை தடுமாறும் போதையிலும் எப்படி அவரால் பந்தலில் இருந்து மூங்கிலை உருவ முடிந்தது என்று ஆச்சரியம் மாரியப்பனுக்கு.

மூங்கில் குச்சியை ஓங்கி பெரியம்மா தலை மீது அடித்தார். கண் இமைக்கும் நேரத்தில் பெரியம்மா கைகளை உயர்த்தி, பெருவிரல், ஆள்காட்டிவிரலுக்கு நடுவில் பிடித்துக்கொண்டார். பிடித்ததோடு நில்லாமல் மூங்கிலையும் இழுத்து விட்டார்.

நிலை தடுமாறி நின்றவரை ஊரின் இளவட்டங்கள் பிடித்துக்கொண்டது.  இரு கைகளையும் பின்னால் கட்டி புளிய மர வேரோடு சேர்த்து கட்டி விட்டார்கள். 

அப்பாவும்  'விட்டது சனி' என்று குடும்ப பாரத்தை அம்மா மீது சுமத்திவிட்டு பிரிந்து சென்று விட்டார்.

முப்பத்தைந்து வயது நிரம்பாத அம்மாவுக்கு தன்னோடு சேர்த்து எட்டு உயிர்களை காப்பாற்ற வேண்டிய கடமை.

நாட்கள் அப்படியே ஓடிவிடாதே. வறுமை ருத்ர  தாண்டவம்  ஆடியது. 

உண்ண எதுவுமே இல்லாத ஒரு நாளில்.. 'நல்ல தங்காள்'- முடிவெடுக்கிறாள் அம்மா. 

வீட்டில் அங்கே, இங்கே என்று தேடி பார்த்ததில், ஒரு கால் படி அளவு கொள்ளுப்பயர் கிடைத்தது. அதை ஊறவைத்து, ஆட்டாங்கல்லில் போட்டு ஆட்டி, உப்புமா செய்கிறாள் அம்மா.

அம்மா கொடுத்ததை எந்த தயக்கமும் இல்லாமல் சாப்பிட்டுவிட்டு தூங்கி விட்டான் மாரியப்பன்.

அன்றைக்கு அந்த எட்டு உயிர்களை எந்த சக்தி காப்பாற்றியதோ தெரியாது. யாருக்கும் எதுவும் ஆகவில்லை. ஆனால், குடி கெடுக்கும் குடியின் கொடுமையை நன்குணர்ந்தான் மாரியப்பன்.

திருக்குறள்-926

துஞ்சினார் செத்தாரின் வேறல்லர் எஞ்ஞான்றும்
நஞ்சுண்பார் கள்ளுண் பவர்.

குடிப்பவர் குடிப்பது விஷத்தை. இவர்கள் தூங்குபவர்கள், செத்தவர்கள் போன்று எதற்கும் உபயோகமற்றவர்.

அந்த காலகட்டத்தில், கள்ள சாராயம் என்று பட்டை சாராயம் மட்டுமே கிடைத்தது. மதுவிலக்கு பூரண அமலில் இருந்தது. அப்படியும் கிராமங்களில் கள்ள சாராயம் தேவைக்கதிகமாகவே புழக்கத்தில் இருந்தது.

திருமந்திரம் 326

காமமும் கள்ளும் கலதிகட்கே  ஆகும் 
மாமல மும்சம யத்தில் மயல்உறும்
போமதி யாகும் புனிதன் இணைஅடி  
ஓமய ஆனந்தத் தேறல் உணர்வுண்டே.

கேடான எண்ணங்களுடையவர்களின் குணமே காமமும், கள்ளுண்ணும் தன்மையும். சில சமயங்களில் தன்னிலை மறந்த ஆணவம் பிறக்கும். மூளை கெட்டு ஓங்கார  வடிவான  இறைவனின் திருவடிகளை வணங்கி ஆனந்தத்தேனை பருகும் உணர்வு அற்று போகும்.

இன்றைக்கு, அரசே மது விற்பனை செய்கிறது. பெரிய கார்ப்பரேட் கம்பெனிகளுக்கு நிகராக விற்பனை இலக்குகளுடன்.

சூதாட்ட தடை சட்ட அனுமதிக்காக, இறந்தவர்களின் சாம்பலை தமிழக ஆளுநருக்கு அனுப்பும் நூதன போராட்டத்தை கையில் எடுத்திருப்பவர்களுக்கு மாரியப்பனின் வாழ்த்துகள். 

அப்படியே, மாரியப்பன் போன்றோர்களின் இரத்தத்தை எடுத்து தமிழக முதல்வருக்கு அனுப்பும் போராட்டத்தையும் முன்னெடுங்கள். நானும் இரத்தம் வழங்குகிறேன், மாரியப்பன் என்ற முறையில்.

*** *** ***

 

 

ரகசியம் பரம ரகசியம்

ரகசியம் பரம ரகசியம் 

திருமந்திரம் கற்போம் 

ரகசியம் பரம ரகசியம்  
இது நமக்குள்
இருப்பது அவசியம் 

'மண்ணில் உயிர்ப்பெடுத்த மறுகணமே அன்னை மடி அறியும் பரம ரகசியம் யார் சொல்லி தந்தார் கன்றினுக்கு? 

மனிதனாய் பிறந்ததனால், பிறவியின்  திசையறியாமல் தத்தளிக்கும் எனக்கு அருள் செய்வாய்' -  என்று வேண்டி நின்ற எனக்கு, கீழ்க்கண்ட அத்தியாயம் படிக்க உத்திரவு கிடைத்தது.

'முந்தைய, ஜன்மங்களிலுள்ள  நல்வினைகளால் நாம் இவ்வுடம்பைப் பெற்று இருக்கிறோம். பக்தியையும், விடுதலையையும் இவ்வுதவியை கொண்டு பெறுவது தகுதியுடையதாகும். எனவே, எப்போதும் நாம் சோம்பலின்றி இருக்க வேண்டும். நமது குறிக்கோளையும் நோக்கத்தையும் பெறுவதில் நாம் எப்போதும் விழிப்பாய்  இருக்க வேண்டும்.'

                                                                             -  ஸ்ரீ சாய் சத் சரித்திரம் 

 

இந்தப் பிறவி   அச்சம்  எனக்கு மட்டுமல்ல, மண்ணில் மனிதனாய் பிறந்து, தன்னுணர்வு எய்தப்பெற்ற பேரருளாளர்கள் மனதிலும் தோன்றியதில் ஆச்சர்யம் கொண்டேன். 

அன்னை எத்தனை எத்தனை அன்னையோ
அப்பன் எத்தனை எத்தனை அப்பனோ
பெண்டிர்  எத்தனை எத்தனை பெண்டிரோ
பிள்ளை எத்தனை எத்தனை பிள்ளையோ
முன்னை எத்தனை எத்தனை சன்மமோ
மூடனாய் அடியேனும் அறிந்திலேன்
இன்னம் எத்தனை எத்தனை சன்மமோ
என்செய்வேன்கச்சி ஏகம்ப நாதனே.

                                           - பட்டினத்தார் பாடல் 83

இதோ, திருமூலர் மனிதப்பிறவியின்,  பரம ரகசியத்தின் முடிச்சை அவிழ்க்கும் வழியை நமக்கு காட்டுகிறார்.

நான்பெற்ற  இன்பம் பெறுக இவ்வையகம் 

வான்பற்றி நின்ற மறைப்பொருள் சொல்லிடின் 

ஊன்பற்றி நின்ற உணர்வுறு மந்திரம் 

தான் பற்றப்பற்றத் தலைப்படும் தானே.

                                                                  - திருமந்திரம் 85

இலை மறை, காய் மறையாக மறைத்து வைக்கப்பட்டுள்ள விண்ணுலகம்  செல்லும் வழி அறிந்து கொண்டு, நான் அடையும் இன்பத்தை, உங்களுக்கும் சொல்கிறேன் கேளுங்கள் மனிதர்களே!

உடலின் உணர்வுகள் விழிப்பு நிலையில் இருக்க, 'நமக்ஷிவய' எனும் மந்திரத்தை தொடர்ந்து சொல்லி வாருங்கள். தானாகவே உங்கள் பிறப்பின் பரம ரகசியமான வானுலகு செல்லும் மார்க்கத்தை, முக்தியை  அறியத்தலைப்படுவீர்கள்.

உணர்வுறு மந்திரத்தை எப்படி, எவ்வளவு முறை சொல்ல வேண்டும் என்னும் ரகசியத்தையும்   கூறுகிறார்.

சூக்குமம் எண்ணா யிரஞ்செபித் தாலுமேற்

சூக்கும மான வழியிடைக் காணலாம் 

சூக்கும மான வினையைக் கெடுக்கலாம் 

சூக்கும மான சிவனதா னந்தமே. 

                                                        - திருமந்திரம் 909  

இதில் ரகசியம் என்னவென்றால், 'க்ஷிவயநம'  என்னும் மந்திரத்தை விழிப்புணர்வு நிலையில் இருந்து எட்டாயிரம் முறை ஜெபிக்க வேண்டும். அப்படி ஜெபித்தால், ஒன்று,  தலையில்  உள்ள விண்ணுலகம்  செல்லும் ரகசிய வழியைக்காணலாம். இரண்டாவது ரகசியமாக  உன்னைத்தொடர்ந்து வரும் வினைப்பயனை அழித்து விடலாம். மூன்றாவது, உன்னுள் ரகசியமாக ஏகமாக இருக்கும் சிவானந்தத்தை நீயும் பெறலாம்.

முதல் பாடல் விளக்கத்தில் 'நமக்ஷிவய' என்று சொன்னேன். சூக்கும பாடல் விளக்கத்தில்  'க்ஷிவயநம' என்று சொன்னேன் என்று பார்க்கிறீர்களா?

'நமக்ஷிவய' என்பது உடலை மையமாக கொண்ட 'தூல பஞ்சாக்ஷரம்'.

'க்ஷிவயநம' என்பது சூக்கும பஞ்சாக்ஷரம்.

சிவனுடன் ஏகமாகி முக்தியடைய விரும்புபவர்கள் சொல்ல வேண்டிய பஞ்சாக்ஷரம், சூக்கும பஞ்சாக்ஷரம்  'க்ஷிவயநம'.

சூக்கும பஞ்சாக்ஷர மகிமையை சொல்கிறேன் கேளுங்கள்:

ஆணவ மலமும் திரோதமும் நீங்கும் பொருட்டுச் சூக்கும பஞ்சாக்ஷரத்தை ஜெபிக்க வேண்டும். அங்ஙனம் ஜெபித்தலினால் திரோதனா சத்தி மலத்தை நீக்கி அருட்சத்தியாய் மாறி நின்று பிரகாசிக்கும். பின்பு, அவ்வருள் தாரகமாக அதனில் அடங்கி அதுவேயாய்ச் சிவத்தோடு ஏகமாகும். சூக்கும பஞ்சாக்ஷர மகிமை இதுவாம்.

 

நான் ஏன் பிறந்தேன்?

நான் ஏன் பிறந்தேன்? 

திருமந்திரம் கற்போம்  

பாடல் 113

சித்தர் பெருமான் திருமூலர் மலரடி பணிந்து, அவரின்  ஆசிகளுடன் திருமந்திர பாடல்களில் நான் உணர்ந்ததை எழுத முற்படுகிறேன்.

பாடல்:

விண்ணின் றிழிந்து  வினைக்கீடாய் மெய்கொண்டு 
தண்ணின்ற தாளைத் தலைக்காவல் முன்வைத்து
உண்ணின் ருக்கியோ ரொப்பிலா ஆனந்தக் 
கண்ணின்று காட்டிக்  களிம்பு அறுத்தானே.  

                                                                              - திருமந்திரம் 113

மனித உடல் பிறப்பெடுக்கும் முறையை விளக்கும் பாடல் இது. முதலில் விண்ணின் என்ற வார்த்தையின் பொருளைப்பார்ப்போம்.

விண் என்பது ஆகாயம். ஆகாயத்தின் கூறுகள் மனித வாழ்வில் ஐந்து வித உணர்வுகளை கொண்டது.

1. காமம் 

2. குரோதம் 

3. லோபம் 

4. மதம் 

5. மாச்சரியம் 

காமம் என்பது அளவற்ற ஆசை. அது பொன்னாகட்டும், பொருளாகட்டும், பெண்ணாகட்டும், குடும்பமாகட்டும், ஆசை அளவு கடந்தால் அதனை காமம் என்று கூறலாம்.

குரோதம் என்பது மற்றவர்கள் மீது கொள்ளும் கோபம், வெகுண்டெழுதல், பழிவாங்குதல் போன்றவை ஆகும்.

லோபம் என்றால் சுய லாப நோக்கு. தனக்கு, தனக்கு என்று எதையும் ஒதுக்கி வைத்துக்கொள்வது. தன்னால்தான் எதுவும் நடக்கிறது என்றோ, தன்னை விட்டால் யாரும் செய்ய முடியாது என்ற சுயநலத்தன்மை.

மதம் என்பது நன்மையோ, தீமையோ ஒன்றையே குறிக்கோளாய் கொண்டு அதற்காக அலைவது. மதம் பிடித்து அலைகிறான் என்ற பேச்சினை கேட்கிறோமல்லவா.

மாச்சரியம் இது பொறாமை. எனக்கில்லையே, அவனுக்கு மட்டும்  அழகான மனைவி இருக்கிறாளே  என்ற ஆதங்கம். அவளுக்கு எவ்வளவு நீளமான கூந்தல் என்று பெண்கள் பெருமூச்செறிந்ததை பார்த்திருப்பீர்கள்.

இந்த ஆகாயத்தின் கூறுகள்தான் மனிதனின் அடிப்படை தன்மைகள். 

விண்ணின் றிழிந்து

இழிந்து, இந்த வார்த்தையை கவனித்தால், வானத்திலிருந்து வழிந்து என்ற பொருள் தருகிறது. வானத்திலிருந்து குதிக்கவில்லை, மெதுவாக தேன்  வழிவதைப்போல் வழிந்து வருகிறார்.

வினைக்கீடாய்

நீ பல பிறவிகளில் செய்த நல்வினை, தீவினைகளின் பலன்கள். 

ஜக்கி வாசுதேவ் ஒரு நேர்காணல் கேள்வி நேரத்தில் தவித்ததை சொல்லத்தான் வேண்டும்.

'மனிதன் தன்  முதல் பிறப்பில் எப்படி பாவமோ, புண்ணியமோ செய்திருக்க முடியும்? - இது பார்வையாளர் கேட்ட கேள்வி.

'இதை நெறைய பேர்கிட்ட கேட்டுட்டு என்கிட்ட கேக்குறீங்க. நல்ல கேள்வி..' - இப்படியாக மழுப்பல் பதில்தான் ஜக்கியிடம் இருந்து பெற முடிந்தது.

அதற்கான பதில் நம் சித்தர் பெருமானிடம் இருந்து வருவதைப்பாருங்கள்.

'பதியினைப் போல்பசு பாசம் அனாதி'

பதி - ஆதி இறைவன்  [பேரறிவு]

பசு - உயிரணு அல்லது ஜீவன்கள்  [சிற்றறிவு]

பாசம் - தளை அல்லது பற்று  [அறிவிலி]

இம்மூன்று நிலைகளுமே ஆதியில் தோன்றியவை. ஜீவன் ஒவ்வொறு பிறப்பிலும், அதனை  பற்றி நிற்கும் தளைகளால் நல்வினை, தீவினை என்ற செயல்களில் ஈடுபடுகிறது.

புல்லாகி, பூண்டாகி இறுதியில் மனிதனாகும் தன்  முதல் பிறப்பில்  பல்வேறு வினைகளை கடந்து வர வாய்ப்பிருக்கிறது. மீண்டும் மனிதனாக பிறப்பதற்கு எந்த உத்திரவாதமும் கிடையாது.

மெய்கொண்டு 

உன்னுடைய இருவினைப்பயன்களுக்கேற்ப உடலினை கொண்டு வந்து தருகிறான்.

 தண்ணின்ற தாளைத் தலைக்காவல் முன்வைத்து

தன்னுடைய குளிர்ந்த பாதங்களை ஜீவனின்  தலைக்கு காவலாக முதலில் வைக்கிறான்.

நாம் புரிந்து கொள்ள வேண்டிய சங்கதி ஒன்றிங்குண்டு. அதாவது ஒவ்வொரு மனிதனின் தலையின் உச்சியில் இறைவனின் தாள், அதாவது பாதம் இருக்கிறது.

கடவுள் வாழ்த்தில் திருவள்ளுவர்  இறைவனின் திருவடிகளை முழுமையாக போற்றுவதைப்பாருங்கள்:

கற்றதின் முழுப்பயன் -  'நற்றாள் தொழுவது'.

'மலர்மிசை ஏகினான் மாணடி சேர்ந்தார்' - ஆயிரம் மலர்கள் மலரக்கூடிய உச்சந்தலையின் மேல் நிற்கும்  இறைவனின் மாண்புமிக்க தாள்கள்.

'தனக்குவமை இல்லாதான் தாள்சேர்ந்தார்க் கல்லால்' - மனக்கவலை மாற்றும் மருந்து.

'அறவாழி அந்தணன் தாள்சேர்ந்தார்க் கல்லால்' - பிறவிப்பெருங்கடல் நீந்தலரிது.

'தாளை வணங்காத் தலை' - ஜடத்தை போன்று உணர்வற்றவர்கள்.

'இறைவன் அடிசேரா தார்' - பிறவிக்கடல் நீந்தார்.

உண்ணின் ருக்கியோ ரொப்பிலா ஆனந்தக் 
கண்ணின்று காட்டிக்  

ஒப்பற்ற பேரொளியுடன், பேரானந்தத்தையும் ஜீவனின் அகக்கண்களுக்கு காட்டினான் இறைவன்.

களிம்பு அறுத்தானே.

ஜீவனின் முந்தைய பிறவிகளின் நினைவுகளை மனதில் இருந்து அழித்து விட்டான். தன் ஜீவன் அனாதியானது என்றோ, முக்தியடையும் வரை பிறவிச்சுழலில் சிக்கியிருக்கும் என்றோ ஜீவனுக்கு தெரியாமல் மறைந்து நிற்கும்.

பலபிறவிகளில் பெற்ற அறிவு நுண்ணறிவாக ஜீவனின் கருவில் பதிவுகள் இருக்கும். அந்த அறிவின் பதிவினை அந்தக்கரணங்களான மனம், புத்தி, அஹங்காரம் மற்றும் சித்தி என்னும் நான்கு நிலையிலிருந்தும் அகற்றி நிற்பான் இறைவன்.

***  ***  ***

சூது என்ன செய்யும்?

சூது என்ன செய்யும்? 

இது  பொறுப்பதில்லை - தம்பி  
எரிதழல் கொண்டு வா..
கதிரை வைத்திழந்தான்  - அண்ணன் 
கையை எரித்திடுவோம்..

பீமன் வெகுண்டெழுந்தான்.

தருமன் தலை குனிந்தான். தரும தேவதையும் தலை குனிந்தாள். 

அதர்மம் கர்ஜித்தது. 

தகாத வழியில்  துரியோதனன்  பெற்ற வெற்றியால்  பார்வையற்ற தந்தை  திருதராஷ்டிரனின் மனம் மகிழ்ந்தது. குலத்துக்கே குருவான  பீஷ்மர் தன்  கையாலாகாத்தனத்தை எண்ணி வெட்கினான். கவுரவ, பாண்டவ இளவரசர்களுக்கு  அத்தனை கலைகளிலும் பயிற்சி தந்த ஆச்சாரியர்கள் செய்வதறியாது வேதனையில்  மௌன சாட்சியாக நின்றார்கள்.

' துச்சாதனா, பாஞ்சாலியின் ஆடையை அகற்றி  என் தொடையில் அமர்த்து' - துரியோதனின் ஆணையை ஏற்று துகில் உரிந்தான் துச்சாதனன்.

பாஞ்சாலியின் தஞ்சக்குரல் கேட்டு கண்ணன் கை கொடுத்தான்.

'துரியோதனனின் குருதி பூசி கூந்தல் முடிப்பேன்' - சபதமேற்றாள் பாஞ்சாலி.

'என் கதையால் அவன் தொடையை அடித்து குருதி தருவேன்' - கண் சிவந்தான் பீமன்.  

மகாபாரதத்தின் ஆணி வேர் இந்த சூதாட்டம்.

பெண்ணாசை, பிள்ளையாசை மற்றும் பொருளாசை. 

மனிதனை அலைக்கழிக்கும் மூன்று பேராசைகளும் ஒருங்கே இந்த சூதில் அரங்கேறியது.

சூதாட்டத்தில் இறங்கியவர்களுக்கு காமம் கூட இரண்டாம்பட்சம் தான்.

திருமூலரும் தன் பங்கிற்கு சூதின் தீவிரத்தை விளக்குவதை பார்ப்போம்.

பெண்ணை சூது விளையாட்டிற்கு ஒப்பாக கூறுகிறார்.

'சூதொத்த மென்முலையாளும் நற்சூதனும்' - இந்த வரிகளில் கலவியின் போது  பெண்கள் சூதாட்டத்தைப் போன்றவர்கள். அதிலும் பல பாடல்களில் 'ஆயிழையார் ', மெல்லியல் மாதர்' என்று பல விதங்களில் பெண்களை குறிப்பிட்டவர், இந்த பாடலில் மட்டும் மென்முலையாளும் என்று கூறுகிறார். உறவு என்பதே ஒரு சூதாட்டம் போல. அதில் விளையாட்டு மைதானம் பெண் என்றால் சூதாட்டக்கருவி மென்முலைகள் என்கிறார்.

பரியங்க யோகம் மூலம் இறைவனை தலையில் தரிசிக்கலாம். அதிலும் ஒரே நேரத்தில், உறவில் பங்கேற்கும் தலைவனும், தலைவியும் இறைவனை தரிசிக்கும் கலையை விளக்கவே இப்பாடல்.

'போதத்தை உன்னவே போகாது வாயுவும்'  - கலவியின் போது ஆணும், பெண்ணும் புருவ நெற்றியில் நினைவை வைத்து இறைவனை போற்றி நினைக்கவேண்டும். இவ்வாறு செய்வதனால், காம வாயு எனப்படும் அபான வாயுவின் தன்மை  அடங்கி நிற்கும். 

இவ்வாறு காம வாயு அடங்கி நிற்பதனால்,

'மேகத்த வெள்ளியும் மீளும் வியாழத்தில்' - மேகத்தை போன்ற வெண்மையான ஆணின்  விந்து, பெண்ணின் சுரோணிதத்தில் சேராது ஆணின் உடலிலே தங்கி விடும். 

'தாதில் குழைந்து தலை கண்டவாறே' - தங்களுடைய கலவி இன்பத்தில், தலையில் இறைவனை தரிசிப்பார்கள்.

நான் சொல்ல வந்தது சூதின் தீமைகளைப்பற்றி.

இணைய வழி சூதாட்டத்தடை சட்டம்  பற்றி.

இந்திய பாராளுமன்றத்தில் மாநிலங்கள் தங்கள் நிலைப்பாட்டை எடுத்துக்கொள்ளலாம் என்று கூறி விட்டது. 

தமிழ்நாடு அரசு  சட்டம் இயற்றி ஆளுநருக்கு அனுப்பி, இரு முறையும்  ஒப்புதல் பெற முடியவில்லை. இப்பொழுது மூன்றாம் முறைக்கு தயார் ஆகிறார்கள்.

தீங்கென்று தெரிந்தும், எரிதழல் கொண்டுவா, என்று சமூக நீதியாளர்கள், அரசியல்வாதிகள்  பொங்காதது ஏன்? 

உண்மையில் நடந்தது என்ன?

யாருக்கும் தெரியாது. தெரியவும் விட மாட்டார்கள்.

ஏனென்றால், ' அரசியலில், இது சாதாரணமப்பா'.

ஆனால், இது மக்களுக்கு சாதா ரணமப்பா.

*** *** *** 

திருமந்திரம் 826

போதத்தை உன்னவே போகாது வாயுவும்
மேகத்த வெள்ளியும் மீளும் வியாழத்தில்
சூதொத்த மென்முலையாளும் நற்சூதனும்
தாதில் குழைந்து தலை கண்டவாறே.