அக்னிபாத்

அக்னிபாத்  

'அக்னிபாத் இளைய சமுதாயத்திற்கு கிடைத்த மிகப்பெரிய வரப்பிரசாதம். கொள்கையற்ற எதிர்க்கட்சிகளின் பொய் பிரச்சாரம் மக்களிடம் செல்லாது.' - கட்சி மாநாட்டு மேடையில்,  அக்னிபாத் எதிர்ப்பாளர்களை  தலைவர் விளாசிக்கொண்டிருந்தார்.

'அக்னிபாத்னா என்னங்க?' - தலைவர் யாரோ பொய் பரப்புறதா சொல்றார். 

'எனக்கும் சரியா தெரியல. அவர்  கர்நாடகாகாரர் தானே? பிசிபேளாபாத் மாதிரி ஏதாவது இருக்கும். எப்படியும் சாப்பிடும்போது பாத்துக்கலாம்.'

'அப்ப.. சாப்பாடு ஐட்டத்துல ஒரு கை பாத்துரவேண்டியதுதான். சீக்கிரம் போயிருவோம். இல்லன்னா போன மாநாடு மாதிரி கெடைக்காம போயிரும்.'

'சை.. மிலிட்டரிக்கு ஆள் எடுக்கிறது, அக்னிபாத். அது சாப்பாடு இல்ல' - கொஞ்சம் விவரம் தெரிந்தவர் சொன்னார்.

'இளைஞர்களுக்கு கிடைக்கவிருக்கும்  ஒரு அற்புத வேலை வாய்ப்பு  இந்த மிலிட்டரிக்கு ஆள் எடுக்கும் அக்னிபாத்  முறை.  நான்கே வருடத்தில் லட்சக்கணக்கான பணத்துடன் ஓய்வு பெற்று விடுவார்கள். பதினேழரை வயதிலிருந்து இருபத்து மூன்று வயது வரை வயது  வரம்பு.' - தலைவர் திட்டத்தை விவரித்துக்கொண்டிருந்தார்.

'ஓய்.. ஓம் பையன் இந்த வருஷம் பிளஸ் டூ முடிக்கிறான்தானே. தலைவர்கிட்ட சொல்லி சேத்து விட்டுரு.'

'சேத்து விட்டுட்டு..? இருபத்தோர் வயசுல,  நல்லா மிலிட்டரி சரக்க போட கத்துகிட்டு வருவான். மிச்ச இருக்கிற வருஷத்துக்கெல்லாம் எவன் சோறு போடுவான்?'

'வேற வேல கெடைக்காதா, என்ன?'

'கெடைக்கும்னா, அங்கேயே வச்சுக்க மாட்டாங்களா? இருபத்தஞ்சு சதவீதம் மட்டும் வச்சுகிட்டு மத்ததை கழிசடைனு அவங்களே கழிக்கும்போது, இங்கே யார் வேலை குடுப்பாங்க?'

'என்னமோ போங்க. தலைவர் பேச்ச கேப்போம்.'

இந்த தலைவனும், தலைவன் என்ற குறிகட்டி, மேயும் வறள் பசுதான்..

கொற்ற பசு குறி கட்டி மேயினும் வறள் பசுவே!

***  ***  ***

விருந்துக்கு வந்த ஒருவர் தவறாமல், தற்செயலாக வருவதுபோல், விருந்து ஏற்பாடு செய்யப்பட்டிருந்த  அறைக்கு வந்து சென்றனர். பார்த்த சில பெண்களின் மார்பகங்கள் விம்மி இறங்கியதைப்பார்க்கும்போது, பொறாமையின் உச்சிக்கே சென்று வந்தவர்களைப்போல் தோன்றினார்கள்.

விருந்துக்கு தேவையான அனைத்து பாத்திரங்களும், கிண்ணங்களும் தங்கத்தாலும், வெள்ளியாலும் மின்னிக்கொண்டிருந்தது, விருந்து மேடையில்.  இவைகள் யாருடைய கவனத்தையும் ஈர்க்கவில்லை. விருந்துக்கு தலைமை ஏற்கும், நெப்போலியனின் இருக்கைக்கு நேராக வைத்திருந்த கிண்ணங்களும், தட்டுகளும், ஸ்பூன்களுமே அனைவரின் எண்ணத்தை ஆக்கிரமித்திருந்தது.

பத்தொன்பதாம் நூற்றாண்டின் புதிய கண்டுபிடிப்பான அலுமினியத்தால் செய்யப்பட்ட உணவு கிண்ணங்களே அவைகள். நெப்போலியனுக்கென்றே பிரத்தியேகமாக தயாரிக்கப்பட்டிருந்தது.

இன்றைக்கு, ஒருவரின் வறுமை நிலையை சொல்ல வேண்டுமானால் , அவரின் சொத்து ஒரு அலுமினிய தட்டும், ஒடுங்கிய டம்ளரும் என்று சொல்லுகிறோம்.

ஒரு அரசனுக்கு நிகரான நெப்போலியன் தன்னை தனித்து காட்ட, தன்னையே கீழ்மை படுத்திக்கொண்ட கதை இது.

கொற்ற பசு குறி கட்டி மேயினும் வறள் பசுவே!

***  ***  ***

'நீ போட்டுட்டியா?'

'இல்ல. ஆனா ரெண்டு போட்ட மாதிரி செர்டிபிகேட் வாங்கிட்டேன்.'

'பூஸ்டர் வேற போடணுமாம்'

'விட்றா.. இன்னொரு செர்டிபிகேட் வாங்கிட்டா போச்சு.'

'ஜனநாயக நாட்டில் முகக்கவசம் மற்றும் தடுப்பூசி கட்டாயம் என்பது சட்ட விரோதம்.' - என்பது ஒரு சாராரின் வாதம். 

'முகக்கவசம் போடாமல் பொது இடங்களில் நடமாடக்கூடாது. தடுப்பூசி போடவில்லை என்றால் பயணங்கள் சாத்தியமில்லை.' - இது அரசாங்கத்தின் நிலைப்பாடு.

இதைவிட பெரிய கூத்து உலக சுகாதார நிறுவனம். 2019-ல் தொற்று ஆரம்பித்தபோது அது பரவக்கூடியதல்ல என்று அறிவித்தது. நிலைமை சீர்கேடடைந்த பின்னர் எந்த மாற்றம் வந்தாலும் மக்களை பயமுறுத்தும் வண்ணம் அறிவிப்பை வெளியிடுகிறது. அது இன்னும் முடிந்தபாடில்லை. உண்மை நிலை யாருக்கும் தெரியாது.

தடுப்பூசி போட்டவர்களும் தொற்றுக்கு உள்ளாகிறார்கள். ஊசி போட்டவுடன் இறந்தவர்கள் பற்றி பெரிதாக ஒன்றும் செய்தி வெளி வரவில்லை.

ஆக மொத்தம், கூட்டி கழித்துப் பார்த்தால் வரக்கூடிய முடிவு '0' தான்.

உலகிற்கே அறிவுரை சொல்லக்கூடிய, உலக சுகாதார நிறுவனமும் வறள் பசு தானே!

கொற்ற பசு குறி கட்டி மேயினும் வறள் பசுவே!

***  ***  ***

'மற்றைய மாநிலங்களை கணக்கில் கொள்ளும்போது, குறைந்தது பதினைந்து ஆண்டுகள் முன்னோடியாக திகழ்கிறது தமிழக கல்வி முறை. புதிய தேசிய கல்வி கொள்கையை ஏற்பதால் தமிழகம் பின்னோக்கி செல்ல வேண்டி இருக்கும்.' - அரசு வக்கீல் தனது வாதத்தை நீதியரசரிடம் எடுத்துரைத்தார்.

ஒரே நாடு, ஒரே கல்விமுறை எனத்திட்டமிடும்போது கல்வியில் வளர்ச்சி பெற்றுள்ள மாநிலங்களை கணக்கில் கொண்டு புதிய கல்வி முறையை கொண்டு வந்திருக்க வேண்டும். பின்தங்கிய மாநிலங்களை தாங்கி பிடிக்க கொண்டு வரும் புதிய கல்வி முறை நிச்சயம் எதிர்ப்பை சந்திக்கத்தான் செய்யும்.

இன்றைக்கும் பிளஸ் டூ தேர்வு முடிவுகள் அறிவித்து தமிழகம் கல்லூரிகளுக்கு அட்மிஷன் போட்டுக்கொண்டிருக்கையில், C B S E தேர்வு எழுதிய மாணவர்கள் தேர்வு முடிவுகள் தெரியாமல் விழித்துக்கொண்டிருக்கிறார்கள்.

ஆனால், கல்வியின் தரத்தில் வறண்ட மாநிலங்களை கணக்கில் கொண்டு  தேசிய கல்வி கொள்கையை வகுக்கும்  தலைவர்,  பெரிய பொறுப்பிலிருந்தாலும், தன்னுடைய அதிகார  வரம்பிற்குள்தானே திட்டமிட முடியும்.

புதிய தேசிய கல்வி திட்ட தலைவர்  என்ற பதவியை கொண்ட இவரும் ஒரு வறள் பசுவே.

கொற்ற பசு குறி கட்டி மேயினும் வறள் பசுவே!

***  ***  ***

கற்ற பசுக்கள் கதறித் திரியினும் 
கொற்ற பசுக்கள் குறிகட்டி மேயினும் 
முற்ற பசுக்கள் ஒருகுடம் பால்போது 
மற்றைப் பசுக்கள் வறள்  பசுதானே.

                                                                                        - திருமந்திரம் 2015

வறள் பசு

வறள் பசு 

இருப்புக்கொள்ளவில்லை சரவணனுக்கு.

'என்னைப் பிடிக்காமல் போய் விட்டால்..?' - பலமுறை பார்த்தும் திருப்தி அடையாமல் மீண்டும் மீண்டும் தன்னை கண்ணாடியில் பார்த்துக்கொண்டான். மீசையில் அங்கங்கு நரைத்திருந்த முடிகளை திருத்திய  பின்னரும், புதிதாக ஏதும் தெரிகிறதா என்று ஆராய்ந்தான்.

காலையில் புரோக்கர் வாட்சப்பில்  அனுப்பி இருந்த  பெண்ணின் படத்தை டெஸ்க்டாப் இமேஜாக மாற்றி வைத்திருந்தான். படத்தை பார்க்க பார்க்க, சுமாராக தேர்வெழுதிவிட்டு தேர்வு முடிவுகளை தேடும் மாணவனின் நெஞ்சத்தின் படபடப்பு.

கன்னிகா.. கன்னிகா.. கன்னிகா..

'பார்க்குமிடமெல்லாம் கன்னிகா. - நான் சுவாசிக்கும் காற்றே கன்னிகா.' - இது நிஜம்தானா என்று பலமுறை தனக்குள்ளே கேட்டுக்கொண்டான்.

'முப்பத்தாறு வயசு' என்பதை  பெண்ணின் வீட்டார் பெரிதாக  சொல்வார்களோ. 'ஆனா வயசுக்கேத்த வேலையும், சம்பளமும் இருக்கே.' என்று தன்னைத்தானே தேற்றிக்கொள்ள முயற்சித்தான்.

அவனுடைய அத்தனை தேறுதல்களும், பெண்ணின் படத்தை பார்த்ததும் காணாமல் போனது. 

'இவளுக்காகத்தான் இத்தனை நாள் காத்திருந்தேனோ?'- சுண்டி இழுக்கும் கண்களில் ஆழ்ந்திருக்கும்போது  மொபைல் அழைத்தது.

'ஹலோ சரவணன் சார். பொண்ணுக்கு உங்கள புடிச்சிருக்காம்.' - நேராக மேட்டருக்கு வந்தார் புரோக்கர்.

'புடிக்காம என்ன.. பேங்க்ல மேனேஜர்.. மாசம் எழுபதாயிரம் சம்பளம்.. வேற என்ன வேணும் பொண்ணுக்கு..' - எண்ண ஓட்டத்தை தடை செய்தது, புரோக்கரின் தொடர்ந்த குரல்.

'ஆனா, ஒரு சின்ன ப்ராப்ளம். பொண்ணு இப்பதான் ஜாப்ல சேந்து பத்து மாசம் ஆகுது.'

'அதனாலென்ன ப்ராப்ளம்? வேலைய விட்டுரலாம்தானே' - எந்த தடையையும் உடைத்து நொறுக்க தயாராக இருந்தான் சரவணன்.

'அதில்ல சார். பொண்ணு பெங்களூர்ல வேலைக்கு சேரும்போது மூணு வருஷம் பாண்ட்ல கையெழுத்து போட்டிருக்கா..'

'பாண்ட் பிரேக் ஆச்சுன்னா, பத்து ரூபா திருப்பி கட்டணும்' 

புரோக்கரின் பத்து ரூபா என்பது பத்து லட்சம் என்பது புரிந்தது சரவணனுக்கு.

'அந்த கண்ணுக்கு அஞ்சு லட்சம் தாரேண்டி.. அந்த நெஞ்சுக்கு சொத்தெழுதி தாரேண்டி' - முணுமுணுத்தான் சரவணன். காஜல் அகர்வால் சாயல் பெண்ணுக்கு இருப்பதாக நினைத்துக்கொண்டான்.

'நீங்க பொறுப்ப ஏத்துக்குவீங்களான்னு பொண்ணு ரொம்ப தயங்கி தயங்கி கேட்டுச்சு. அவளுக்கு உங்கள கட்டிக்கணும்னு ரொம்ப ஆசை'.

எதுக்கு சம்பாரிக்கிறோம். நல்ல வாழ்க்கை அமையத்தானே. இந்த பெண் கிடைத்தால் இதை விட என்ன சந்தோசமான வாழ்க்கை கிடைத்துவிடப்போகிறது பணத்தை வைத்து.

'இன்னிக்கு நீங்க சரி சொல்லிட்டு, அமௌன்ட் அனுப்பி வச்சீங்கன்னா, பொண்ணுட அம்மா அப்பாகிட்ட பேசிறலாம். சாயந்தரம் நல்ல நேரம் இருக்கு. மருதமலை கோவில்ல வச்சு கல்யாணத்த முடிச்சிரலாம்.'

சரவணனுக்கு யோசிக்க கூட நேரம் கொடுக்கவில்லை புரோக்கர்.

'டின்னர் முடிச்சிட்டு, தாஜ்ல ஸ்பெஷல் ரூம் புக் பண்ணிரலாம்.'

'நானும், கன்னிகாவும்  மட்டும் தனியாக. அதுவும் தனி அறையில்'. மின்னலைப்போல் தாக்கிய இன்ப அதிர்வுகளால் நிலைகுலைந்தே போய் விட்டான் சரவணன்.

'சரவணன் சார்.. பொண்ணுக்கு உங்க வாட்சப்  நம்பர் குடுத்திருக்கேன். பேங்க் டீடெய்ல்ஸ் அனுப்புவா. பணம் அனுப்பிட்டு கன்பார்ம் பண்ணுங்க. கல்யாண ஏற்பாடு பண்ணிர்றேன்'.

கையிலிருந்த ஆறு லட்சம் கன்னிகா பேங்க் அக்கௌண்டுக்கு அனுப்பியாச்சு. மீதம் ஒரு மாதத்திற்குள்  கொடுப்பதாகவும் ஏற்பாடு.

அதன் பின்னர் நடந்ததெல்லாம் வெறும் கனவில் நடப்பதுபோல் நடந்தேறியது.

***  ***  ***

இதோ, இத்தனை வருடம் காத்திருந்த வசந்தம் வெகு அருகில். தாஜ் அறையின் குளிர்ச்சியை  தாண்டி வியர்த்தது சரவணனுக்கு.

'ஏங்க, இங்க சரக்கு கிடைக்குமா? ஆடர் பண்ணுங்க' - கன்னிகாவின் குரலில் வந்த முதல் செய்தியை கேட்டு, புரிந்து கொள்ள முடியாமல் விழித்தான் சரவணன்.

'என்ன.. சரக்கா?'

'ஆமாங்க, இன்னிக்கு ரொம்ப அலைச்சல் நமக்கு. சரக்கிருந்தா ரொம்ப நல்லா  இருக்கும்.' - என்ற கன்னிகா தன் மொபைலில் ஏதோ வீடியோ கிளிப்பை தேடினாள்.

'ஆ.. இதோ கெடச்சிருச்சு. பாருங்க இந்த பிராண்ட் ஆர்டர் பண்ணுங்க' - தன் அக்காவுடன் குடிக்கும்போது எடுத்த  விடீயோவை காட்டினாள்.

இதுவரை இன்ப மயக்கத்தில் இருந்த சரவணனுக்கு, தலையில் செங்குத்தாக இடி இறங்கியது.

ஒரு பீடியோ, சிகரெட்டோ, குடியோ எதுவுமே பழக்கம் இல்லாத சரவணன் பதறிப்போனான்.

'இதெல்லாம் தப்புமா. இதுவரைக்கும் நீ எப்படியோ. இனிமேல் நாம் புதுசா வாழ்க்கையை ஆரம்பிப்போம்.'  

இப்படி சொன்ன சரவணனின், சொட்டையாக தயாராக இருந்த  தலையை வெறித்து பார்த்த படியே சொன்னாள், கன்னிகா, 'சரி. ரொம்ப டயர்டா இருக்கு. எனக்கு வேற பீரியட்ஸ் ஆயிருச்சு. தூங்குவோம்' - என்று சொன்னபடியே ரெஸ்ட்ரூம் போனாள்.

திரும்பி வந்தவள் பெட்ஷீட் இழுத்து  போர்த்தி படுத்துக்கொண்டாள். அவளிடம் இருந்து வந்த ஒருவித பழ வாசனை, என்னவென்று சரவணனுக்கு தெரியவில்லை.  

***      ***     ***

நேற்றைய இரவில் நடந்ததை ஒரு பொருட்டாக எடுத்துக்கொண்ட மாதிரி தெரியவில்லை, கன்னிகாவின் நடவடிக்கைகளில்.

சந்தோசமாக பேசிக்கொண்டு சரவணனுடன் ஷாப்பிங் மால் சுற்றினாள். சரவணனும் சளைக்காமல் அவள் கேட்டதை எல்லாம் வாங்கி கொடுத்தான். வாழ்வின் முதன்முறையாக காஸ்மெடிக்ஸ், பியூட்டி ப்ராடக்ட்ஸ், டிரஸ் என ஐம்பதினாயிரத்துக்குமேல் செலவு செய்தான்.

அவள் அருகாமை பிரமிப்பிலிருந்து மீளாமல் சரவணனிருக்க,  அவனுடன் இறுக்கமாக இணைந்து நடந்துகொண்டாள் கன்னிகா.

'எனக்கு எஸ்கலேட்டர்னா பயம். என் பிரண்ட்ஸ் கூட கிண்டல் பண்ணுவாங்க. நீங்க எஸ்கலேட்டர்ல போங்க. நான் படியில் ஏறி வர்றேன்.' - அவனை  நான்காவது மாடி கடைக்கு அனுப்பி வைத்தாள்.

'நாலு மாடி ஏறி வர பத்து நிமிஷம் ஆகுமா. அரை மணி நேரம் ஆச்சு. இன்னும் மேல வரலையே' - இப்பொழுதுதான் சரவணனுக்கு எங்கோ தவறு நடந்த மாதிரி ஒரு பிளாஷ்.

எவ்வளவு தேடியும் கிடைக்கவில்லை கன்னிகா.

அறையில்  வைத்து விட்டு வந்த  நகைகளும்,  பணமும் அவளைப்போலவே காணாமல் போயிருந்தது. நல்ல வேளை, அறை சாவியை வரவேற்பறையில் கொடுத்து விட்டு போயிருக்கிறாள்.

 ***  ***  *** 

'சார். இது எங்க கண்ட்ரோல் ஏரியா இல்ல. நீங்க அந்த பொண்ணு ஊர்ல போய் கம்ப்ளைண்ட் குடுங்க' - சரவணனின் முறையீட்டை ஏற்க மறுத்து, நூறு  கிலோமீட்டர் தள்ளி இருந்த காவல் நிலையத்தை கை காட்டினார் நிலைய காவல் அதிகாரி.

இனி மீதமுள்ள வாழ்க்கை கன்னிகாவுடன் வாழ்ந்த இரண்டு நாள் நினைவுகளும், காவல் நிலையமும்தான் சரவணனுக்கு.

*** ***  ***

இது ஒரு உண்மை கதை. 

20-06-2022 அன்று செய்திகளில் பரபரப்பாக வந்தது. கதைக்களம் சிறுகதைக்கேற்ப மாற்றம் பெற்றிருந்தாலும், கதைக்கரு உண்மை நிகழ்வு.

தான் கற்ற கல்வியோ, உலக அனுபவ அறிவோ எதுவும் உதவவில்லை சரவணனுக்கு.

தனக்கே உதவாத கல்வியை வைத்துக்கொண்டு எவ்வளவு கதறினாலும், யாருக்கும் உதவாத வறள் பசு போன்றவர்களே இவர்கள்.

கற்ற பசுக்கள் கதறித் திரியினும் வறள்  பசுதானே.. 

***  ***  ***

கற்ற பசுக்கள் கதறித் திரியினும் 
கொற்ற பசுக்கள் குறிகட்டி மேயினும் 
முற்ற பசுக்கள் ஒருகுடம் பால்போது 
மற்றைப் பசுக்கள் வறள்  பசுதானே.

                                                                                        - திருமந்திரம் 2015

அறம் செய விரும்பு

அறம் செய விரும்பு 

தருமம் செய்யவும் விருப்பத்துடன். இதைத்தான் நமக்கு சொல்லி தந்தார்கள்.

ஆனால்,

 அறம் என்றால் என்ன?

அறம் என்றால் என்ன? என்ற வினா எழுப்பினால் அதற்கு விடை காண்பது கடினமானது. அறம் என்ற சொல்லின் பொருள் என்ன? ‘அறு’ என்ற வினைச்சொல் அடியாகப் பிறந்ததே ‘அறம்’ என்னும் சொல். இச்சொல்லுக்கு அறுத்துச் செல், வழியை உண்டாக்கு, உருவாக்கு, துண்டி, வேறுபடுத்து என்ற பலவகைப் பொருள்கள் வழங்கி வருகின்றன. இத்தகைய சொல் ஆராய்ச்சியின் அடிப்படையில் அறம் என்னும் சொல்லிற்குப் பின்வருமாறு விளக்கம் கூறலாம்.

மேலும் படிக்க கீழ்கண்ட இணைய பக்கத்திற்கு செல்லவும்:

 https://www.tamilvu.org/courses/degree/c012/c0121/html/c012111.htm

அறம் எனப்படுவது நியம பண்புகளை வாழ்வின் வழியாக கொண்டு இயமத்திடை நிற்றல் ஆகும்.

நியம பண்புகள்:

1. தூய்மை  - உள்ளத்தில் தூய்மை 

2. அருள்  - கருணை உள்ளம் 

3. ஊண் சுருக்கம் - அளவறிந்து உண்ணல் 

4. பொறை  - பொறுமையாக இருத்தல் 

5. செவ்வை  - நேர்மையுடன் நடத்தல்  

6. வாய்மை - உண்மை பேசுதல் 

7. நிலைமை - நடுவு நிலை நிற்றல் 

8. காமம் - அளவற்ற இச்சை  

9. களவு - பிறர்  பொருளை அபகரித்தல்   

10. கொலை - உயிர்களை கொல்லுதல்

தூய்மை  அருள்ஊண் சுருக்கம் பொறை  செவ்வை    
வாய்மை நிலைமை வளர்த்தலே மற்றுஇவை 
காமம் களவு கொலைஎனக்  காண்பவை 
நேமி ஈர்ஐந்து நியமத்தன் ஆமே.

                                                                        - திருமந்திரம் 556

இயமம்  எனப்படுபவை,

1. கொல்லான்  - பிற உயிர்களை கொல்ல  மாட்டான் 

2. பொய் கூறான் - உண்மைக்கு புறம்பாக பேச மாட்டான் 

3. களவிலான்  - பிறர் பொருள்களை கவர மாட்டான் 

4. எண்குணன் - தன் நல்ல  எண்ணம் போன்ற குணத்தை கொண்டவன் 

5. நல்லான் - பேசவும், பழகவும்  நல்லவன் 

6. அடக்கம் உடையான் - அடக்கத்துடன் நடந்து கொள்பவன் 

7. நடுச்செய்ய வல்லான்  - பிரச்சனைகளை  ஆராய்ந்து தீர்ப்பு சொல்பவன் 

8. பகுந்துண்பான் - தனக்கு கிடைத்ததை மற்றவர்களுடன் பகிர்ந்துண்பவன் 

9. மாசிலான் - குற்றமற்றவன் 

10. கள் [இல்லான்] - மது அருந்தாதவன்  

11. காமம் இல்லான் - மித மிஞ்சிய இச்சைகளை வளர்த்துக்கொள்ளாதவன் 

 

கொல்லான் பொய்கூறான் களவிலான் எண்குணன் 
நல்லான் அடக்கம் உடையான் நடுச்செய்ய 
வல்லான் பகுந்துண்பான் மாசிலான் கள்காமம் 
இல்லான் இயமத் திடைநின்  றானே.

                                                                              - திருமந்திரம் 554

திருக்குறளில் உள்ள அறன் வலியுறுத்தல் [31-40] பாடல்கள், மேற்குறிப்பிட்ட பொருளுடன் விளங்கிக்கொள்ள சிறப்பாக  உள்ளது.

அறவழியில் வாழ்பவனுக்கு, பொறாமை, பேராவல் அதாவது காமம், கோபம் கொண்டு வெகுண்டெழுதல் மற்றும் கடு மையான வார்த்தைகளை கொண்டு பேசுதல் அவன் அறவாழ்வின் எதிரிகளாகும். 

அழுக்காறவா வெகுளி இன்னாச்சொல் நான்கும் 
இழுக்கா இயன்ற தறம்.

                                                                                                      - குறள் 35

பேசாமல் மனதளவில் எந்த குற்ற எண்ணம் இல்லாமல் இருப்பதே தலை சிறந்த அறமாகும்.

மனத்துக்கண் மாசிலன் ஆதல் அனைத்தறன் 
ஆகுல நீர பிற.

                                                                                                       - குறள் 34

தெய்வம் தந்த வீடு

 

அம்மா என்னும் 
தெய்வம் தந்த வீடு 
நான் 

பவானி ஆறு.

ஆற்றங்கரையில் புல்லை அறுத்துக்கொண்டிருக்கும் அம்மாவை பார்க்கிறேன்.

ஏனோ இந்த எண்ணம் மனதில், அம்மா இல்லாத உலகம் எப்படி இருக்கும்? என்னால் அதை தாங்கிக்கொண்டிருக்க முடியுமா?

என்னுடைய முழு உலகம்  அம்மா மட்டுமே! 

ஆனால், அம்மாவின் உலகம் மட்டும்  ஏன் இப்படி இருக்கிறது.

அதிகாலை நான்கு மணிக்கு எழுந்து காட்டிற்கு சென்று விறகு சேகரிக்கிறாள். மதிய உணவு சமையலின்போதே, நெசவு செய்வதற்கான துணை வேலைகளை செய்கிறாள். மதியமும், மாலையும் அடுத்தவர்  வீட்டு நெசவு தொழிலுக்கு துணை வேலை செய்கிறாள். கூடவே, வீட்டில் இருக்கும் பால் தரும் எருமைக்கு தேவையான நீர், புல்லை கொடுக்கிறாள். வீட்டை சுத்தம் செய்வதில் இருந்து, தன்னுடைய ஏழு குழந்தைகளுக்கான தேவைகளை புரிந்து செய்கிறாள். எத்தனை மணிக்கு தூங்க செல்வாள் என்று எனக்கு தெரியாது.

கணவனின் ஆதரவில்லாமல், சரியான நிதி ஆதாரமில்லாமல், சொந்த வீடில்லாமல்  இது எப்படி சாத்தியம்?

பால்யமணம் புரிந்து தனித்திருந்த பெரியம்மா எங்களுக்கு வீட்டை கொடுத்து, ஆதரவாக இருந்தது மலையளவு பலம் அப்போது.

பன்னிரண்டாவது வயதில், பழத்தோட்டம் பேருந்து நிறுத்தத்தில், என்னை அரசு விடுதியில் தங்கி படிக்க அனுப்பும்போது அம்மாவின் கண்களில் வழிந்தது  கண்ணீர். இன்றைக்கு அந்த கண்ணீருக்கு ஆயிரம் பொருள் சொல்ல முடியும் என்னால். அன்றைக்கு, படிக்கத்தானே போகிறேன், எதற்கு அழணும் என்றே நினைத்தேன்.

அரசு விடுதி.

பிற்படுத்தப்பட்டோர் வரிசையில் போராடி எனக்கும் ஓரிடம் கிடைத்தது. படிப்பில் போராட வேண்டியதாக இல்லை. வகுப்பில் முதல் இடம் என்பது நான் முயற்சிகள் செய்யாமலே கிடைத்தது, ஆச்சர்யம். அதுவரை ஆறாம் வகுப்பு வரை  நான் படித்த பள்ளியில், முதலிடம் பிடிக்க கடின முயற்சி தேவைப்பட்டது. இங்கோ, என்னுடன் படித்த மாணவர்கள், வகுப்பெடுக்கும் ஆசிரியர்கள் அதிகமாக படிப்பை பற்றி அலட்டிக்கொள்ளவில்லை என்பதும் உண்மை.

ஆனால், அதிகம் போராட வேண்டி இருந்தது பசி இல்லாமல் இருப்பதற்கு.  அதைவிட கொடுமை, சக மாணவர்களின் சகிக்க முடியாத பழக்க வழக்கங்கள். இரண்டும்கெட்டான் பருவத்தில் கொடுக்கப்பட்ட தகாத புத்தகங்கள். இயற்கையாக உடலில் ஏற்பட்ட வளர்ச்சியின்  மாற்றங்கள்.

என் உலகம் அம்மாவை விட்டு தனியாக வளர ஆரம்பித்தது.

பள்ளிப்படிப்பை முடித்து, கல்லூரி நாட்கள்.

மீண்டும் அம்மாவுடன்.

வறுமை தேவதையின் முழுக்கட்டுப்பாட்டில் இருந்தது வீடு. இரு சகோதரர்களின் சொற்ப வருமானம். அதுவும், வேலை நிறுத்தம், அது இதுவென்று முழுமையாக வீடு வந்து சேராது. 

அம்மாவின் உழைப்பு நின்றபாடில்லை; கொஞ்சம் குறைந்திருந்தது. இயலாமையில் வரும்  வார்த்தைகளின் வெப்பம் அதிகம் என்னை சுடும்.

எதற்கு எங்களை பெற்றாய்?

யாரும் தன் அம்மாவிடம் கேட்டுவிடக்கூடாத கேள்வி. கேட்டு விட்டேன். விவரமறிந்து கேட்டேனா அல்லது வெறுப்பின் உச்சியில் இருந்து கேட்டேனா தெரியாது. இன்றைக்கும் என்னை கூனிக்குறுக வைக்கிறது அந்த வார்த்தைகள்.

வேலையில்லாப்பட்டதாரி.

கல்லூரி முடித்து ஒன்றரை வருடங்கள். யார் எதை பேசினாலும், என்னை நோக்கியே  பேசுவதாக அர்த்தம் வருகிறது. வாழ்க்கையே அர்த்தம் அற்றதாக தோன்றும்போது, உறவுகள் அனைத்தும் கசப்புதானே.

ஒரு வாரம் முழுக்க உண்ணா நோன்பு, உள்ளுக்குள் அழுதுகொண்டே. அம்மாவுக்கு தெரியும் நான் பண்பட்டுக்கொண்டிருக்கிறேன் என்று.

என் வெறுமைக்குள் அம்மாவும் அன்று.

வாழ்வில் வசந்தம் வரவும், வளரவும் செய்தது வங்கிப்பணி. இருபது ஆண்டுகள் ஓடி மறைந்தது.

திரும்பிப்பார்க்கிறேன்.

அம்மா தனிமரம்.

அதையே வரமாக ஏற்றுக்கொண்டார்கள். வேடந்தாங்கல் பறவைகளாக பெற்றவைகள் மற்றும் பெற்றவைகள் பெற்றவைகள். வருவார்கள், போவார்கள் உலகெங்கிலிருந்தும்.

மீண்டும் இருபது ஆண்டுகள் ஓடி மறைந்தது. ஞாயிற்று கிழமைகளில் அம்மாவுடன் மகிழ்வுடன்.

'எல்லாம் வெறுத்துவிட்டது, இந்த மீன் சாப்பிடுவதில் மட்டும் ஆசை இருக்கிறது.'

அம்மாவின் நினைவாக மீன் படையலிட்டு, அம்மாவை என் கண்கண்ட தெய்வமாக வணங்குகிறேன்.

[17-04-2018 என்னையும், மண்ணையும் விட்டு பிரிந்த அம்மாவின் நினைவாக]

மத்தளி ஒன்றுள தாளம் இரண்டுள 
அத்துள்ளே  வாழும் அரசரும் அஞ்சுள்ள 
அத்துள்ளே வாழும் அரசனும் அங்குளன் 
மத்தளி  மண்ணாய்  மயங்கிய வாறே.

                                                                                                         - திருமந்திரம் 189

மத்தளம் போன்ற உடல் ஒன்றிருக்கிறது. அந்த மத்தளத்தை வாசிக்கும் தாளங்களாக இடது மற்றும் வலது சுவாசம் உள்ளது. அந்த உடலை ஐம்புலன்கள் அரசாட்சி செய்கின்றது. அரசராக உயிர் இருக்கிறது. அரசன் நீங்கி விட்டால், மண் வளர்த்த  அந்த உடல் மண்ணிலே மறைந்துவிடுகிறது..

பிறந்ததொன்று நிலைப்பதில்லை. யாரும் இதில் விதி விலக்கில்லை.

 

முக்கனல்

முக்கனல் 

புதிய சூரியனின் 
பார்வையிலே..
உலகம் விழித்துக்கொண்ட
வேளையிலே..    

இந்த அனுபவம் உங்களுக்கு கிடைத்திருக்கிறதா?

அதிகாலை நடைப்பயிற்சி செய்யும்போது கிடைக்கக்கூடியது.

காலை ஆறுமணி வாக்கில் பூங்காற்று வீசும். அதுவும் ஒரு ஐந்திலிருந்து பத்து நிமிடம் மட்டுமே. அதை தென்றல் என்று சொல்லி ஒதுக்கி விட முடியாது. அதனினும் மென்மை மற்றும் மேன்மையானது.

நடைப்பயிற்சியில் ஏற்படும் களைப்பை களைந்து உடனடி உற்சாகத்தை தரக்கூடியது. ஒவ்வொரு நாளும் இந்த அனுபவத்திற்காகவே காலை நடைப்பயிற்சியில் எனக்கு ஆர்வம் அதிகம்.

லேசாக வியர்த்திருக்கும் உடலுக்கு, அந்த காலை இளங்காற்று சுகமாக இருக்கும்.

உழைப்பில் ஈடுபடும்போதோ, வெளியில் வெப்பம் அதிகமானாலோ  வியர்த்து, உடல் வியர்வையை வெளியேற்றுகிறது.

இது எதனால், எப்படி  என்று பார்ப்போம்.

சாதாரணமாக உடலின் வெப்ப நிலை சற்றேறக்குறைய 98.6 F டிகிரி அல்லது 36.4 C  டிகிரி அளவில் இருக்கும். இந்த உடலின் வெப்பத்தில் மாற்றம் ஏற்பட்டால் உடல் தன் வெப்ப சமனத்தன்மை பெறுவதற்கு சில காரியங்களை செய்யும். அவற்றில் ஒன்று வியர்வை.

அது தவறும் பட்சத்தில், அதிக வெப்ப நிலை என்பது காய்ச்சலாகவும், குறைந்த வெப்ப நிலை  உடலில் ஜன்னியாகவும் அறிகிறோம்.

சரி, உடலின் வெப்பம், உச்சந்தலையிலிருந்து உள்ளங்கால்வரை சீராக எப்படி இருக்கிறது. வயிற்றில் [மணிப்பூரகம்] வெப்பம் உண்டாகிறதென்றால், உச்சந்தலைக்கோ, உள்ளங்காலுக்கோ செல்வதற்குள் குளிர்ந்து விடாதோ?

அவ்வண்ணமே, சூரியனில் உண்டாகும் வெப்பம், சூரியக்கதிர்களாக உறைபனிக்கும் மிகக்குறைந்த வெப்ப மண்டலத்தை கடந்தும் பூமிக்கு எப்படி வெப்பம் கொடுக்கிறது. விமானப்பயணத்தின்போது கவனித்திருக்கலாம், விமானம் உயரப்பறக்கும்போது, வெளி வெப்பநிலை மைனஸ் 50 டிகிரிக்கும் கீழே இருக்கும். இந்த வெப்ப நிலை உறைபனிக்கும் குறைவானது. இக்குளிர் வெளியை கடக்கும்போது  குளிர்வடைந்த சூரியக்கதிர்கள், எப்படி வெப்பம் பெற்று பூமிக்கு வெப்பத்தை கொடுக்கிறது?

அவை எப்படி சாத்தியம் என்று  பார்ப்போம்.

உடலில் உள்ள ஒவ்வொரு சிற்றறையும்,  சக்தியை   எரிக்கும் கொதிகலனாக இருக்கிறது. சிற்றறையில் உள்ள சக்தியானது அங்கேயே எரிக்கப்படும்போது  உடலுக்கு தேவையான வெப்பம் சமச்சீராக கிடைக்கிறது.

அதே போன்று, சூரியக்கதிர் பூமி மண்டலத்தை அடையும்பொழுது, புவிஈர்ப்பு காந்த மண்டலத்துடன் சேர்ந்து  வேதி மாற்றம் பெற்று  வெப்பத்தை கொடுக்கிறது. புவி ஈர்ப்பு அதிகம் உள்ள பூமத்திய ரேகை பிரதேசங்களில் வெப்பம் கூடுதலாக உள்ளது.

உயிர்கள் இந்த மண்ணில் வாழ மூன்று வகையான வெப்பம் உடலுக்கு  தேவைப்படுகிறது. அவைகளை, உயிர்க்கனல், இறைக்கனல் மற்றும் புறக்கனல் எனப்பிரித்தறியலாம்.

1. உயிர்க்கனல் 

உயிர்க்கனலை மூலக்கனல் என்றும் அறியலாம். மூலாதாரத்தில் இருந்து எழும் நெருப்பானது மணிப்பூரகத்தில் வெளிப்பட்டு நாம் உண்ணும் உணவை ஜீரணிக்க உதவுகிறது. மேலும் உணவில் இருந்து கிடைக்கும் ஏழு வகை சத்துக்களை உடலின் அதனதன் பகுதிகளுக்கு அனுப்பி வைக்க உந்துதலாகவும் இருக்கிறது. 

மூலாதாரத்தில் நெருப்பை யார் வைத்தது?

வேயின் எழுங்கனல் போலஇம் மெய்எனும் 
கோயில் இருந்து குடிகொண்ட கோன்நந்தி
தாயினும் மும்மலம் மாற்றித் தயாஎன்னும் 
தோயமதாய்  எழும் சூரியன் ஆமே. 

                                                                                   - திருமந்திரம் 116

மூங்கில்கள் உரசிக்கொள்ளும்போது நெருப்பு உண்டாகும். அவ்வண்ணமே மனித உடலில் ஜீவாத்மாவாக குடிகொண்டுள்ள பரமாத்மா, கடலில் இருந்து எழும் சூரியன் போல, தாயின் பரிவுடன் மும்மலங்களை அகற்றி, உயிர்க்கனலாக எழுகிறான்.

2. இறைக்கனல் 

உடலில் உயிர் இருக்கும்வரை மூச்சுக்காற்றின் மூலம்  இறைக்கனல் உடலில் பாய்ந்துகொண்டே இருக்கும். இக்கனலே, உயிர்க்கனல் உடலின் சிற்றறைகளில் சேமித்து வைத்த சக்தியை எரிக்க உதவும் நெருப்பு பொறி ஆகும். இறைக்கனலின் தன்மையால் சக்தி எரிக்கப்பட்டு உடல் இயங்குவதற்கான ஆற்றல் கிடைக்கிறது.

சூரிய காந்தமும் சூழ்பஞ்சும் போலவே 
சூரிய காந்தம் சூழ்பஞ்சைச் சுட்டிடா 
சூரியன் சந்நிதியில் சுடுமாறு போல் 
சூரியன் தோற்றமுன் அற்ற மலங்களே.

                                                                                  - திருமந்திரம் 117

குவிக்கப்பட்ட சூரியக்கனல் பஞ்சை எரித்துவிடும். ஆனால், உடலை எப்பொழுதும் சுற்றிவரும்  இறைக்கனல் உடலை எரிப்பதில்லை. [மாறாக உணவில் இருந்து சிற்றறையில் சேமிக்கப்பட்ட சத்தினை எரிக்கும் பொறியாக அமைகிறது.] இவ்விறைக்கனலின் தன்மையை உணர்ந்து கொண்டவர்களின் ஆணவம், கன்மம், மாயை என்னும் மும்மலங்கள், சூரியக்கனல்  குவியலின்  முன்னர் இருக்கும்  பஞ்சு எரிவதுபோல் எரிந்துவிடும்.

3. புறக்கனல் 

புறக்கனல் என்பது  சூரியனில் இருந்து பூமிக்கு கிடைக்கும் வெப்பம் ஆகும். இந்த வெப்பமானது, இடத்திற்கேற்பவும், காலத்திற்கேற்பவும் மாறுபடுகிறது.

நம் உடல் சூரிய வெப்ப  நிலைக்கேற்ப  தன்னைத்தானே சமச்சீர் நிலையில் வைத்துக்கொள்கிறது. வெளியில் வெப்பம் அதிகமானால், உடலில் உள்ள நீர் வியர்வையாக மாறி உடலை குளிர்விக்கிறது. அதே சமயம், குளிர் அதிகம் உள்ள காலத்தில், சிற்றறைகளில் உண்டாகும் வெப்பம் கூடுதலாகி உடலை வெப்பமாக வைத்துக்கொள்கிறது.

அங்கிமிகாமை வைத்தான் உலகு ஏழையும் 
எங்குமிகாமை  வைத்தான் உடல் வைத்தான் 
தங்கிமிகாமை வைத்தான் தமிழ்ச்  சாத்திரம் 
பொங்கிமிகாமை வைத்தான் பொருள் தானுமே.

                                                                                  - திருமந்திரம் 87

ஏழுலகைப் படைத்த இறைவன் எங்கும் வெப்பத்தை தேவையான அளவு  வைத்தான். அவ்வண்ணமே உடலைப்படைத்த இறைவன், அதிகமான வெப்பம் உடலில் தங்காமல் இருக்குமாறு பார்த்துக்கொண்டான். இவற்றின் பொருளை அறிந்துகொள்ள, தமிழ் சாத்திரம் என்னும் திருமந்திரத்தையும் தேவையான பொருள் தரும்படி  அளவுடன்  படைத்தருளினான்.

தமிழும்தான் காலி

 தமிழும்தான்  காலி 

காலி காலி 
மொத்தத்துல 
அவனும்தான் காலி

அப்படியே  தமிழும்தான்  காலி 

 

அரபிக்  குத்து 

எப்படியாவது இந்த பாடலை  புரிந்து கொள்ள வேண்டும் என்ற ஆர்வம் என்னைத்  தொற்றிக்கொண்டது.

தமிழ் பாட்டுதானே! 

திருக்குறள், திருமந்திரம், போகர் பாடல்கள், பாம்பாட்டி சித்தர் பாடல்கள், சௌமிய சாகரம் படித்து  ஓரளவிற்கு என்னுடைய அறிவுக்கு எட்டியவரை தமிழை புரிந்து கொள்ள முயன்று கொண்டிருக்கிறேன். அப்பப்ப புறநானூறு கூட படிக்கிறேன், ஆனால் LKG, UKG  அளவுகூட புரிதல் இல்லை.

திரும்ப திரும்ப இந்த பாடலின் வரிகளை படித்த பின்புதான் தெரிந்தது. இது கற்காலத்திற்கு முற்பட்ட தமிழ் என்று. ஒருவேளை, குமரிக்கண்டம் கடலில் மூழ்காமல் போயிருந்தால் இந்த பாடலுக்கான அகராதி கிடைத்திருக்கலாம்.

அதுக்கு முந்தினதாம் இது:

கல் தோன்றி, மண் தோன்றாக் காலத்தே
வாளோடு முன் தோன்றிய மூத்த குடி!

புறப்பொருள் வெண்பா மாலை -ன்னு ஒரு இலக்கண நூல்; 9th CE!
சங்கத் தமிழ்-ல்லாம் இல்ல.. ரொம்ப பிந்தி!

நன்றி: puliththiral blog 

அரபி, ஆங்கிலம், நவீன தமிழ் மற்றும் இவைகளின் கலவை. கூடவே வட நாட்டின் ஹோலி பண்டிகை வேறு.  

ஹலமிதி அபி வந்தாளே - அரபி + தமிழ் 

ஹோலி ஹோலி பக்கத்துல சிரிக்கும் ரங்கோலி - ஹிந்தி + தமிழ் 

ஓ க்யூட்டி நீ ஸ்வீட்டி  உன் பியூட்டி  அதில் மாட்டி  - ஆங்கிலம் + தமிழ் 

தமிழைத்தேடினேன்.

என் வயசுக்குள்ளே முதல் மழையா ஃபீல வச்சானே.

ரொம்பவுமே ஃபீல் ஆயிட்டேன், இந்த வரிகளை படிச்சதும். என்னமா எழுதி இருக்காங்க.

கவியரசு கண்ணதாசன், வாலி, பட்டுக்கோட்டையார் கோட்டை விட்டதை புடிச்சிட்டாங்க.

தமிழில் உள்ள 51 சிறப்பெழுத்துக்களை தவிர்த்து சுத்த தமிழில் எழுதுவோம் என்று தமிழில் எழுதும்போது நாம் எடுக்கும் முயற்சி என்ன? இப்படிப்பட்ட தமிழ் - ஆங்கிலம் - அரபி கலவையில் தமிழுக்கு சிறப்பு செய்யும் கூட்டம் என்ன?

இந்த சிறப்பெழுத்துக்கள் தமிழ் அல்ல என்று சொல்பவர்களால், இன்றைய தமிழக முதல்வரின் பெயரை தமிழில் எழுத முடியுமா, உச்சரிப்பு மாறாமல்.

முடியாது.

இந்த 51 தமிழின் சிறப்பெழுத்துக்கள் நம் உடலில் உள்ள ஆறு ஆதார சக்கரங்களில், தாமரை இதழ்களாக இருக்கிறது.

ஆறந்த முங்கூடி யாகும் உடம்பினிற்
கூறிய வாதார மற்றுங் குறிக்கொண்மின்
ஆறிய அக்கரம் ஐம்பதின் மேலாக
ஊறிய வாதாரத் தோரெழுத் தாமே.

                                                                                                - திருமந்திரம் 1680

ஒன்றும் ஒன்றும் ஒன்று

ஒன்றும் ஒன்றும் ஒன்று 

நீ தருவாயோ நான் தருவேனோ 
யார் தந்த போதும் 
நீயும் நானும் வேறல்ல..

    

கலப்பினத்தமிழ் 

கலப்பின மாடுகள் அதிக பால் தருமே தவிர, நாட்டு பசுக்களிடம் இருந்து கிடைக்கும் பாலில் உள்ள உடலுக்கு ஆரோக்கியம் தரக்கூடிய ஊட்ட சத்துகள் இருக்காது. ஜல்லிக்கட்டு போராட்டத்தின்போது நாம் அனைவரும் பகிர்ந்து கொண்ட செய்தி இது.

இதே வழியில்,  படிப்படியாக நம் கல்வி முறையில் மாற்றம் கொண்டு வந்து, தமிழர்களை வட்டாரத்தமிழ்வாசிகளாக்கி விட்டார்கள்.

கோவைத்தமிழ், மதுரைத்தமிழ், நெல்லைத்தமிழ், சென்னைத்தமிழ் மற்றும் வெளி நாடுகளைப்பொறுத்த மட்டில் நாட்டுக்கொரு வட்டார வழக்கு.

இதில் சென்னைத்தமிழ் அந்த மண்வாசனை உள்ளவர்களுக்கு மட்டும் எளிது.

'சார்.. தியாகராஜ பாகவதர் காலத்திய படங்களில் பேசுற தமிழ் சுத்தமா புரியாது'

'மனோகரா படத்தில் கண்ணாம்பா சூப்பரா வசனம் பேசுவாங்க. ஆனா, எனக்குதான் ஒண்ணுமே புரியாது'

' எண்பது, தொண்ணூறுகளில் வந்த படங்கள் ஓரளவு புரியுது. எல்லாம் பாட்டுக்காக பாப்போம்'

'அப்பா.. பாட்ட மாத்துங்க. ஒரே அழுகை அழுகையா வருது, இந்த பாட்ட கேட்டா' - இது புதிய தலைமுறை.

இப்ப எல்லாம்,  'ஊ சொல்றியா மாமா.. ஊ ஊ சொல்றியா மாமா' -  இதுதான் தமிழில் டாப் டக்கர் பாட்டு.

வழக்குத்தமிழில் பேசும்போது  பாதிக்குமேல் ஆங்கிலத்தில் பேசினாலோ அல்லது எழுதும்போது ஆங்கிலம் கலந்து எழுதினாலோ மட்டுமே சொல்ல வந்த  கருத்தை எளிதில் சொல்ல  முடிகிறது.

ரொம்ப காலமா இதே சிந்தனை. எங்கே, நம்மை கலப்பினத்தமிழுக்கு மாற்றினார்கள் என்று.

எனக்கு மூன்றாம் வகுப்பில்தான் ஆங்கிலம் அறிமுகம், அதாவது ஒன்பதாவது வயதில். இது அரை நூற்றாண்டிற்கு முந்தைய நிலை. இன்றைக்கு, கருவில் உள்ள குழந்தைக்கு, பள்ளியில் முதல் மாணவனாக வர பயிற்சி. சொல்லவே வேண்டாம், இவர்கள்தான்,  தமிழுக்கு ஆதரவு தந்து தமிழில் படிக்க வைப்பார்கள் என்று.

எனக்கு இலக்கணம், செய்யுள் பாடங்கள் சொல்லி தந்தார்கள். உரை நடையிலும், செய்யுள்களிலும் வரும் இலக்கண மரபுகளை அறிமுகப்படுத்தி இருந்தார்கள். தமிழ் கற்பதற்கான ஆர்வம் ஏற்பட வழி இருந்தது.

இரண்டாம் வகுப்பு செல்லும்போது, என்னால் 'கன்னித்தீவு' படிக்க முடிந்தது.

என்னுடைய இந்த எழுத்துக்கள் எல்லாம் அன்றைக்கு எனக்கு கிடைத்த தமிழ் ஆசிரியர்களின் ஆசீர்வாதமே. எழுத்துப்பிழைகளை தவிர்க்க முடிவதும் எனக்கு கிடைத்த வரமே.

நான் பெற்ற பெரும்பாக்கியம், திருமந்திரம் போன்ற தெய்வத்திருமறைதனை, என் அறிவுநிலைக்கு ஏற்ப புரிந்து எழுத முடிவது.

திருமந்திரம் என்பது ஒவ்வொருவரின் அறிவு நிலைக்கு ஏற்ப பொருள் கொடுக்கும் அற்புதமான தமிழ்ப்புதையல். இதனை படிக்கவோ, புரிந்து கொள்ள எண்ணுவதோ, புரிந்து மற்றவர்களுக்கு சொல்வதோ அவரவர் பூர்வ ஜென்ம புண்ணியமே.

இதோ ஒரு எடுத்துக்காட்டு:

'நான் யார்?' என்று எண்ணும்போது, உடல் மற்றும் உயிர் என்பது நான் என்னும் இரண்டான உண்மை. உடலோடு உயிரும், உயிரோடு உடலும் ஒன்றி இருப்பதைக்கண்டு, இவை இரண்டும் ஒன்றுதான் என்று அறிகிறேன். நான் உடல்  என்ற நினைவில் உள்ள மனதினை, மலராக உயிருக்கு சமர்ப்பித்தால், உடலும், உயிரும் ஒன்றென்று ஆகிவிடும்.

தான்என்று  அவன்என்று இரண்டாகும் தத்துவம் 
தான்என்று  அவன்என்று இரண்டும் தனிற்கண்டு 
தான்என்று  பூவை அவன்அடி சாத்தினால் 
நான்என்ற  அவன்என்கை நல்லது ஒன்றன்றே.  

                                                                                       - திருமந்திரம் 1607

இப்ப பாருங்க ஒன்றும், ஒன்றும் ஒன்றாகிவிட்டது.

கவியரசர் கண்ணதாசன் எதை எண்ணி இந்த திரைப்பாடலை எழுதினாரோ தெரியாது. உடலுக்கும், உயிருக்குமான பாடலாக  பார்த்தால் அப்படியே ஒன்றுடன் ஒன்றாகி ஒன்றிவிட்டது. 

உன்னைக்காணாத கண்ணும் கண்ணல்ல.

மேலும் படிக்க..