இறைவன்

இறைவன்
இல்லை
என்போர் இருக்கையிலே
இருப்பவர்கள்
இல்லை என்பார்

காணொளி:
https://au.video.search.yahoo.com/search/video?fr=mcafee&p=koduthathellam+koduthaan+song+youtube#id=4&vid=8413d3219acea79bd7573049f6d26e84&action=click



கொடுத்ததெல்லாம் கொடுத்தான் அவன்
யாருக்காக கொடுத்தான்
ஒருத்தருக்கா கொடுத்தான் இல்லை
ஊருக்காக கொடுத்தான்.

'பாட்ட நிறுத்துங்கப்பா. தலைவர் இப்ப பேசுவார்..'

'வணக்கத்திற்குரிய பெரியோர்களே, தாய்மார்களே, எனதருமை சகோதர, சகோதரிகளே.. சரியான பாட்டுதான் போட்டிருக்காங்க. இன்னைக்கு கொரோனாவ கொடுத்து, மனித இனத்தின் இறுதி அத்தியாயம் போய்கிட்டிருக்கிறதை நாம் பார்த்துக்கொண்டிருக்கிறோம். நம்முடைய நீண்ட நாள் பிரார்த்தனை நிறைவேறுவதை காண மிக ஆனந்தமாக உள்ளது.

ஏதோ  இந்த பூமி தனக்காக மட்டுமே  படைக்கப்பட்டதாக எண்ணி , நம்மை எல்லாம் கால்நடை என்று கிண்டல் பேச்சு பேசிக்கொண்டிருந்த மனிதன் காலே நடக்க முடியாமல் படுத்துக்கிடக்கிறான்.

இந்த அருமையான வேளையில்,  பாரதப்பிரதமருக்கு, நம்முடைய ஆடுகள் இனத்தின் சார்பாக நன்றி தெரிவித்துக்கொள்வோம். இன்று, ஞாயிறு ஒரு நாள் முழு அடைப்பு நடத்துவதன் மூலமாக, லட்சக்கணக்கான நம் இனத்து மக்கள் உயிர் விடுவதை தடுத்திருக்கிறார்.

மனித இனத்தின் அழிவின் பயணத்தில், அவர்கள் படைத்த வேதங்களும், மதங்களும்,கோவில்களும், சிலைகளும், பணமும்  அவர்களே முன் நின்று  அழித்து  சென்று விடுவார்கள். பொன்னும், பொருளும், வீடும், தோட்டமும் இனி இயற்கைக்கு சொந்தமாகிவிடும்.

அணுவினை படைத்து, அணுவினுள்ளும்  உறையும் இறைமை, இருப்பதிலும், இல்லாததிலும் நீக்கமற நிறைந்திருப்பது, அவனது ஆறாவது அறிவுக்கு புலப்படாமலே மனித இனம் அழிவதை நாம் சாட்சிகளாக பார்த்துக்கொண்டிருக்கிறோம்.

மனிதனுக்கு உணவாவதே நம் வாழ்வு என்ற நிலை மாறி, நாமும் இறைவனின் படைப்பில் முழு வாழ்வும் வாழ்வோம்.'

இப்படியாக கொரோனா என்ற கொடிய தோற்று நோய் மனித இனத்தையே வேரோடு, வேரடி மண்ணோடு சாய்த்துவிடும் என்று தெரிந்தோ என்னவோ திருமந்திரம் அதற்கும் ஒரு மருந்தை மனித இனத்துக்கு அளித்து வைத்துள்ளது.

வீர மருந்துஎன்றும் விண்ணோர்  மருந்துஎன்றும்
நாரி மருந்துஎன்றும் நந்தி அருள்செய்தான்
ஆதி மருந்துஎன்று அறிவார் அகலிடம்
சோதி மருந்துஇது சொல்ல ஒண்ணாதே.
                                                                                            - திருமந்திரம் 850

குறிப்பு:
இந்த மருந்தைப்பற்றி  முழுமையாக அறிந்து கொள்ள எண்ணுபவர்கள், திருமந்திரப்பாடல்களில் 845, 846, 847, 848, 849 பாடல்களை படிக்கவும்,

விதை நெல்

எதிரொலி கேட்டான்
வானொலி படைத்தான்..
எதனை கண்டான்
பணம்தனை படைத்தான்..

காணொளி:

https://au.video.search.yahoo.com/search/video?fr=mcafee&p=manithan+maarivittan+youtube+song#id=1&vid=22f6ae9b8cededb39caaad724c48547b&action=view

'ரிசர்வ் பேங்கில் வைப்பில் உள்ள சேமிப்புத்தொகை நாட்டின் விதை நெல். விதை நெல்லை அரசியல் லாபங்களுக்காக பயன்படுத்துவது  நாட்டின் பொருளாதாரத்தை பல முனைகளில் இருந்து பலவீனப்படுத்திவிடும்.....' - பொருளாதார அரசியல் விமர்சகர் தன்னுடைய கருத்தை   அழுத்தமாக  பதிவிட்டுக்கொண்டிருந்தார்.

இதோடல்லாமல், நாட்டின் கனிம வளங்களை விதை நெல்லாக கொள்ளலாம். தங்கமோ, கிரானைட்டோ  அல்லது எண்ணையோ நாட்டின் வளமாக மட்டும் கொள்ளாமல்  அனைத்து பொது மக்களுக்கும் சொந்தமானதாக கொள்ள வேண்டும். ஆளும் அரசியல் கட்சிகள் மட்டும் சொந்தம் கொள்வது மக்களின் வளத்தை சுரண்டுவதாகும்.

கனிம வளத்தை கொண்டு, அதனை சார்ந்த தொழில் நிறுவனங்களை நிறுவி தேசிய வளர்ச்சியையும், வேலை வாய்ப்பையும் கொண்டு வருவது நாட்டுக்கும் வீட்டுக்கும் வளம் பெருக்கும். அதனை தவிர்த்து, கனிம வளங்களை மூலப்பொருளாக ஏற்றுமதி செய்துவிட்டு, அதன் சார் பொருட்களை இறக்குமதி செய்வது நாட்டுக்கு செய்யும் பொருளாதார இழப்பாகும். இது விதை நெல்லை உண்பதுக்கு ஒப்பாகும்.

நம் உடலைப்பொருத்தமட்டில், நாம் உண்ணும் உணவில் இருந்து இருபத்தொரு நாட்களில், புல்லின் நுனியில் அரும்பும் பனித்துளி அளவு உற்பத்தி ஆகும் விந்து, விதை நெல் ஆகும். இந்த விதை நெல்லை வறுத்து  உண்பதென்பது, அளவற்ற முறையில் செலவிடுவதாகும். விதை நெல்லை  உடலுக்குள்ளேயெ  சுட்டு உண்ணக்கூடியவரும்  உள்ளனர். இருவரும் விதை நெல்லை உபயோகித்தாலும், விதை நெல்லை உடலில் சுட்டு உண்பவர், விதை நெல்லை உண்ணாமல் உடலுக்குள்ளே விதைப்பவராகிறார்.

வித்துக்குற்று உண்பான் விளைவு அறியாதவன்
வித்துக்குற்று உண்ணாமல் வித்துச்சுட்டு உண்பவன்
வித்துக்குற்று உண்பானில் வேறுஅலன் ஈற்றவன்
வித்துக்குற்று உண்ணாமல் வித்துவித்தான் அன்றே.
                                                                                                       - திருமந்திரம் 1964

உடலை தங்கம்போல் மிளிர திருமூலர் தரும் தேவவாக்கு, உடலுக்கு மிகுந்த நோய் எதிர்ப்பு சக்தியை தரும் என்பது உறுதி. அதுவே, கொரோனா போன்ற கொடிய தொற்று நோய்களுக்கு வருமுன் காக்கும் அருமருந்தாகும்.

கடவுள் - தானிருந்தான் உணர்ந்தெட்டே

கடவுள் - தானிருந்தான் உணர்ந்தெட்டே

நான் ஆத்திகனானேன்
அவன் அகப்படவில்லை
நான் நாத்திகனானேன்
அவன் பயப்படவில்லை



'உடல் தன் தேவையை அடையாமல் இருக்க முடியாது.'

'வெகுதூரம் பயணம் செய்யும் ஒருவன் தன் குதிரையை எப்படி பராமரிப்பானோ, அப்படி உடலை பராமரிக்க வேண்டும்.'

'அள்ள அள்ளக் குறையாத பொக்கிஷம் என்னிடம் இருப்பதை எடுத்துக் கொள்ள சொல்கிறேன்.'

'பசித்து நிற்கும் ஒரு நாய்க்கு நீ அளிக்கும் உணவு, என் பசியை தீர்க்கிறது.'

தன்னுடைய தேவைக்கு கூட அன்பர்கள் அளிக்கும் பொருட்களை சேமிக்காது, உடனே தேவையானவர்களுக்கு கொடுத்து விடும் பேரன்பை மனதில் கொண்டிருந்த ஷீரடி சாய்பாபா அவர்களின் சாய் சத் சரிதத்திலிருந்து நான் புரிந்து கொண்ட அருள் வார்த்தைகள், மேலே குறிப்பிட்ட சொற்றொடர்கள்.

உலகில் எந்த மூலையில் இருந்தாலும் காலில் கயிறு கட்டி குருவியை இழுப்பதுபோல் இழுத்து உலக நன்மைக்கு பேரருள் வழங்கும் சாய்பாபா அவர்கள் என்னையும் இழுத்து அருள் வழங்கியுள்ளார் என்பதை நாளும் உணர்கிறேன்.

அதீதத் துரியத்தில் இயங்கி உலகெலாம் இன்றும் பேராசி வழங்கும் ஷீரடி சாய்பாபாவின் பொற்பாதங்களில் சங்கமிக்கும் அருள் பெற வேண்டுவோம்.


அதீதத் துரியத்து அறிவனாம்  ஆன்மா
அதீதத் துரியம் அதனால் புரிந்தால்
அதீதத்து எழுந்து அறிவாகிய மானன்
முதிய அனலில் துரியத்து முற்றுமே.
                                                                     - திருமந்திரம் 2199

அதீதத்துரியமாகிய பேருறக்க நிலையில், உயிர் மிக்க அறிவுடையதாக இருக்கும். தொடர்ந்து இந்நிலையில் உயிர் நிற்க இயலுமாயில், சுடர்விட்டெழும் ஆருயிரின் அறிவுச்சுடர் ஞானக்கனல் எனப்படும் நிலையை அடையும். இதுவே சீவாக்கினியில் உயிர் பேருறக்கம் கொண்டு பரம்பொருளை அடையும் நிலை.


உரிய நனா துரியத்தில் இவனாம்
அரிய துரிய நனவாதி மூன்றில்
பரிய பர துரியத்தில் பரனாம்
திரிய வரும் துரியத்தில் சிவமே.
                                                                     - திருமந்திரம் 2273

துரியம் என்னும் பேருறக்கத்தில், நனவு, கனவு மற்றும் உறக்கம் என்றடையும் போது, உயிர் பரம் என்னும் பரம்பொருள் தன்மையை அடையும். இதன் அடுத்த நிலையில், உயிர் பரம்பொருளுடன் கலந்து இறைவனாகவே விளங்கும்.

ஆதி யோகி சிவன். முதற் சித்தர் என  உணர்த்தப்பட்டவர் சிவன். எங்கும், எதிலும் நீக்கமற நிறைந்து நிற்கும்  பரம்பொருளுடன் ஒன்றி நின்றவன் சிவன். நம் வாழ்நாளில், மிக அருகில், நம்முடன் வாழ்ந்தவர் ஷீரடி சாய்பாபா என்னும் சிவன்.

அப்படியெனில், பரம்பொருள் என்பது யார்?

எவ்வுயிரும் எவ்வுலகும் ஈன்று புறம்பாய்
இருந்துதிரு விளையாட் டெய்தியும் பின்னர்
அவ்வுயிரும் அவ்வுலகும் ஆகியு நின்ற
ஆனந்த வெள்ளங்கண் டாடு பாம்பே.
                                                                   - பாம்பாட்டி சித்தர் பாடல் 9

அனைத்து உயிர்களையும், அனைத்து உலகங்களையும் படைத்து, அவைகளை ஆட்டுவிக்கும் பரம்பொருளே, அனைத்து உயிர்களாகவும், அனைத்து உலகங்களாகவும் ஆகி பேரானந்தமாய் நின்றான்.

இதுவே இறைவனின்  எட்டாவது குணம்.

அவன் திருவடிகளை பணிந்து  நிற்பதே பேரின்பம்.

கடவுள் - ஏழும்பர்ச் சென்றனன்

கடவுள் - ஏழும்பர்ச் சென்றனன்

என் காதுக்கு மொழி இல்லை
என் நாவுக்கு சுவை இல்லை
என் நெஞ்சுக்கு நினைவில்லை
என் நிழலுக்கும் உறக்கம் இல்லை


'சார், உங்களுக்கு ஒரு கவர் வந்திருக்கு. ட்யூ  அம்பது பைசா' - என்று சொன்ன போஸ்ட்மேனிடம், காசைக்கொடுத்து வாங்கிப் பார்த்தேன்.

தபால் கார்டு பத்து பைசா, இன்லேண்ட் லெட்டர் பதினைந்து பைசா மற்றும் கவர் இருபத்தைந்து பைசா ஸ்டாம்ப் ஒட்டினால் போதும். 

எனக்கு வந்த தபால் கவர்  ஸ்டாம்ப் ஒட்டாததால்,  ஒட்டியிருக்க வேண்டிய ஸ்டாம்ப் இருபத்தைந்து பைசா மற்றும் பெனால்டி இருபத்தைந்து பைசா ஆக ஐம்பது பைசா ட்யூ.

ஆனால், மூணு பத்து பைசா ஸ்டாம்ப் ஒட்டி இருக்கே!

'சார், போஸ்டல் ஸ்டாம்புக்கு பதிலா ரெவின்யு ஸ்டாம்ப் ஒட்டி இருக்காங்க'

அது ஒரு தீபாவளி வாழ்த்து அட்டை. அனுப்பியவர் பெயர் இல்லை. சுவாரசியமே இங்குதான் ஆரம்பிக்கிறது.

அனுப்பியவரை துப்பறிந்து, மனம் பரிமாறிய நேரத்தில் அவள் வாழ்வில் தந்தையை இழந்த துக்கம்.

தொடர்ந்த இன்னொரு துக்கம், அவளுக்கு திருமணம்.

'எங்கிருந்தாலும் வாழ்க' - என்று அவள் திருமணத்தில் பாடி விட்டு பேசாமல் இருக்க முடியவில்லை.

சோகம்.. சோகம்.. சோகம்..

MGR-க்கே காதல் தோல்வியா, என்னும் அளவுக்கு சோகம்.

'ராசாத்தி உன்ன காணாத நெஞ்சு காத்தாடி போலாடுது'- என்று தாடி விடாத விஜயகாந்தாய்   நாட்களை  ஓட்டினேன்.

ஐம்புலன்கள் தரும் இன்பத்தை அறியும் மனம், அவை ஒன்றுமே வாழ்வில் முக்கியம் இல்லை என  வாடி நின்றது.

ஐம்புலன்களை அறிந்து, மாயையை கடந்து, தவ நிலையில் துரியத்தை அடைய, துறவை ஏற்கும் அளவிற்கு வாழ்க்கையில் பிடிப்பற்ற வெறுப்பு.

துறவற தவ வாழ்வில், கடவுளின் ஏழாம் குணமான துரியம் என்னும் பேரொளி, பேருறக்கத்தில் மனிதன் அடைய முடியும் என்றால், இல்லற வாழ்விலும் இது ஒரு மார்க்கமோ என்ற மயக்கம் மனதினில் ஆடியது.


சத்தி சிவன் விளையாட்டால் உயிராகி
ஒத்த இருமாயா கூட்டத்து இடைஊட்டிச்
சுத்தம் அதுஆகும் துரியம் பிரிவித்துச்
சித்தம் புகுந்து சிவம்அகம் ஆக்குமே.
                                                                 - திருமந்திரம் 1771

சக்தி, சிவன் இருவரின் விளையாட்டான உலகும், உலகத்தில் தோன்றி உள்ள உயிர்க்கூட்டமும். மாயா மலம், கன்ம மலம் என்னும் இரு மாய நிலையிலிருந்து பிரிந்து, அறிவுடன் கூடி சித்தி நிலையில் பேருறக்கம்  கொள்ளும். இவ்விடத்தில், உயிர் சிவ நிலையை அடையும்.

அதீதத் துரியத்து அறிவனாம் ஆன்மா
அதீதத் துரியம் அதனால் புரிந்தால்
அதீதத்து எழுந்து அறிவாகிய மானன்
முதிய அனலில் துரியத்து முற்றுமே.
                                                                 - திருமந்திரம் 2199

தவ நிலையில் ஆறு ஆதாரங்களை கடந்து, அதீதத் துரியமாகிய பேருறக்க நிலையில், உயிர் மாயையிலிருந்து விடுபட்டு, அறிவுடையதாயிருக்கும். இப்படியே உறுதியாக அறிவோடு பொருந்தி பேருறக்க நிலையிலே நிற்க இயலுமானால், சுடர்விட்டெழும் ஆருயிரின் அறிவுச்சுடர்  ஞானக்கனல் எனப்படும் நிலை அடையும். இதுவே சீவாக்கினியில் சீவன் அடங்கும் பேருறக்கம்.

சித்தர்களே தங்கள் சித்தத்தில் துரிய நிலை எய்தியவர்கள் என்பதால் இவர்கள் சித்தர்கள் என அறியப்படுகிறார்கள்.

நல்ல ஆரோக்கியமான உடலில் மட்டுமே ஐம்புலன்களும் சிறப்பாக செயல்படும். இல்லறத்தார் ஐம்புலன்களின் இன்பத்தை அனுபவித்து, அவ்வழியில் இறை நிலை எய்த, உடலின் மேம்பாட்டிற்காக மூன்று வழிகளை பாடல்களின் மூலம் அறிவித்து சென்றிருக்கிறார்கள்.

1. மந்திரம்
                      ஐம்பத்தொரு  அக்ஷரங்களை உடலின்  ஒலியாக பிரித்து, உயிரோடும், மனதோடும் உறுதியாக  ஒன்றி நிற்க மந்திரங்கள். ஓம், நமக்ஷிவய மற்றும் பல.

2. யோகம் 
                      பிராணாயாமம் என்னும் மூச்சு பயிற்சியின் மூலம், உடலினை இயக்கும் பத்து வகையான வாயுக்களை சீராக வைத்திருத்தல், இன்னும் பல யோக முறைகள்.

3. மருந்து 
                       உட்கொள்ளும் உணவு, ஒவ்வாமையினாலோ, வேறு காரணங்களினால் விஷத்தன்மை பெற்று உடலில் தங்கி நோய் உண்டாக்கினால், அதனை நீக்கி  உடல் புத்துணர்வு பெற இயற்கை சித்த மருந்து வகைகள்.

மாயையை விட்டு விலகி நிற்கும் ஆற்றலே, இறைவனின் ஏழாம் குணமாக திகழ்கிறது.

கடவுள் - ஆறு விரிந்தனன்

கடவுள் - ஆறு விரிந்தனன்

ஆறு மனமே ஆறு அந்த
ஆண்டவன் கட்டளை ஆறு
சேர்ந்து மனிதன் வாழும் வகைக்கு
தெய்வத்தின் கட்டளை ஆறு



'நீ பேசும் வார்த்தையில் இருந்து வரும்  ஒலியை பிரித்து, ஒலியை வரி வடிவமாக கொண்டுவருவது எழுத்து' - கபிலர்,  'எழுத்து என்றால் என்ன?' என்று கேட்ட பறம்பு மலைத் தலைவன் வேள் பாரியின் தளபதிகளில் ஒருவனான நீலனுக்கு விளக்கினார்.

'ஒலி என்றால் என்ன?'
'ஒலி எப்படி உருவானது, எங்கிருந்து வருகிறது?'

ஆதியோடு அந்தம் இலாத பராபரம்
போதம தாகப் புணரும் பராபரை
சோதி அதனில் பரந்தோன்றத் தோன்றுமாம்
தீதில் பரையதன்  பால்திகழ் நாதமே.
                                                                  - திருமந்திரம் 381

பராபரம்  - சிவன்.    பராபரை - சக்தி.

சிவனுடன் [ஒளியுடன்], சக்தி இணைந்த நிலையில், பிறந்தது நாதம் என்னும் ஒலி. ஒளி/ஒலியில் தோன்றியதே  அணுக்களும் சகல உயிர்களும். அணுக்களின் கூட்டே, மனிதன் வாழும் அண்டமும், பேரண்டமும். எனவே, இந்த விதிக்கு  மனித உடல்  விலக்கல்ல.

உடலின்  உள்ளியக்கம் ஒலியினால் கட்டமைக்கப்பட்டுள்ளது.

ஐம்பொறிகளில் ஒன்றான, காது  உணரக்கூடிய ஒலியினை, வரி வடிவமாக்கி எழுத்து என வகைப்படுத்தி அறிந்து உள்ளோம்.

உடலினுள்  இயங்கக்கூடிய ஒலியினை,  எழுத்துக்கள் வடிவில், அக்ஷரம் என்று வகைப்படுத்தி உள்ளனர் நம் முன்னோர்கள். அதனை  கிரந்த எழுத்துக்கள் என்றும், ஆதி தமிழ்  எழுத்துக்கள் என்றும் நாம் அறிந்து வைத்துள்ளோம். ஐம்பத்தி ஒன்று என்ற எண்ணிக்கையை கொண்ட இந்த அக்ஷரங்கள், மூலாதாரத்திலிருந்து, ஆக்கினை வரை, ஆறு ஆதாரங்களின்  அடித்தளமாக அமைந்துள்ளது.

ஆறு ஆதாரங்களும், ஐம்பத்தியொரு அக்ஷரங்களும்:

1 மூலாதாரம்  -  [வ, ச, ஷ, ஸ] - 4 
2 சுவாதிட்டானம்  - [ப3, ப4, ம, ய, ர, ல] - 6
3 மணிபூரகம் - [ட3, ட4, ண, த, த2, த3. த4, ந, ப, ப2] - 10
4 அனாகதம் - [க, க2, க3, க4, ங, ச, ச2, ஜ, ஜ2, ஞ, ட, ட2] - 12
5 விசுத்தி - [அ, ஆ, இ, ஈ, உ, ஊ, ரு, ரூ, லு, லூ, ஏ, ஐ, ஓ, ஒள, அம், அஹ] - 16
6 ஆக்கினை - [ஹ, ள] - 2
                                                                                                                         - போகர் 7000

ஒவ்வொரு அக்ஷரமும் ஒவ்வொரு தாமரை மலர் இதழ்களாக, ஆறு ஆதார சக்கரம்தோறும்  உவமைப்படுத்தப்பட்டுள்ளது. ஐம்பத்தியோராவது அக்ஷரமாக 'க்ஷி' தலையின்  உச்சியில் நிற்கிறது.

மேல்என்று கீழ்என்று இரண்டறக் காணுங்கால்
தான்என்றும் நான்என்றும் தன்மைகள் ஓராறும்
பார்எங்கும் ஆகிப் பரந்த பராபரம்
கார்ஒன்று கற்பகம் ஆகி நின்றானே.
                                                                                 - திருமந்திரம் 1706

'தான்' என்று ஒளி உடலுடன் தன்மயமாகும் நிலையும், 'நான்' என்று திட உடலாய் மனிதன்  உணரும் தன்மையும் ஆறு ஆதாரங்களின் குணத்தினால் உண்டானது. ஆறு ஆதாரங்களையும் ஒன்றாக காணும் பரம்பொருள், பேரண்டமாக நிலைத்து நிற்கிறான்.

ஆறு அந்தமும் கூடிஆகும் உடம்பினில்
கூறிய ஆதாரம் மற்றும் குறிக்கொள்மின்
ஆரிய அக்கரம் ஐம்பதின் மேலாக
ஊறிய ஆதாரத்துஓர் எழுத்து ஆமே.
                                                                                  - திருமந்திரம் 1709

ஆறு ஆதாரங்களுடன் அமைந்த இவ்வுடல், ஐம்பத்தியொரு அக்ஷரங்களை கொண்டிருந்தாலும், அவற்றின் அடித்தளம், 'ஓம்' என்னும் பிரணவத்தை  ஆதாரமாய் ஏற்று நிற்கிறது.

இதுவே இறைவனின் ஆறாம் குணமாகும்.

*** ***

கடவுள் - ஐந்து வென்றனன்

கடவுள் - ஐந்து வென்றனன் 

அவனை அழைத்து வந்து
ஆசையில் மிதக்க விட்டு
ஆடடா ஆடு என்று
ஆட வைத்து பார்த்திருப்பேன்



இன்னும் கொஞ்ச நேரம் வேப்ப மர நிழலில் உட்காரலாமா, வேண்டாமா என்று யோசிக்க வைத்தார்கள்,  எதிரில் அமர்ந்திருந்த இளம் ஜோடி.  தீபாவளி திருநாளை கொண்டாட  நிறைய இளஞ்ஜோடிகள் மருதமலை ஏறிக்கொண்டிருந்தார்கள்.

அவர்கள் அணிந்திருந்த புத்தம்புதிய உடைகளின் நிறமே, நகர்ப்புற வணிக வளாகங்களில் வரும் ஜோடிகளிடம் இருந்து இனம்  பிரித்து காட்டியது.

கோவில்களுக்கு வரும் மக்களும் அப்படித்தான். வசதி ஏற, ஏற ஆசையின் பிடியில் சிக்கி, ஆசையின் எல்லை தெரியாமல்  போலி வாழ்க்கைக்குள் போய் விடுகிறார்கள். கோவிலுக்கு  செல்வதெல்லாம் பத்தாம் பசலித்தனம் என்னும் எண்ணம் வளர்ந்து கொண்டுள்ளது. இன்னும் மத்தியதர  வாழ்க்கையை எட்ட  முடியாதவர்களே,  படிக்கட்டில்   மலை ஏறுபவர்களில்  அதிகமாக காண முடிந்தது.

வசதி உள்ளவர்கள், கோவில் வரை காரில் வந்து சிறப்பு தரிசன அனுமதி சீட்டு பெற்று, இடைத்தரகர்களின் ஆசியுடன் கடவுளிடம் தங்கள் தேவைகளை, ஆசைகளை   விண்ணப்பங்களாக  சமர்ப்பித்து விட்டு, வேக வேகமாக மருத்துவ மனைகளில் மருத்துவர்களை பார்க்க  தலை தெறிக்க ஓடிக்கொண்டிருந்தார்கள்.

காற்று குளிர்ச்சியா இல்லை வெயிலுக்கு காற்று இதமாக இருக்கிறதா என்று தெரியாமல் சுகமாக இருந்தது மருத மலைக்காற்று. உடல் பெரும் சுகங்களில் இதுவும் கணக்கில் சேர்த்தியே.

முருகனை தரிசிக்க வரும்போதெல்லாம் மலையின் அழகை மனம் ரசிக்காமல் போனதில்லை. இரண்டு பக்கமும் இறகை விரித்து அமர்ந்திருக்கும் பெரிய கழுகைப்போல் இருக்கும், முகில் உரசி செல்லும் மருதமலைக்  குன்றுகள், கோவில் என்றுமே அழகான காட்சிதான், என் கண்களுக்கு .

அதிக ஆரவாரமில்லாமல், இயற்கையின் ஒலியோடு மனம் ஒன்றி போக அமர்ந்திருக்கலாம் பாம்பாட்டி சித்தர் ஜீவ சமாதி அடைந்த குகை கோவிலில்.

நெய்யின் மணம் சற்று தூக்கலாக கிடைக்கும் சர்க்கரைப்பொங்கலை ரசித்து சுவைக்கும்போது, ஐம்புலன்களின் இன்பம் இந்த மலையிலும்  கிடைக்கும் என்பது, என்னைப்போல் அனுபவித்தவர்கள் மட்டுமே அறிந்த உண்மை.

பார்க்கையிலே ஐம்புலனை நன்றாய்க் கேளு

பதிவான சத்தமொடு பரிசம் ரூபம்

ஏர்க்கவே ரசமுடனே கெந்தம் ஐந்து

இன்பமுள்ள ஐம்புலனை அறிவதற்கு

சேர்க்கையுடன் ஐம்புலனிக் கண்டு மைந்தா

தேர்ந்து மனதறிவாலே தேர்ந்து கொண்டால்

மார்க்கமுள்ள சித்தரென்று யார்க்குந்தோணும்

மைந்தனே ஐம்புலனை வகுத்துக் காணே.
                                                        - அகத்தியரின் சௌமிய சாகரம் 30

சப்தம், ஸ்பர்சம், ரூபம், ரசம், கந்தம் என்று புலன்கள் ஐந்தாகும்.  இந்தப்  புலன்களால் பெரும் அறிவு எவ்வாறு ஏற்படுகிறது என்றால் பொறிகள் எனப்படும் ஞானேந்திரியங்கள் புலன்களுடன் சேருகின்றன, இவையிரண்டும் ஆன்மாவுடன் சேர ஆன்மா அந்த அனுபவங்களை உணர்கிறது.  இதனால் அகத்தியர் புலன்களை அவற்றின் சேர்க்கையுடன் அறிந்துகொள்ளவேண்டும் என்று கூறுகிறார்.  இவ்வாறு உலக இன்பங்கள் எவ்வாறு ஏற்படுகின்றன என்பதைப் புரிந்துகொள்வது சித்தர் மார்க்கத்தில் ஒரு அம்சம் என்று அவர் நமக்குக் கூறுகிறார். 

கண்டுகேட் டுண்டுயிர்த் துற்றறியும் ஐம்புலனும்
ஒண்தொடி கண்ணே உள.
                                                           - திருக்குறள் 1101

கண்டும் கேட்டும் உண்டும் முகர்ந்தும் உற்றும் அறிகின்ற ஐந்து புலன்களாகிய இன்பங்களும் ஒளி பொருந்திய வளையல் அணிந்த பெண்ணிடத்தில் உள்ளன.

இவ்வின்பம் இருபாலாரும் உய்த்து உணரக்கூடியதே. போக வாழ்வும் இறை நிலை உணரும்  வழிகளில் ஒன்றே. இல்லறத்தாருக்கு கிடைத்துள்ள அருமையான வாய்ப்பு.

நாகமும் ஒன்று படம் ஐந்து நாலது 
போகமும் உட்புற்றில் பொருந்தி  நிறைந்தது 
ஆகம் இரண்டும் படம்விரித்து ஆட்டுஒழிந்து 
ஏகப்படம்செய்து உடம்புஇடம்  ஆமே.
                                                               - திருமந்திரம் 1621

உயிரென்னும் பாம்புக்கு படம் ஐந்து என்று குறிப்பிட்டது  மெய், வாய், கண், காது, மூக்கு என்னும் ஐம்பொறிகளை. நாலது ஆவது இந்த ஐம்பொறிகளால் நுகரும் மனம், புத்தி, அஹங்காரம் மற்றும் சித்தி. உயிராகிய பாம்பு,  மனம் என்னும் புற்றில் ஐந்து புலன்களுடன் பதுங்கி இருக்கிறது. ஆகம் இரண்டும் என்பது நுண்ணுடல் மற்றும் பரு உடலைக்குறிக்கிறது. இவ்விரு உடலும் ஒன்றாக இணைந்து உடலில் வாழ்வதே, இறைவனின் ஐந்தாம் குணம் ஆகும்.

கடவுள் - உணர்ந்தனன் நான்கு

கடவுள் - உணர்ந்தனன் நான்கு  

காற்றில் மிதக்கும் ஒலிகளிலே
கடலில் தவழும்  அலைகளிலே
இறைவன் இருப்பதை நானறிவேன்
என்னை அவனே தானறிவான்



வருத்தம் தெரிவித்த சரளாவிற்கு, மனதுக்குள் நன்றி தெரிவித்தான் சரவணன்.

வெட்கம் பிடுங்கி தின்றது ஒரு பக்கம்; உடல் முழுக்க புல்லரிக்கும் ஆனந்தம் மறுபக்கம், சரளாவிற்கு.

குண்டும் குழியுமான சாலையை காரணம் சொல்வதா, நகர்ப்புற பேருந்தில் இருந்த நெரிசலா, இல்லை திடீரென்று பேருந்தை நிறுத்திய ஓட்டுனரை குற்றம் சொல்வதா?

மாத்திரை கால அளவில் நிகழ்ந்து முடிந்து விட்டது.

இதுநாள்வரை கண்களால்  மட்டுமே பேசிக்கொண்டிருந்தவர்களை உடலால்  மோத வைத்து, அணைக்க  வைத்தது பேருந்தின் திடீர் நிறுத்தம்.

இருவரும் தன்னிலை அடையவில்லை. இது, இவர்களின்  இறுதி நாள் வரை தொடரும் மறக்க முடியாத இன்ப பேருணர்வாக அமையும்  என்பது மட்டும் மறுக்க முடியாத உண்மை.

இப்பொழுது நடந்தது என்ன?

உடல்கள் ஒன்றை ஒன்று அணைத்து மீண்டது, இமைக்கும் கால அளவில்.

உடலின் அனைத்து  சிற்றறைகளுக்கும் செய்தி பரிமாறப்பட்டது. ஆனால் அதை உணர்ந்தது உடலின் எந்த பகுதி? உடல் ஒரு கருவியே, அதாவது புலன்களின் ஓரங்கமான ஞானேந்திரியம் மட்டுமே.

உணர்ந்தது மனம். மனம் என்பது ஒளி உடல். இது பல கோடி பிறப்புகளை கொண்டது.

கேளப்பா புலத்தியமா ரிஷியேஐயா

கிருபையுள்ள கரணம் அந்தக்கரணந் தன்னை

கோளடா  இல்லாத மனம் தானொன்று

கூர்மையுடன் நின்றிலங்கும் புத்தி ஒன்று

தேரடா ஆங்காரம் ஆனதொன்று

சிவ சிவா சுத்த மென்ற சித்தமொன்று

ஆளடா கரணமென்ற கரணம் நான்கும்

அப்பனே அறிந்துகொண்டு வாற்றுமம் பாரே.
                                          - அகத்தியரின் சௌமிய சாகரம் 32

உயிரோடு கலந்த சக்தி, மாயை நிலையில் இயங்கும்  உடல்,  உணர்வுதனை மனதுக்கு  வழங்குகிறது. மனதிற்கு என்று தனிப்பட்ட எந்த கோளும் அதாவது புலனுறுப்பும்  இல்லை.

ஆயினும், 1. மனம்  2. புத்தி/அறிவு  3. ஆங்காரம்  4. சித்தி என்ற நான்கு படிகளில் மனித உணர்வுகளை வழி நடத்துகிறது.

கண்டிட்ட மனத்தாலே தவமு மாச்சு 
    கவர்ந்தவுயி ராவதும்  மனமே யாச்சு

மண்டிட்ட வாயுமேல் மனமு மாச்சு 
    மகத்தான சஞ்சலத்தால் மனம்பே யாச்சே 

அண்டிட்ட தீப்போல மனந்தான் சென்றே 
    யகண்டத்திற் சென்றாலதுதான்  போதம்

மண்றிட்ட  மனம் விட்டால் ஞானம் போச்சு 
    வாசியைத்தா னழுகவிட்டால் யோகம் போச்சே.
                                                           - போகர் 7000 - 146

உயிரின் சக்தியாக மனம் இயங்குவதை தவத்தால் அறியலாம். வாசி யோகம் வழியாக மனதின் நான்காம் தன்மையான ஞானத்தை, சித்தியை அடையலாம். 

நின்றாள் அவன்தன் உடலும் உயிருமாய்ச் 
சென்றாள் சிவகதி சேரும் பராசத்தி 
ஓன்றாக என்னுள் புகுந்துணர் வாகியே 
நின்றான் பரஞ்சுடர் ஏடங்கை யாளே.
                                                  - திருமந்திரம் 1066

உடலும் உயிருமாய் ஒன்றி நிற்கும் ஒளி உடலில் நிற்கும் மனம், ஐம்புலன்களால் பெறப்படும் செய்திகளை  உணர்வு நிலையாய்  அறிகிறது. எடுக்கும் ஒவ்வொரு பிறவியிலும் மனம் அனுபவத்தை மட்டும் எடுத்து கர்ம வினையாக சேமித்து கொள்கிறது.

மனம் - உணர்வு, இவை மனிதனுக்கு வழங்கப்பட்ட,கடவுளின் நான்காம் குணம். 

அணுவியல்/அறிவியல்  கடவுளின் மூன்றாம் குணத்துடன் என்னிடமிருந்து விடை பெற்றுக்கொண்டது.