பாறாங்கல்

பாறாங்கல் 

'அந்த ரெண்டு பாறையும், கொஞ்ச நாள்ல ஒண்ணா சேந்துரும்' 

நீங்கள் பார்த்துக்கொண்டிருப்பது, வெள்ளியங்கிரி ஏழாவது மலையின் உச்சியில் அமைந்துள்ள வெள்ளியங்கிரி நாதரின் குகைக்கோவிலின் நுழைவு வாயில். 

பத்து வயதில், பெரியம்மாவுடன் மலை ஏறியபோது இரண்டு பாறைகளின் இடையே நல்ல இடைவெளி இருந்தது. ஒரு ஐம்பது வருட இடைவெளியில், அவ்விரு  பாறைகளுக்கு இடையே இடைவெளி இல்லை.

'அவையினர் கருத்து சொல்லலாம்', சிம்மக்குன்றில்  உள்ள பாறைகளை கொண்டு   எல்லைக்கோட்டையை நிர்மாணிக்க எண்ணிய அரசனுக்கு, கருத்து சொல்ல அரசவையை கேட்டுக்கொண்டான் மந்திரிப்பிரதானி.

'பேரரசே, கற்கள் மிகவும் உயர்ந்த தரத்தில் இருப்பதால், அவைகளை நம் கால வரலாற்றை பிரதிபலிக்கும் கடவுள் சிலைகளாக வடித்து, சிற்பக்கூடமாகவும், கோயிலாகவும்  மாற்றலாம்' என்றான்  தலைமை சிற்பி.

' மன்னா, நம் தலைமை சிற்பி சொன்னது போல், கற்கள் நல்ல தரமாக இருப்பதால், அதனை அறுத்து, மெருகூட்டி நல்ல விலைக்கு வெளிநாடுகளில் விற்று  வாணிபம் செய்தால், பொருளாதாரத்தில், நம் நாட்டுக்கு இணை யாரும் இருக்க முடியாது'- இது  நிதி மந்திரி.

'பாறைகளை அகற்றி கோட்டை கட்டுவது, அதனை கடவுளாக்குவது அல்லது அதனை அறுத்து வாணிபம் செய்வது, இவை நாம் நம் சந்ததியினர்க்கு செய்யும் துரோகம் ஆகும்' - என்றார் எதனையும் மாறுபட்டு சிந்திக்க வேண்டும் என்ற  சித்தாந்தம் கொண்ட பகுத்தறிவுப்பிரசங்கி . 

திருக்குறள்-423

எப்பொருள் யார்யார்வாய்க் கேட்பினும் அப்பொருள்
மெய்ப்பொருள் காண்ப தறிவு.

                                                                                                        

மன்னனுக்கு காவல் முக்கியம். சிற்பிக்கு தன்னுடைய திறமை முக்கியம். நிதி மந்திரிக்கு நிதி முக்கியம். பகுத்தறிவுவாதிக்கு தன்முனைப்பு முக்கியம். அவரவர் அறிவுக்கேற்ப பாறைகளின் மெய்ப்பொருள்  மாறுபடுகிறது.

திருமூலர் எப்படி சொல்கிறார் பாருங்கள்; உங்கள் பார்வைதான் முக்கியம்.

திருமந்திரம்-2290

மரத்தை மறைத்தது மாமத யானை 
மரத்தில் மறைந்தது மாமத யானை 
பரத்தை மறைத்தது பார்முதல் பூதம் 
பரத்தில் மறைந்தது பார்முதல் பூதமே.                                                                                                                                                                                                          

மரத்தால் செய்யப்பட்ட யானையை பார்க்கையில், யானையாக பார்த்தால் மரம் தெரிவதில்லை. மரத்தின் தன்மையை பார்த்தால் யானை தெரிவதில்லை. இவ்வுலகில் ஐம்பூதங்களை பார்த்தால் அதில் உறையும் பரம்பொருள் தெரிவதில்லை. கண்ணால் காண்பவை எல்லாம்  பரம்பொருளாகப்பார்த்தால் ஐம்பூதங்கள் தெரிவதில்லை.

இவ்வளவு பெரிய  பாறைகள் எப்படி உருவாகி இருக்க முடியும். அதை யார் தூக்கி இவ்வளவு உயரத்தில் வைத்திருக்க முடியும்? தானாகவே, இறையருளால், அணுவாகி, மூலக்கூறாகி, பாறையாகி  இருந்தால் தொடர்ந்து வளர்ந்து கொண்டே இருக்க வேண்டுமே.

வளர்ந்து கொண்டே இருப்பதன் சாட்சிதான் வெள்ளியங்கிரி மலை உச்சியில் நான் கண்ட பாறைகளின் இணைப்பு.

*** *** ***

 

லங்கனம்

 லங்கனம் 

வாழ நினைத்தால் வாழலாம்  வழியா இல்லை பூமியில் ஆழக் கடலும் சோலையாகும்  

ஆசை இருந்தால் நீந்தி வா 

லங்கனம் எனப்படும் பரம மருந்தின் மூலம், உடல் தனக்கு வரும்  நோய்  மற்றும்  உபாதைகளில் இருந்து தன்னைத்தானே சமநிலைப்படுத்திக்கொள்ளும். லங்கானத்தை சாதாரண மனிதர்களும் பயனுறும்  வண்ணம் நான்கு வகையாக முறைப்படுத்தியுள்ளார்கள்.

1. உடலின் தேவைக்கு மட்டும் உண்ணுதல் 
2. முறையாக மூச்சு விடும் பழக்கத்தை மேற்கொள்ளுதல்
3. தேவையானதை மட்டும் கருத்தூன்ற பேசுதல் 
4. தன்னையே நினைந்து அமைதியாக இருத்தல் 

இவ்வளவு சிறப்பான கருத்தை திருமந்திரத்தில் தேடினேன். திருமூலர் ஒரு படி மேலே சென்று, உடலை ஏன் நன்கு கவனித்து கொள்ள வேண்டும் என்று ஆரம்பித்து லங்கானத்தில் உள்ள அனைத்து வகைகளையும் விளக்கி சென்றிருப்பது நமக்கு கிடைத்த பாக்கியமே.

உடம்பை வளர்த்தல் 

உடம்பை வளர்க்கும் உபாயத்தை அறிந்தவர், தானும் வளர்த்து நமக்கும் அதை அளித்து சென்றுள்ளார்.

உடம்பார் அழியில் உயிரார்  அழிவர் 
திடம்பட மெய்ஞ்ஞானம் சேரவும் மாட்டார் 
உடம்பை வளர்க்கும் உபாயம் அறிந்தே 
உடம்பை வளர்த்தேன் உயிர் வளர்த்தேனே.

                                                                           - திருமந்திரம் 724

தேவைக்கு மட்டும் உண்ணுதல்

உடலில் உயிர் நிலைத்திருக்க, நாம் உண்ணும் அளவில் கருத்து கொண்டு உடலின் தேவைக்கு மட்டும் உண்ண வேண்டும்.

அண்டம் சுருங்கில் அதற்கோர் அழிவில்லை 
பிண்டம் சுருங்கில் பிராணன் நிலைபெறும் 
உண்டி சுருங்கில் உபாயம் பலஉள
கண்டம் கறுத்த கபாலியும் ஆமே.

                                                                              - திருமந்திரம் 735

மூச்சுக்காற்றை முறைப்படுத்துதல் 

நாம் சுவாசிக்கும் காற்று, உட்செல்லுதல், வெளியேறுதல் மற்றும் தங்கி இருத்தல் எனும் மூன்று தன்மையதாகவும், நாம் உணர உட்செல்லுதல், வெளியேறுதல் மட்டும் நடை பெற்றுக்கொண்டிருக்கிறது. உட்தங்கும் காற்றின் நேரத்தை அதிகப்படுத்தி பயிற்சி செய்ய உடம்பு நிலைத்து வாழும்.

மூன்று மடக்குஉடைப் பாம்புஇரண்டு எட்டுள
ஏன்ற இயந்திரம் பன்னிரண்டு அங்குலம்தான் 
நான்றவிழ் முட்டை இரண்டையுங் கட்டியிட்டு
ஊன்றி இருக்க உடம்பு அழியாதே.

                                                                            - திருமந்திரம் 725 

அளவறிந்து பேசுதல்

முறையாக முயன்று, பேசும் பேச்சை கட்டுப்படுத்தி,  உடலை வலுப்படுத்திக்கொள்ள வேண்டும். இதில் மறைந்துள்ள உண்மை என்ன வென்றால், நாம் எண்ணியதை எல்லாம் ஊருக்கு  சொல்லி பறைசாற்ற  வேண்டிய அவசியமில்லை. 

முறை முறை ஆய்ந்து  முயன்றிலர் ஆகில் 
இறைஇறை யார்க்கும் இருக்க அரிது 
மறையது காரணம் மற்றோன்றும் இல்லை 
பறைஅறை யாது பணிந்து முடியே.

                                                                                - திருமந்திரம் 748

தன்மயமாக திளைத்திருத்தல்

ஓவியம் போல் ஆடாமல் அசையாமல் ஒன்றில் ஒன்றிக்  கலந்து இலயிக்கின்ற அறிவுணர்வைப்பெறுங்கள். அக்கினி, சூரியன், சந்திரன் ஆகிய மூன்று மண்டலங்களிலும் மூலாதாரத்திலிருந்து தினமும் சஞ்சரியுங்கள்.  

ஓவிய மான  உணர்வை அறிமின்கள்
பாவிகள் இத்தின் பயனறி வார்இல்லை 
தீவினையாம் உடல் மண்டலம் மூன்றுக்கும் 
பூவில் இருந்திடும் புண்ணியத் தண்டே.

                                                                                   - திருமந்திரம் 751

இந்த பாடல்கள், மனித குலத்திற்கே பெரு நன்மை விளைக்கும் அற்புதமானவை. நோயெதிர்ப்பு சக்தி கிடைக்க, பெருந்தொற்றுகளில் இருந்து மனித சமுதாயம் விடுபட மிகவும் உதவிகரமாக இருக்கும்.

 

  

இறைநிலா

இறைநிலா

எங்கே எங்கே கொஞ்சம்                                                                                                         நான் பாக்கிறேன்                                                                                                                 கண்ண மூடு கொஞ்சம்                                                                                                         நான் காட்டுறேன்

காணொளி:

கண்களை மூடி, புருவ மத்தியில் உதிக்கும் நிலவுக்காக, உறங்காமல் தவம் இருந்தால், மாங்காய்ப்பால் எனப்படும் வானீர் அமிர்தமாக  கிடைக்கும். நிலவொளியை கண்டு  உடல் முழுதும் பரவும் வரை உறக்கமின்றி தவமிருப்பவன் கண்கள், புற உலக நடப்புகளில் நாட்டம் கொள்ளா உறக்கம் கொண்டுவிடும்.

சசிஉதிக்கும் அளவும் துயில் இன்றி 
சசி உதித்தானேல் தனது ஊண் அருந்திச் 
சசிசரிக்கின்ற அளவும் துயில் இன்றிச்
சசிசரிப்பின் கட்டன் கண்துயில் கொண்டதே.

                                                                                             - திருமந்திரம் 873

அவ்வளவு எளிதில் அமுதைப்பொழியும் நிலவை பார்த்து விட முடியாது. அதற்கான வழியையும் திருமூலர் சொல்கிறார்:

அட்டாங்க யோகம் எனப்படும் கீழ்கண்ட பயிற்சிகளை மேற்கொள்ள வேண்டும்.

1. இயமம் - உலக ஜீவராசிகள் நலமுடன் வாழும் வகையில் ஒழுக்கமான வாழ்க்கை நடைமுறையை அமைத்துக்கொள்ளுதல் 

2. நியமம் - ஒழுக்கமான வாழ்வே  தவமாய் மேற்கொள்ளுதல்  

3. யோகாசனம் - பல்வேறு  யோகாசனங்களின் மூலம் உடலும், மனமும் ஒத்திசைந்து  தவத்தில் முன்னேறுதல் 

4. பிராணாயாமம் - உடலில் உள்ள பிராண சக்தியை வளம் பெற செய்து தவத்தின் அடுத்த நிலைக்கு செல்லுதல்  

5. பிரத்தியாகாரம் - ஐம்புலன்களை  பலவந்தமாக அடக்காமல், அதன் வழி சென்று தன்மயமாக்கி,  அகத்தின் உள்நோக்கிய பார்வை கொள்ளுதல்  

6. தாரணை  - உள்ள வெளியில் உருவேற்றியவாறு, மேற்கூறிய நிலையில் தொடர்ந்து இரவும் பகலும்  உலா வருதல் 

7. தியானம் - உடலும், மனமும்  ஒரு நிலைப்பட்டு உயிர் வெளியை புருவ மத்தியில் காண்பதற்கான தியானம் மேற்கொள்ளுதல்  

8. சமாதி - காணாக்கண், கேளாசெவியென ஐம்புலன்களும் அடங்கி இருக்க, குளிர் நிலவு  புருவ மத்தியில் தோன்றுமவதை காணுதல்.

இயம நியமமே எண்ணிலா ஆதனம் 
நயமுறு பிராணாயாமம் பிரத்தி யாகாரம் 
சயமிகு தாரணை தியானம் சமாதி 
அயமுறும் அட்டங்கம் ஆவது மாமே.

                                                                             - திருமந்திரம் 552

இதுவே நம் உடலில் உள்ள பரமாத்மாவுக்கு நாம் செய்யும் பூசையாகும். இந்த பூசையால், நாம் மீண்டும் பிறவி எடுக்காமல் அந்த இறைவனோடு ஒன்றி இருக்கலாம். பூசைகளில் ஈடுபடாதவர்களின் உடலிலும் அந்த இறைவன் வாழ்கிறான்.

பகலும் இரவும் பயில்கின்ற பூசை 
இயல்புடை ஈசர்க்கு இணை மலராகப் 
பகலும் இரவும் பயிலாத பூசை 
சகலமும் தான் கொள்வன் தாழ்சடையோனே. 

                                                                                 - திருமந்திரம் 1855

இறைவனடி சேர்ந்தால்தான் பிறவியாகிய பெருங்கடலை நீந்தி, இறைவனின் திருவடிகளை சேர முடியும் என்று வள்ளுவரும் வழி காட்டி இருக்கிறார்.

பிறவிப் பெருங்கடல் நீந்துவர் நீந்தார்
இறைவன் அடிசேரா தார்.

                                                                                        - திருக்குறள் 10

இயற்கை நுண்ணறிவு

இயற்கை நுண்ணறிவு

கோவில் பெண் கொண்டது                                                                                                            தெய்வம் கண் தந்தது  

'திரைப்பட பாடல் நிகழ்ச்சிக்கு, இரு நூற்றைம்பது டாலர் ரொம்ப அதிகம், என்று நிகழ்ச்சி உபயதாரர் கொடுத்த ஓசி டிக்கெட்டில் சிட்னி  ஓபரா ஹவுசில் உட்கார்ந்து யோசித்து கொண்டிருந்த என்னை தூக்கிவாரிப்போட்டது,  சபரி மலை சன்னிதானத்தில் தேவகானம் ஒலிக்கும் குரலுக்கு சொந்தக்காரரான  யேசுதாஸ் அவர்கள் நிகழ்ச்சியில் பாடிய முதல் பாடல்.'

'விழியே கதை எழுது.. கண்ணீரில் எழுதாதே..'  

என்னுடைய கல்லூரி நாட்களில், அன்றைய காலகட்டத்திற்கு , மிகவும்  அழுத்தமான  காதல்  சோகப்பாடல் அது .  கேட்டு உருகாத நாளில்லை. இன்றும்கூட கேட்கும்போது இனம் புரியாத இனிய குறுகுறுப்பு. ஒருதலைக் காதல் தோல்வி யாருக்குத்தான் இல்லை.

கவியரசர் கண்ணதாசனின் இந்த பாடலில் வரும்  'கோயில் பெண் கொண்டது, தெய்வம் கண் தந்தது' - பொருள் உணர எவ்வளவோ நாட்கள் தலைப்பட்டிருக்கிறேன்;  திருமந்திரத்தில் எனக்கு விளக்கம் கிடைக்கும் என எண்ணிப்பார்த்ததில்லை.

திருமந்திரம்-1823

உள்ளம் பெருங்கோயில் ஊனுடம்பு  ஆலயம் 

வள்ளல் பிரானாற்கு வாய் கோபுரவாசல்

தெள்ளத் தெளிவார்க்கு சீவன் சிவலிங்கம் 

கள்ளப்  புலன்ஐந்தும் காளா  மணிவிளக்கே.

                                                                           

 

மனிதனின் உடலே ஆலயமாகவும், உள்ளம் ஆலயம் தாங்கிய கோயிலாகவும்,

கோபுரத்தின் வாசலாக வாய்,  ஜீவாத்மாவே சிவலிங்கமாகவும், அழகிய ஒளி விளக்குகளாக  ஐம்புலன்களும் அமைந்துள்ளன.

இந்திரியங்களின் ஆற்றலால் புலன்கள் அகமும், புறமும் அறியும் தன்மை உள்ளன  ஐம்புலன்கள். ஆனால், புற உலகை மட்டுமே காட்டி மனிதனை வழிநடத்துவதால் ஐம்புலன்கள் கள்ளப்புலன்கள் எனப்பட்டன.

திருமந்திரம்-119

அறிவைஐம் புலனுடனே  நான்ற தாகி 
நெறிஅறி யாதுற்ற நீராழமும் போல 
அறிவு அறிவுள்ளே அழிந்தது போல 

குறி அறி விப்பான் குருபரன் ஆமே.

                                                                              

கள்ளத்தனம் புரியும் ஐம்புலன்கள் வழியாக அறிவு செல்லும்போதும்,  ஆழம் அறியாமல் நீரில் இறங்கி தத்தளிக்கும் போதும், இப்பிறவியில் பெற்ற அறிவே, அறிவை அழிக்கும் அஹங்காரமாக மாறும்போது, பல பிறவிகளில் நாம் செய்த நல்வினைப்பயனால், நமக்கு நல் வழி கட்டுவது அந்த இறைவனே ஆகும். 

இந்த நல்வழிப்பயனாலே நாம் முற்பிறவிகளில் பெற்ற கல்வி, அனுபவ அறிவு ஏழு பிறவிகளிலும்  தொடர்ந்து வரும்.

திருக்குறள் 398

ஒருமைக்கண் தான்கற்ற கல்வி ஒருவற்
கெழுமையும் ஏமாப் புடைத்து.

                                                             

தொடர்ந்து வரும் பிறவிகளில், தான் முந்தைய பிறவிகளில் கற்ற  கல்வி அறிவினை அவனுடைய நுண்ணறிவு  அறிவிக்கும். 

 

திருக்குறள் 373

நுண்ணிய நூல்பல கற்பினும் மற்றுந்தன்

உண்மை யறிவே மிகும்

                                                             

எவ்வளவு அரிதான நுண்ணிய அறிவு வழங்கும் நூல்களை கற்றிருந்தாலும், உண்மை அறிவு என்று அறியப்படும், முந்தைய பிறவிகளில் பெற்றிருந்த நுண்ணறிவு எனப்படும் இயற்கை  அறிவே மேலோங்கி நிற்கும்.

நுண்ணறிவை பெற, இறைவனின் அருளாசி நமக்கு வேண்டும். 

*** *** ***

அனுபவம் புதுமை

அனுபவம் புதுமை 

பனிபோல் குளிர்ந்தது 

கனிபோல் இனித்ததம்மா

ஆஹா மழைபோல் விழுந்தது 

மலராய் மலர்ந்ததம்மா   

காணொளி:

https://www.youtube.com/watch?v=i5MJkC6TU7o

'பல பிறவிகளில் உங்கள் ஆன்மா சேமித்த கர்ம வினைகளும், இப்பிறவியில் நீங்கள் கொண்ட அனுபவமும் உங்கள் பார்வையில் மாயையாய் படிந்திருக்கிறது' - என்றான் கண்ணன், தன்  முன்னே 'நல்லவன்  ஒருவனையும் காண முடியவில்லை' என்ற துரியோதனனையும், 'தீயவர் ஒருவரையும் காணவில்லை' என்று  வணங்கி நின்ற தர்மரையும் பார்த்து. 

விளக்குப் புகஇருள் மாய்ந்தாங்கு ஒருவன்
தவத்தின்முன் நில்லாதாம் பாவம் - விளக்குநெய்
தேய்விடத்துச் சென்றிருள் பாய்ந்தாங்கு நல்வினை
தீர்விடத்து நிற்குமாம் தீது.

                                                                                                           - நாலடியார் 

தவம் செய்யும் ஒருவனிடம் எவ்வித பாவமும் நில்லாது, ஒளி பாய்ந்த இருட்டறையில் இருள் மறைவதைப்போன்று, என்று தவத்தில் பெருமையை விளக்குகிறது இப்பாடல்.

'ஆமா, காய்கறிகள், தேங்காய் எல்லாம் சாப்பிட்றத மட்டும்தான் சமைக்க முடியும். மிச்சம் குப்பைதான். வேணுன்னா நீங்களும், உங்க வீட்டாட்களும் அப்படியே தின்னுங்க' என்று பொரிந்தாள்  குமுதா,'சாப்பிட்றதுக்கு  தினமும்  வாங்கும் பொருளின் அளவுக்கு சமமா குப்பையா போடுறோம்' - என்ற கணவனைப்  பார்த்து.

யாக்கையை யாப்புடைத்தாப் பெற்றவர் தாம்பெற்ற
யாக்கையா லாய பயன்கொள்க - யாக்கை
மலையாடு மஞ்சுபோல் தோன்றிமற் றாங்கே
நிலையாது நீத்து விடும்.

                                                                                                           - நாலடியார்

உடலில் உள்ள உயிரானது, மலையிடை தோன்றும் மேகத்தைப்போல் மறைந்து விடும். உடல் பெற்றதால் ஆய பயனான தவத்தை மேற்கொண்டு, தன்  பாவங்களை களைந்து பிறவிப்பயன் பெறுதல் வேண்டும்.

'நல்லா கேட்டுக்குங்க. கொஞ்ச கொஞ்சமா தன்னையே முறையா சிதைச்சிகிட்டாதான், [பட்டை தீட்டிய] வைரமே  ஜொலிக்க முடியும்.'

மெய் வருத்தம் பாரார், பசி நோக்கார் கண்டுஞ்சார் 

எவ்வெவர் தீமையும் மேற்கொள்ளார் - செவ்வி 

அருமையும் பாரா ரவமதிப்புங்  கொள்ளார் 

கருமமே கண்ணாயி னார்.

                                                                                          - நீதிநெறிவிளக்கம் 

தவம் மேற்கொள்வார்க்கும் இது சரியாக பொருந்தும். தன்  உடலையே ஆதாரமாக கொண்டு இயற்றக்கூடிய தவத்தின் சிறப்பை திருமூலர் சொல்வதைக்கேட்போம்.

கோணா மனத்தைக்  குறிக்கொண்டு கீழ்க்கட்டி 

வீணாத் தண்டூடே வெளிஉறத் தான்நோக்கிக் 

காணாக்கண் கேளாச் செவிஎன்று இருப்பார்க்கு 

வாழ்நாள் அடைக்கும் வழிஅது வாமே.

                                                                                                   - திருமந்திரம் 588

உறுதியான மனநிலையில், தியானத்தில் லயித்து, கண்களும், காதுகளும் செயல் மறந்து, உள்ளொளியில்  உறைவோர்க்கு வாழ்நாள் அழியாமல் நிலைக்கும்.