இயற்கைப்பேருண்மை

இயற்கைப்பேருண்மை

இருக்குறதெல்லாம் பொதுவாய்ப்போனால்
பதுக்குற வேலையும்  இருக்காது
ஒதுக்குற வேலையும்  இருக்காது

'கலி யுகம் முடியும் நேரம் வந்துவிட்டதா? உலகம் அழிந்து விடுமா?'

இந்த கேள்வி எல்லோருடைய மனதிலும் இன்றைக்கு பதிலில்லாமல் கேட்கப்பட்டுக்கொண்டிருக்கிறது.

சிறு சிறு கிராமங்களும் தங்கள் எல்லைகளை மூடி, மனிதர்களை  மூடிய கதவிற்குப்பின்னால் ஒளிந்து கொள்ள சொல்லிவிட்டது.

இயற்கையை வாழ்வாதாரமாக கொண்ட, புதிய மனிதப்பண்புகள் கொண்ட உயிரினம் தோன்றுவதற்கான எல்லா முன்நிகழ்வுகளும் பூமியில் நடக்க ஆரம்பித்து விட்டது. அது மனிதனாகவே இருக்க வேண்டுமென்ற அவசியம் கிடையாது.

இறைவனால் படைக்கப்பட்ட உலகம் அழியாது; தன்னைத் தானே புதுப்பித்துக்கொள்ளும். அணுவினுக்கழிவில்லை என்னும் கோட்பாடுதான் இது. அணுவை பிளந்தாலோ, இணைத்தாலோ புதிய அணுக்கள் தோன்றுமே தவிர அழியாது.

Matter can neither be created nor destroyed - The first law of thermodynamics.

பதினெட்டாம் நூற்றாண்டிலேயே, ஜொனாதன் ஸ்விப்ட் எழுதிய [கல்லிவர்ஸ் ட்ராவல்ஸ்] நான்காம் புதினத்தில் குதிரைகள் மனித குணத்தோடு, இயற்கையோடு  இணைந்த வாழ்க்கையின் அருமையை எழுதி உள்ளார்.

அறிவியல் வளர்ச்சி என்ற   பெயரில் மனிதன்  ஆடிய ஆட்டத்திற்கு சம்மட்டி அடி  மட்டுமல்ல, மனித இனமே மரபணு மாற்றத்திற்கு சென்று கொண்டிருக்கிறது. ஆறாம் அறிவை அப்படியே அடித்து சாய்த்து மனிதன் ஐந்தறிவுடன் வாழும் காலம் வெகு விரைவில் என்பது அப்பட்டமாக நம் கண் முன்னே  தெரிகிறது.

வான எல்லைகளை சொந்தம் கொண்டோம். நெருப்பு சக்தியை விற்று காசாக்கினோம். நீரினை வியாபாரமாக்கினோம். நிலத்தை நாமே ஆண்டனுபவிக்க அளந்து, சந்ததி சந்ததியாக சொத்தெழுதி வைத்தோம். காற்றினை கையகப்படுத்துமுன் இயற்கை முந்திக்கொண்டு விட்டது.
பூமியெங்கும் நீக்கமற நிறைந்திருக்கும் காற்றினை சுவாசிக்க முடியாத அளவிற்கு பெருந்தொற்றை பெற்றிருக்கிறோம். பஞ்சபூதங்களை மிக சாதாரணமாக எண்ணினோம், அதற்கான பரிசு கிடைத்துவிட்டது.

புடைவை கிழிந்தது போயிற்று வாழ்க்கை
அடையப் பட்டார்களும் அன்பிலர் ஆனார்
கொடை இல்லை கோள்இல்லை கொண்டாட்டம் இல்லை
நடைஇல்லை நாட்டில் இயங்குகின் றார்கட்கே.
                                                                                          - திருமந்திரம் 209

கிழிந்து போன புடவை போலானது மனித வாழ்வு. உற்றார்களும், உறவினர்களும் அன்பு செலுத்த முடியாத நிலைக்கு தள்ளப்பட்டுவிட்டார்கள். கொடுத்துதவுபவர்கள் யாருமில்லை. ஐம்புலன்கள் சரியாக இயங்காமல் மனம் நோய் கொண்டுவிட்டது. எந்த மனமகிழ்வு தரும் கொண்டாட்டங்கள் இல்லை. இதுநாள் வரை, கட்டி காத்து வந்த பழக்க வழக்கங்கள்,  பண்பாடுகள் என்ற நடைமுறை  மாறி, பூமியில் வாழுகின்றவர்கள் தன்மை மாறி விடும்.

நல்ல நேரம்

நல்ல நேரம்

ஆயிரம்தான் வாழ்வில் வரும்
நிம்மதி வருவதில்லை

'கோவிட்தான் வாழ்வில் வரும்
நிம்மதி வருவதில்லை'

அனிச்சையாக ரீமிக்ஸ் பண்ணி பாடி சந்தோசப்பட்டுக்கொண்ட சுந்தர், மிக சிறப்பாக தமிழாக்கம் செய்யப்பட்ட பட்டாம்பூச்சி நாவலில் மூழ்கி இருந்தான்.

'தனிமை சிறையில் அடைக்கப்பட்ட பட்டாம்பூச்சி, தன்னிலை மறக்காமல் இருக்க அந்த குறுகிய  இருட்டறையில் தொடர்ந்து நடப்பதை வழக்கமாக்கிக்கொண்டான்.'

'சிறையில் இருந்து வெளியே வந்த பட்டாம்பூச்சிக்கு வெளிச்சத்தை பார்க்க முடியவில்லை. அறையில் நடந்த எட்டுகளுக்குமேல் கால் நடக்க மறுத்தது.'

'ஏங்க, எப்படி உங்களால மட்டும் சும்மாவே இருக்க முடியுது. சகிக்கல, ஆம்பள வீட்டுலயே முட்ட வச்சிட்டு இருக்கிறது. வாஷிங் மெஷின்ல இருக்கிற துணிய எடுத்து காயப்போடுங்க. கொஞ்சம் ஒடம்பு வளையட்டும்'- சித்ரா என்ற சித்ராங்கியின் சித்ரவதை தாங்க முடியவில்லை சுந்தருக்கு.

'கொரோனா  வேணுமா சித்ரா வேணுமான்னு கேட்டா, என்னுடைய ஓட்டு கொரோனாவுக்கே'-   முனகிட்டே துணி காயப்போட போனான் சுந்தர்.

கொரோனா லாக் டௌன். வேலை இல்லை. ரொம்ப நாளா படிக்கணும்னு இருந்த ஒரு நாவலை படிக்க விடமாட்டேங்குறாளே, ராக்ஷசி.

நாள் தவறாமல் காலை எழ வேண்டியது,  எந்த வேலையும் செய்யாமல் மாலை வரை நாளை ஓட்ட வேண்டியது, மறுபடியும் தூங்க வேண்டியது. ஓய்வெடுத்து, ஓய்வெடுத்து ஓய்ந்து போய்  மறுபடியும் ஓய்வெடுப்பது. இத்தகையவரைக்கண்டால் இறைவனும் கோபம் கொள்வான். இதிலிருந்து வெளியேறி தத்தம் வாழ்நாளின் கடமையை செய்ய நினைப்பவர்க்கு இன்பம் அருளுவான்.


காலை எழுந்தவர் நித்தலும் நித்தலும்
மாலை படுவதும் வாழ்நாள் கழிவதும்
சாலும் அவ்வீசன் சலவியன் ஆகிலும்
ஏல நினைப்பவர்க்கு இன்பம் செய்தானே.

                                                                   - திருமந்திரம்  182

இறைவன்

இறைவன்
இல்லை
என்போர் இருக்கையிலே
இருப்பவர்கள்
இல்லை என்பார்

காணொளி:
https://au.video.search.yahoo.com/search/video?fr=mcafee&p=koduthathellam+koduthaan+song+youtube#id=4&vid=8413d3219acea79bd7573049f6d26e84&action=click



கொடுத்ததெல்லாம் கொடுத்தான் அவன்
யாருக்காக கொடுத்தான்
ஒருத்தருக்கா கொடுத்தான் இல்லை
ஊருக்காக கொடுத்தான்.

'பாட்ட நிறுத்துங்கப்பா. தலைவர் இப்ப பேசுவார்..'

'வணக்கத்திற்குரிய பெரியோர்களே, தாய்மார்களே, எனதருமை சகோதர, சகோதரிகளே.. சரியான பாட்டுதான் போட்டிருக்காங்க. இன்னைக்கு கொரோனாவ கொடுத்து, மனித இனத்தின் இறுதி அத்தியாயம் போய்கிட்டிருக்கிறதை நாம் பார்த்துக்கொண்டிருக்கிறோம். நம்முடைய நீண்ட நாள் பிரார்த்தனை நிறைவேறுவதை காண மிக ஆனந்தமாக உள்ளது.

ஏதோ  இந்த பூமி தனக்காக மட்டுமே  படைக்கப்பட்டதாக எண்ணி , நம்மை எல்லாம் கால்நடை என்று கிண்டல் பேச்சு பேசிக்கொண்டிருந்த மனிதன் காலே நடக்க முடியாமல் படுத்துக்கிடக்கிறான்.

இந்த அருமையான வேளையில்,  பாரதப்பிரதமருக்கு, நம்முடைய ஆடுகள் இனத்தின் சார்பாக நன்றி தெரிவித்துக்கொள்வோம். இன்று, ஞாயிறு ஒரு நாள் முழு அடைப்பு நடத்துவதன் மூலமாக, லட்சக்கணக்கான நம் இனத்து மக்கள் உயிர் விடுவதை தடுத்திருக்கிறார்.

மனித இனத்தின் அழிவின் பயணத்தில், அவர்கள் படைத்த வேதங்களும், மதங்களும்,கோவில்களும், சிலைகளும், பணமும்  அவர்களே முன் நின்று  அழித்து  சென்று விடுவார்கள். பொன்னும், பொருளும், வீடும், தோட்டமும் இனி இயற்கைக்கு சொந்தமாகிவிடும்.

அணுவினை படைத்து, அணுவினுள்ளும்  உறையும் இறைமை, இருப்பதிலும், இல்லாததிலும் நீக்கமற நிறைந்திருப்பது, அவனது ஆறாவது அறிவுக்கு புலப்படாமலே மனித இனம் அழிவதை நாம் சாட்சிகளாக பார்த்துக்கொண்டிருக்கிறோம்.

மனிதனுக்கு உணவாவதே நம் வாழ்வு என்ற நிலை மாறி, நாமும் இறைவனின் படைப்பில் முழு வாழ்வும் வாழ்வோம்.'

இப்படியாக கொரோனா என்ற கொடிய தோற்று நோய் மனித இனத்தையே வேரோடு, வேரடி மண்ணோடு சாய்த்துவிடும் என்று தெரிந்தோ என்னவோ திருமந்திரம் அதற்கும் ஒரு மருந்தை மனித இனத்துக்கு அளித்து வைத்துள்ளது.

வீர மருந்துஎன்றும் விண்ணோர்  மருந்துஎன்றும்
நாரி மருந்துஎன்றும் நந்தி அருள்செய்தான்
ஆதி மருந்துஎன்று அறிவார் அகலிடம்
சோதி மருந்துஇது சொல்ல ஒண்ணாதே.
                                                                                            - திருமந்திரம் 850

குறிப்பு:
இந்த மருந்தைப்பற்றி  முழுமையாக அறிந்து கொள்ள எண்ணுபவர்கள், திருமந்திரப்பாடல்களில் 845, 846, 847, 848, 849 பாடல்களை படிக்கவும்,

விதை நெல்

எதிரொலி கேட்டான்
வானொலி படைத்தான்..
எதனை கண்டான்
பணம்தனை படைத்தான்..

காணொளி:

https://au.video.search.yahoo.com/search/video?fr=mcafee&p=manithan+maarivittan+youtube+song#id=1&vid=22f6ae9b8cededb39caaad724c48547b&action=view

'ரிசர்வ் பேங்கில் வைப்பில் உள்ள சேமிப்புத்தொகை நாட்டின் விதை நெல். விதை நெல்லை அரசியல் லாபங்களுக்காக பயன்படுத்துவது  நாட்டின் பொருளாதாரத்தை பல முனைகளில் இருந்து பலவீனப்படுத்திவிடும்.....' - பொருளாதார அரசியல் விமர்சகர் தன்னுடைய கருத்தை   அழுத்தமாக  பதிவிட்டுக்கொண்டிருந்தார்.

இதோடல்லாமல், நாட்டின் கனிம வளங்களை விதை நெல்லாக கொள்ளலாம். தங்கமோ, கிரானைட்டோ  அல்லது எண்ணையோ நாட்டின் வளமாக மட்டும் கொள்ளாமல்  அனைத்து பொது மக்களுக்கும் சொந்தமானதாக கொள்ள வேண்டும். ஆளும் அரசியல் கட்சிகள் மட்டும் சொந்தம் கொள்வது மக்களின் வளத்தை சுரண்டுவதாகும்.

கனிம வளத்தை கொண்டு, அதனை சார்ந்த தொழில் நிறுவனங்களை நிறுவி தேசிய வளர்ச்சியையும், வேலை வாய்ப்பையும் கொண்டு வருவது நாட்டுக்கும் வீட்டுக்கும் வளம் பெருக்கும். அதனை தவிர்த்து, கனிம வளங்களை மூலப்பொருளாக ஏற்றுமதி செய்துவிட்டு, அதன் சார் பொருட்களை இறக்குமதி செய்வது நாட்டுக்கு செய்யும் பொருளாதார இழப்பாகும். இது விதை நெல்லை உண்பதுக்கு ஒப்பாகும்.

நம் உடலைப்பொருத்தமட்டில், நாம் உண்ணும் உணவில் இருந்து இருபத்தொரு நாட்களில், புல்லின் நுனியில் அரும்பும் பனித்துளி அளவு உற்பத்தி ஆகும் விந்து, விதை நெல் ஆகும். இந்த விதை நெல்லை வறுத்து  உண்பதென்பது, அளவற்ற முறையில் செலவிடுவதாகும். விதை நெல்லை  உடலுக்குள்ளேயெ  சுட்டு உண்ணக்கூடியவரும்  உள்ளனர். இருவரும் விதை நெல்லை உபயோகித்தாலும், விதை நெல்லை உடலில் சுட்டு உண்பவர், விதை நெல்லை உண்ணாமல் உடலுக்குள்ளே விதைப்பவராகிறார்.

வித்துக்குற்று உண்பான் விளைவு அறியாதவன்
வித்துக்குற்று உண்ணாமல் வித்துச்சுட்டு உண்பவன்
வித்துக்குற்று உண்பானில் வேறுஅலன் ஈற்றவன்
வித்துக்குற்று உண்ணாமல் வித்துவித்தான் அன்றே.
                                                                                                       - திருமந்திரம் 1964

உடலை தங்கம்போல் மிளிர திருமூலர் தரும் தேவவாக்கு, உடலுக்கு மிகுந்த நோய் எதிர்ப்பு சக்தியை தரும் என்பது உறுதி. அதுவே, கொரோனா போன்ற கொடிய தொற்று நோய்களுக்கு வருமுன் காக்கும் அருமருந்தாகும்.

கடவுள் - தானிருந்தான் உணர்ந்தெட்டே

கடவுள் - தானிருந்தான் உணர்ந்தெட்டே

நான் ஆத்திகனானேன்
அவன் அகப்படவில்லை
நான் நாத்திகனானேன்
அவன் பயப்படவில்லை



'உடல் தன் தேவையை அடையாமல் இருக்க முடியாது.'

'வெகுதூரம் பயணம் செய்யும் ஒருவன் தன் குதிரையை எப்படி பராமரிப்பானோ, அப்படி உடலை பராமரிக்க வேண்டும்.'

'அள்ள அள்ளக் குறையாத பொக்கிஷம் என்னிடம் இருப்பதை எடுத்துக் கொள்ள சொல்கிறேன்.'

'பசித்து நிற்கும் ஒரு நாய்க்கு நீ அளிக்கும் உணவு, என் பசியை தீர்க்கிறது.'

தன்னுடைய தேவைக்கு கூட அன்பர்கள் அளிக்கும் பொருட்களை சேமிக்காது, உடனே தேவையானவர்களுக்கு கொடுத்து விடும் பேரன்பை மனதில் கொண்டிருந்த ஷீரடி சாய்பாபா அவர்களின் சாய் சத் சரிதத்திலிருந்து நான் புரிந்து கொண்ட அருள் வார்த்தைகள், மேலே குறிப்பிட்ட சொற்றொடர்கள்.

உலகில் எந்த மூலையில் இருந்தாலும் காலில் கயிறு கட்டி குருவியை இழுப்பதுபோல் இழுத்து உலக நன்மைக்கு பேரருள் வழங்கும் சாய்பாபா அவர்கள் என்னையும் இழுத்து அருள் வழங்கியுள்ளார் என்பதை நாளும் உணர்கிறேன்.

அதீதத் துரியத்தில் இயங்கி உலகெலாம் இன்றும் பேராசி வழங்கும் ஷீரடி சாய்பாபாவின் பொற்பாதங்களில் சங்கமிக்கும் அருள் பெற வேண்டுவோம்.


அதீதத் துரியத்து அறிவனாம்  ஆன்மா
அதீதத் துரியம் அதனால் புரிந்தால்
அதீதத்து எழுந்து அறிவாகிய மானன்
முதிய அனலில் துரியத்து முற்றுமே.
                                                                     - திருமந்திரம் 2199

அதீதத்துரியமாகிய பேருறக்க நிலையில், உயிர் மிக்க அறிவுடையதாக இருக்கும். தொடர்ந்து இந்நிலையில் உயிர் நிற்க இயலுமாயில், சுடர்விட்டெழும் ஆருயிரின் அறிவுச்சுடர் ஞானக்கனல் எனப்படும் நிலையை அடையும். இதுவே சீவாக்கினியில் உயிர் பேருறக்கம் கொண்டு பரம்பொருளை அடையும் நிலை.


உரிய நனா துரியத்தில் இவனாம்
அரிய துரிய நனவாதி மூன்றில்
பரிய பர துரியத்தில் பரனாம்
திரிய வரும் துரியத்தில் சிவமே.
                                                                     - திருமந்திரம் 2273

துரியம் என்னும் பேருறக்கத்தில், நனவு, கனவு மற்றும் உறக்கம் என்றடையும் போது, உயிர் பரம் என்னும் பரம்பொருள் தன்மையை அடையும். இதன் அடுத்த நிலையில், உயிர் பரம்பொருளுடன் கலந்து இறைவனாகவே விளங்கும்.

ஆதி யோகி சிவன். முதற் சித்தர் என  உணர்த்தப்பட்டவர் சிவன். எங்கும், எதிலும் நீக்கமற நிறைந்து நிற்கும்  பரம்பொருளுடன் ஒன்றி நின்றவன் சிவன். நம் வாழ்நாளில், மிக அருகில், நம்முடன் வாழ்ந்தவர் ஷீரடி சாய்பாபா என்னும் சிவன்.

அப்படியெனில், பரம்பொருள் என்பது யார்?

எவ்வுயிரும் எவ்வுலகும் ஈன்று புறம்பாய்
இருந்துதிரு விளையாட் டெய்தியும் பின்னர்
அவ்வுயிரும் அவ்வுலகும் ஆகியு நின்ற
ஆனந்த வெள்ளங்கண் டாடு பாம்பே.
                                                                   - பாம்பாட்டி சித்தர் பாடல் 9

அனைத்து உயிர்களையும், அனைத்து உலகங்களையும் படைத்து, அவைகளை ஆட்டுவிக்கும் பரம்பொருளே, அனைத்து உயிர்களாகவும், அனைத்து உலகங்களாகவும் ஆகி பேரானந்தமாய் நின்றான்.

இதுவே இறைவனின்  எட்டாவது குணம்.

அவன் திருவடிகளை பணிந்து  நிற்பதே பேரின்பம்.

கடவுள் - ஏழும்பர்ச் சென்றனன்

கடவுள் - ஏழும்பர்ச் சென்றனன்

என் காதுக்கு மொழி இல்லை
என் நாவுக்கு சுவை இல்லை
என் நெஞ்சுக்கு நினைவில்லை
என் நிழலுக்கும் உறக்கம் இல்லை


'சார், உங்களுக்கு ஒரு கவர் வந்திருக்கு. ட்யூ  அம்பது பைசா' - என்று சொன்ன போஸ்ட்மேனிடம், காசைக்கொடுத்து வாங்கிப் பார்த்தேன்.

தபால் கார்டு பத்து பைசா, இன்லேண்ட் லெட்டர் பதினைந்து பைசா மற்றும் கவர் இருபத்தைந்து பைசா ஸ்டாம்ப் ஒட்டினால் போதும். 

எனக்கு வந்த தபால் கவர்  ஸ்டாம்ப் ஒட்டாததால்,  ஒட்டியிருக்க வேண்டிய ஸ்டாம்ப் இருபத்தைந்து பைசா மற்றும் பெனால்டி இருபத்தைந்து பைசா ஆக ஐம்பது பைசா ட்யூ.

ஆனால், மூணு பத்து பைசா ஸ்டாம்ப் ஒட்டி இருக்கே!

'சார், போஸ்டல் ஸ்டாம்புக்கு பதிலா ரெவின்யு ஸ்டாம்ப் ஒட்டி இருக்காங்க'

அது ஒரு தீபாவளி வாழ்த்து அட்டை. அனுப்பியவர் பெயர் இல்லை. சுவாரசியமே இங்குதான் ஆரம்பிக்கிறது.

அனுப்பியவரை துப்பறிந்து, மனம் பரிமாறிய நேரத்தில் அவள் வாழ்வில் தந்தையை இழந்த துக்கம்.

தொடர்ந்த இன்னொரு துக்கம், அவளுக்கு திருமணம்.

'எங்கிருந்தாலும் வாழ்க' - என்று அவள் திருமணத்தில் பாடி விட்டு பேசாமல் இருக்க முடியவில்லை.

சோகம்.. சோகம்.. சோகம்..

MGR-க்கே காதல் தோல்வியா, என்னும் அளவுக்கு சோகம்.

'ராசாத்தி உன்ன காணாத நெஞ்சு காத்தாடி போலாடுது'- என்று தாடி விடாத விஜயகாந்தாய்   நாட்களை  ஓட்டினேன்.

ஐம்புலன்கள் தரும் இன்பத்தை அறியும் மனம், அவை ஒன்றுமே வாழ்வில் முக்கியம் இல்லை என  வாடி நின்றது.

ஐம்புலன்களை அறிந்து, மாயையை கடந்து, தவ நிலையில் துரியத்தை அடைய, துறவை ஏற்கும் அளவிற்கு வாழ்க்கையில் பிடிப்பற்ற வெறுப்பு.

துறவற தவ வாழ்வில், கடவுளின் ஏழாம் குணமான துரியம் என்னும் பேரொளி, பேருறக்கத்தில் மனிதன் அடைய முடியும் என்றால், இல்லற வாழ்விலும் இது ஒரு மார்க்கமோ என்ற மயக்கம் மனதினில் ஆடியது.


சத்தி சிவன் விளையாட்டால் உயிராகி
ஒத்த இருமாயா கூட்டத்து இடைஊட்டிச்
சுத்தம் அதுஆகும் துரியம் பிரிவித்துச்
சித்தம் புகுந்து சிவம்அகம் ஆக்குமே.
                                                                 - திருமந்திரம் 1771

சக்தி, சிவன் இருவரின் விளையாட்டான உலகும், உலகத்தில் தோன்றி உள்ள உயிர்க்கூட்டமும். மாயா மலம், கன்ம மலம் என்னும் இரு மாய நிலையிலிருந்து பிரிந்து, அறிவுடன் கூடி சித்தி நிலையில் பேருறக்கம்  கொள்ளும். இவ்விடத்தில், உயிர் சிவ நிலையை அடையும்.

அதீதத் துரியத்து அறிவனாம் ஆன்மா
அதீதத் துரியம் அதனால் புரிந்தால்
அதீதத்து எழுந்து அறிவாகிய மானன்
முதிய அனலில் துரியத்து முற்றுமே.
                                                                 - திருமந்திரம் 2199

தவ நிலையில் ஆறு ஆதாரங்களை கடந்து, அதீதத் துரியமாகிய பேருறக்க நிலையில், உயிர் மாயையிலிருந்து விடுபட்டு, அறிவுடையதாயிருக்கும். இப்படியே உறுதியாக அறிவோடு பொருந்தி பேருறக்க நிலையிலே நிற்க இயலுமானால், சுடர்விட்டெழும் ஆருயிரின் அறிவுச்சுடர்  ஞானக்கனல் எனப்படும் நிலை அடையும். இதுவே சீவாக்கினியில் சீவன் அடங்கும் பேருறக்கம்.

சித்தர்களே தங்கள் சித்தத்தில் துரிய நிலை எய்தியவர்கள் என்பதால் இவர்கள் சித்தர்கள் என அறியப்படுகிறார்கள்.

நல்ல ஆரோக்கியமான உடலில் மட்டுமே ஐம்புலன்களும் சிறப்பாக செயல்படும். இல்லறத்தார் ஐம்புலன்களின் இன்பத்தை அனுபவித்து, அவ்வழியில் இறை நிலை எய்த, உடலின் மேம்பாட்டிற்காக மூன்று வழிகளை பாடல்களின் மூலம் அறிவித்து சென்றிருக்கிறார்கள்.

1. மந்திரம்
                      ஐம்பத்தொரு  அக்ஷரங்களை உடலின்  ஒலியாக பிரித்து, உயிரோடும், மனதோடும் உறுதியாக  ஒன்றி நிற்க மந்திரங்கள். ஓம், நமக்ஷிவய மற்றும் பல.

2. யோகம் 
                      பிராணாயாமம் என்னும் மூச்சு பயிற்சியின் மூலம், உடலினை இயக்கும் பத்து வகையான வாயுக்களை சீராக வைத்திருத்தல், இன்னும் பல யோக முறைகள்.

3. மருந்து 
                       உட்கொள்ளும் உணவு, ஒவ்வாமையினாலோ, வேறு காரணங்களினால் விஷத்தன்மை பெற்று உடலில் தங்கி நோய் உண்டாக்கினால், அதனை நீக்கி  உடல் புத்துணர்வு பெற இயற்கை சித்த மருந்து வகைகள்.

மாயையை விட்டு விலகி நிற்கும் ஆற்றலே, இறைவனின் ஏழாம் குணமாக திகழ்கிறது.

கடவுள் - ஆறு விரிந்தனன்

கடவுள் - ஆறு விரிந்தனன்

ஆறு மனமே ஆறு அந்த
ஆண்டவன் கட்டளை ஆறு
சேர்ந்து மனிதன் வாழும் வகைக்கு
தெய்வத்தின் கட்டளை ஆறு



'நீ பேசும் வார்த்தையில் இருந்து வரும்  ஒலியை பிரித்து, ஒலியை வரி வடிவமாக கொண்டுவருவது எழுத்து' - கபிலர்,  'எழுத்து என்றால் என்ன?' என்று கேட்ட பறம்பு மலைத் தலைவன் வேள் பாரியின் தளபதிகளில் ஒருவனான நீலனுக்கு விளக்கினார்.

'ஒலி என்றால் என்ன?'
'ஒலி எப்படி உருவானது, எங்கிருந்து வருகிறது?'

ஆதியோடு அந்தம் இலாத பராபரம்
போதம தாகப் புணரும் பராபரை
சோதி அதனில் பரந்தோன்றத் தோன்றுமாம்
தீதில் பரையதன்  பால்திகழ் நாதமே.
                                                                  - திருமந்திரம் 381

பராபரம்  - சிவன்.    பராபரை - சக்தி.

சிவனுடன் [ஒளியுடன்], சக்தி இணைந்த நிலையில், பிறந்தது நாதம் என்னும் ஒலி. ஒளி/ஒலியில் தோன்றியதே  அணுக்களும் சகல உயிர்களும். அணுக்களின் கூட்டே, மனிதன் வாழும் அண்டமும், பேரண்டமும். எனவே, இந்த விதிக்கு  மனித உடல்  விலக்கல்ல.

உடலின்  உள்ளியக்கம் ஒலியினால் கட்டமைக்கப்பட்டுள்ளது.

ஐம்பொறிகளில் ஒன்றான, காது  உணரக்கூடிய ஒலியினை, வரி வடிவமாக்கி எழுத்து என வகைப்படுத்தி அறிந்து உள்ளோம்.

உடலினுள்  இயங்கக்கூடிய ஒலியினை,  எழுத்துக்கள் வடிவில், அக்ஷரம் என்று வகைப்படுத்தி உள்ளனர் நம் முன்னோர்கள். அதனை  கிரந்த எழுத்துக்கள் என்றும், ஆதி தமிழ்  எழுத்துக்கள் என்றும் நாம் அறிந்து வைத்துள்ளோம். ஐம்பத்தி ஒன்று என்ற எண்ணிக்கையை கொண்ட இந்த அக்ஷரங்கள், மூலாதாரத்திலிருந்து, ஆக்கினை வரை, ஆறு ஆதாரங்களின்  அடித்தளமாக அமைந்துள்ளது.

ஆறு ஆதாரங்களும், ஐம்பத்தியொரு அக்ஷரங்களும்:

1 மூலாதாரம்  -  [வ, ச, ஷ, ஸ] - 4 
2 சுவாதிட்டானம்  - [ப3, ப4, ம, ய, ர, ல] - 6
3 மணிபூரகம் - [ட3, ட4, ண, த, த2, த3. த4, ந, ப, ப2] - 10
4 அனாகதம் - [க, க2, க3, க4, ங, ச, ச2, ஜ, ஜ2, ஞ, ட, ட2] - 12
5 விசுத்தி - [அ, ஆ, இ, ஈ, உ, ஊ, ரு, ரூ, லு, லூ, ஏ, ஐ, ஓ, ஒள, அம், அஹ] - 16
6 ஆக்கினை - [ஹ, ள] - 2
                                                                                                                         - போகர் 7000

ஒவ்வொரு அக்ஷரமும் ஒவ்வொரு தாமரை மலர் இதழ்களாக, ஆறு ஆதார சக்கரம்தோறும்  உவமைப்படுத்தப்பட்டுள்ளது. ஐம்பத்தியோராவது அக்ஷரமாக 'க்ஷி' தலையின்  உச்சியில் நிற்கிறது.

மேல்என்று கீழ்என்று இரண்டறக் காணுங்கால்
தான்என்றும் நான்என்றும் தன்மைகள் ஓராறும்
பார்எங்கும் ஆகிப் பரந்த பராபரம்
கார்ஒன்று கற்பகம் ஆகி நின்றானே.
                                                                                 - திருமந்திரம் 1706

'தான்' என்று ஒளி உடலுடன் தன்மயமாகும் நிலையும், 'நான்' என்று திட உடலாய் மனிதன்  உணரும் தன்மையும் ஆறு ஆதாரங்களின் குணத்தினால் உண்டானது. ஆறு ஆதாரங்களையும் ஒன்றாக காணும் பரம்பொருள், பேரண்டமாக நிலைத்து நிற்கிறான்.

ஆறு அந்தமும் கூடிஆகும் உடம்பினில்
கூறிய ஆதாரம் மற்றும் குறிக்கொள்மின்
ஆரிய அக்கரம் ஐம்பதின் மேலாக
ஊறிய ஆதாரத்துஓர் எழுத்து ஆமே.
                                                                                  - திருமந்திரம் 1709

ஆறு ஆதாரங்களுடன் அமைந்த இவ்வுடல், ஐம்பத்தியொரு அக்ஷரங்களை கொண்டிருந்தாலும், அவற்றின் அடித்தளம், 'ஓம்' என்னும் பிரணவத்தை  ஆதாரமாய் ஏற்று நிற்கிறது.

இதுவே இறைவனின் ஆறாம் குணமாகும்.

*** ***