எமதர்பார்

எமதர்பார் 

ஒரு தவறு செய்தால்
அதை தெரிந்து செய்தால்
அவன் தேவன் என்றாலும்
விட மாட்டேன்


காணொளி:
https://www.youtube.com/watch?v=Mu9oQL3d31A

வார்டு கவுன்சிலரைக்கண்டால் பயம். அவன் கொடி கட்டி செல்லும் காரைக் கண்டால் பயம். அடைமொழி இல்லாமல் பேரை சொல்லவும்  பயம். பேரோடு 'சார்' சொல்லாவிட்டால் பயம். புதிதாக சேர்ந்திருக்கும்  'ஜி' சொல்லாமல் விட்டாலும்  பயம். அரசு அதிகாரிகளை கண்டால் பயம். இவர்களை மொய்க்கும் காவலரைக் கண்டால் பயம். அவர்கள் கையில் உள்ள லத்தியை கண்டால் அதிக  பயம். காவல் நிலையம் என்னும் கொலைக்களம் சென்றால்,  எமனையே நேரில்  கண்ட  பயம்.

இதுதான் உலகின் மிகப்பெரிய ஜனநாயக நாட்டின் சாதாரண குடி மக்களின் நிலை. அரசியலமைப்பு சட்டத்தில், படிக்காதவன் வயது வரம்பின்றி, அரசாளலாம், நூற்றி முப்பது கோடி மக்களின்   நலன் சார்ந்த முடிவை எடுக்கலாம்.

உண்மை அறிவு என்று சொல்லக்கூடிய நுண்ணறிவும், நுண்ணிய நூல் பல கற்று பெறக்கூடிய அறிவும், அனுபவத்தால் பெற்ற அறிவும், நல்வழி காட்டி நின்ற குருவின் வழி அறிவும், உலக நிகழ்வு அறிவும் கொண்ட தலைவன் ஒருவனே நம்மை காக்க முடியும்.

'கம்ப ராமாயணத்தை வழங்கிய சேக்கிழார்', 'யானை வரும் முன்னே மணி ஓசை வரும் பின்னே'- போன்ற அற்புத அறிவு  வாய்க்கப்பெற்றவர்களை தலைவர்களாக பெற என்ன தவம் செய்தாளோ தமிழன்னை!

கல்லா அரசனும் காலனும் நேரொப்பர்
கல்லா அரசனின் காலன்  மிகநல்லன்
கல்லா அரசன் அறம்ஓரான்  கொல்என்பான்
நல்லாரைக்காண காலன் நணுகநில் லானே.
                                                                             - திருமந்திரம் 238

படிப்பறிவற்ற மக்களாட்சி செய்யும் அரசியல்வாதியும், அவன் ஆணைக்கு அடிபணிந்து பணிபுரியும் காவலர்களும், மக்களின் உயிரை தன்  பாசக்கயிற்றால் எடுக்கும் எமனுக்கு ஒப்பானவர்கள். ஆனாலும், படிப்பறிவற்ற அரசியல்வாதியைவிட எமன் மிகவும் நல்லவன். ஏனென்றால், படிப்பறிவற்ற அரசியல்வாதி ஆராய்ந்து மக்களுக்கு நல்லது செய்ய மாட்டான்,  மக்களின் உண்மை நிலை ஆராயாமல் கொன்று குவிக்க சொல்வான். ஆனால், எமனோ நல்லவர்களை கண்டமட்டில், அவர்தம்  அருகில்கூட  சென்று நிற்க மாட்டான்.